Mika 3 - Wunta Mempori

Pontata a mpetewawa ka nabi nahi mentee 3:1-12

¹ Umarino atuu kupotae, ”Imerongeomo, hei luwuno mia pinemota'uno i Yako, ka luwuno petewawa suku Isaraeli! Kombake tekona imento'orio moleoa,

² hei omiu anu umo'aliaakono moleoa ka anu kumekewoio mosa'oa? Omiu anu mpoberi kuli ngkoroido tongkuku ka ihi inso a luwuno wukudo,

³ anu mongkaa baudo tongkuku, ka mengkulio; anu merawo-rawoo wukuno, ka mebatu-batuo kana bau a laro ngkawali, kana bau a laro ngkuro.

⁴ Ondae te'ipua ira mpeboo-booli ndi Ondae i Ue, sine nahi Ira sumangki; Ira wunio rupa-Do ndi ondae i tempo atuu, hangano luwuno mosa'oa anu wineweudo.

⁵ Kanandiomo pau-Do i Ue a luwuno nabi, anu mokopansia ira tongkuku. Tewala hinao anu nginaino ngisido, ondae mpebooliako sintuwu. A mia anu nahi posimpuakono a ngangado, dome'oluakono mpetea.

⁶ Onaemo pu'uno luwuno ta gagi wongi ndi omue nahina tengkita, ka gagi wongi-wongi ndi omue mompau anu nahi manasa ta gagi, mata oleo ta sumooako ira nabi atuu, ka oleo gagi worikidi ndi ondae.

⁷ Luwuno puu mpongkita ira memongkoko'ii ka luwuno mia mpompau anu nahi manasa ta gagi ira mpohawe tataado; luwudo ira metompoo ngangado, hangano nahina sangkino inso ndi Ondae Ue Ala.

⁸ Sine ongkue andio bukeako roso, saru Penaa-Do i Ue, saru moleoa ka moroso saru mosia, ka pauo ndi Yako salano ka ndi Isaraeli halano.

⁹ Rongeomo andio, hei luwuno mia pinemota'u sukuno i Yako, ka luwuno petewawado suku Isaraeli! Hei omiu anu mokokowuereakono moleoa ka anu mokomolengkuo luwuno anu moleo,

¹⁰ hei omiu anu montadeakono rea Sioni ka Yerusale montadeakono pobobarasaia!

¹¹ Luwuno mia pinemota'uno memputusio songka hangano pompowee nahi pototono, ka sando mpesombano mompaguru hangano inowahi, nabino mpompau anu nahi manasa ta gagi hangano doi, kahinaano dompotae mpehonda ira ndi Ondae i Ue; kombake Ondae i Ue kongko Ira i tonga-tongato! Masolaa nahi ta umalu kita!”

¹² Onaemo pu'uno hangano omiu, Sioni ta pinadeko kana lere, Yerusale ta gagi howuno anu terawo, ka torukuno raha mempori ta gagi pongku mentobu.