Mika 4 - Wunta Mempori

Pesintuwudo tongku a poparenta-Do i Ue 4:1-5

¹ Ta gagi a luwuno oleo pokotompa: Torukuno raha-Do i Ue ta mentade lumaloio punsuno luwuno torukuno ka kontasi-tasi mantande i wawono luwuno pongku; luwuno tongku ira mpetonda-tonda raane,

² ”aiwa, tompewuatako a ntorukuno-Do i Ue, a raha-Do Ue Alano i Yako, ka Dopaguruakita luwuno sala-Do, ka tompelempa a nsala-Do; hangano inso i Sioni ta hawe pompaguru ka pau-Do i Ue inso i Yerusale.”

³ Ira bitarao hadio tongku, ka Ira momputusi kara-karado luwuno tongku anu langkai hawe a mpo'ianga anu olai. Ira mempaluo ponaido gagi mata mpadeko, ka kansaido gagi piso pekeru; tongku nami ira mbo'u mpotande ponai mo'ewai tongku, ka ondae nami ira mbo'u mpepaguru mpetea.

⁴ Sine ondae singge mia ta mentoro a ntoto keu anggorono ka a ntoto keu arano nahina anu mompokodoito, hangano Ondae Ueno luwuakoano anu pauo.

⁵ Maupo luwuno tongku singge mia melempa a neeno pinesombaino, kita mpelempa a nee-Do Ue Alato kanatuu mpiha ka nahina tampulaano.

Ana beine Sioni ta tinolosi 4:6-14

⁶ A oleo atuu, kanandiomo pau-Do i Ue, Aku pumpu ira anu luuka, mo'asa ira anu ntesaari ka ondae anu Kusolangi iramo.

⁷ Ondae anu luuka Aku mokogagi ira torea anu pinokowo'ohu, ka ondae anu mensinaari gagi aasa tongku moroso. Ondae i Ue Ira gagi mokoledo i torukuno Sioni, mompu'u kanandio-andio ranta nahina tampulaano.

⁸ Omue mbo'u, hei Menara Pebawaano Bimba, hei Pongku Ana Beine Sioni, ndi omuemo ta hawe ka ta mekule poparentaa anu i ndi'ipua, poparentaa a Ana Beine Yerusale.

⁹ Tembio kanandio-andio ka upebooli meroku? Nahina ke mokole i tonga-tongamu? Nde masolaomo ke puu mpopatudumu, ranta ka umarasai mompemahaki kana beine anu kontongaano me'ana?

¹⁰ Pemolukimo ka peraepimo, hei ana beine Sioni, kana beine anu kontongaano me'ana! Hangano kanandio-andio omue asalakono meluarako inso a ngkota ka mo'ia i tongampada, omue asalakono melempa hawe i Babeli. I ra'aimo omue kopinotola, i ra'aimo Ira tumolosiko i Ue inso a ngkaeno iwalimu.

¹¹ Kanandio-andio hadio tongku mpepumpu umewaiko. Dompotae, ”Po'ineeomo onae isinosa'ai, po'ineeomo matato mo'ila kumitao Sioni!”

¹² Sine nahi domento'orio tinoo-Do i Ue; Nahi dompokonto'orio pomputusi-Do, nine Ira mempinumpu kana te'uno gandu a ponsesaa.

¹³ Pentademo ka sesaomo, hei ana beine Sioni, hangano tandumu Aku weweuo kana labu, ka kukumu Aku weweuo kana mala, ranta ka uperawo-rawo ira hadio tongku; Omue komesusuao rinontudo tia-Do i Ue ka pompolido tia-Do Ueno asa wawo ntolino.

¹⁴ Kanandio-andio, omue asalakono wanguo rere watumu; wala pongkadu dompontadeomo umewai kita; mompake tuko domposepi kombisino mia anu moparenta Isaraeli.