Mika 5 - Wunta Mempori

I Mesia ka pongkaduduia Isaraeli 5:1-14

¹ Sine omue, hei Beteleme Eparata, hei anu lalu kodei i olono luwuno suku Yehuda, inso i olomu ta pine'anaako asa mia anu ta moparenta i Isaraeli, anu insoano mompu'uomo i ndi'ipua, mompu'u tempo i ndi'ipua.

² Onaemo pu'uno dopo'inee ira ka ihaweako tempono beine anu kontongaano me'ana umariomo me'ana. Ka i'amba anu susuano inso a luwuno pepaekompono ira mpepokule a luwuno anano i Isaraeli.

³ Onae ta moroso pakambi ira a laro roso-Do i Ue, a laro langkaino nee-Do Ue Alano; ira mpo'ia mpiha, hangano kanandio-andio langkaino pabawa-Do ta hawe i tompano wawontolino.

⁴ Onae ta gagi rodoa. Tewala to Asuri mpewinso a witato ka mpewinsokio luwuno benteto, kita mpontiso opitu puu mpopakambi umewaio, maupo oalu petewawado palili.

⁵ Ira mensaariakono ponai wita Asuri ka wita Nimoro mompake ponai pobatuki. Ira mempotola kita inso a nto Asuri, tewala dompewinsokio witato ka domelandao po'iangato.

⁶ Toreano inule i Yako ta hina i olodo hadio tongku kana tontoru inso ndi Ondae i Ue kana usa ntiwu-ntiwu a wawo mpinopaho anu nahi ponsisikori mia ka nahi pomperorohi a ana manusia.

⁷ Toreano inuleno i Yako ta hina i olodo hadio tongku, i tonga-tongano hadio tongku kana singa i olodo kondehora a ntobu, kana singa mongura i olodo bawaano bembe bimba; isuamo koa ilako, onae momperangkami ka moberi-beri; nahina anu motolao.

⁸ Kaemu ta tinande umewai ira taromu, ka luwuno iwalimu ta pinokotampula!

⁹ Ia tempo atuu, kanandiomo pau-Do i Ue, Aku mokotampulao luwuno ngaramu inso i olomiu ka merawo-rawoo luwuno karetamu.

¹⁰ Aku mokotampulao luwuno kota i witamu ka humoao luwuno bentemu.

¹¹ Aku mokotampulao luwuno sihiri inso a ngkaemu, ka luwuno puu mpopau anu nahi manasa ta gagi nami ta hina mbo'u ndi omue.

¹² Aku mokotampulao luwuno tinaha pesombaamu ka luwuno tugu pelahumoamu inso ndi omiu. Omue nami komenggolontu mbo'u mesombaio wineweuno kaemu.

¹³ Aku butao luwuno karuno lahumoamu inso ndi omiu ka rumopuo luwuno kota pesombaamu;

¹⁴ Aku mombalo pontoo a laro ntekuda ka saru mokulano tekudaku, a luwuno tongku anu nahi behe momperorongeako.