MENGKAAA 9 - Wunta Mempori

Tawuwua anu ko'olima 9:1-12

¹ Ka i'amba mala'eka anu ko'olima puurio tawuwuano, ka kukitao aasa anano wula anu tedonta inso i langi tii i wawontolino, ka ndi onae wineeako kunsino bolo wingke matea.

² Ka i'ungkahiomo pewowano bolo wingke matea atuu, ka i'amba mewuatakoomo ahu inso a bolo atuu kana ahuno awu langkai, ka mata'oleo ka laromeene gagi wongi-wongiako ahuno bolo atuu.

³ Ka inso a ahu atuu mpeluluarako iramo kosume i wawontolino ka ndi ondae pinoweeako pabawa mengkena kana pabawado kasi-kasi molea i tolino.

⁴ Ka me'inoliwi ira, ka si domensolangi ira ewo i tolino ke luwuno pinopaho ke maupo luwuno keu, tendeano butu mia anu nahina tondoni-Do Ue Ala i ra'ino.

⁵ Ka dome'ineheako komba ka dompopepate mia, tendeano butu ka dobobarasai ira olima wula tehineno, ka pobobarasai atuu kana pobobarasaino kasi-kasi molea, ba ipongkasi mia.

⁶ Ka i tempo atuu mia ira mpo'ungke matea, sine nahi ira mehaweo, ka mingki ira memate, sine ipolaiako ira matea.

⁷ Ka rupado kosume atuu mengkena kana ngara anu pinatinda tiano peteaa, ka a wawo uludo hinao aasa anu kana ramba-ramba ulu wula, ka rupado mengkena kana rupano mia,

⁸ ka wuudo mengkena kana wuuno beine ka ngisido mengkena kana ngisino singa,

⁹ ka radado mengkena kana lemba labu, ka unino panido kana unido kareta anu rinendeno hadio ngara, anu kontongaado mpelulu melako a mpo'iangano peteaa.

¹⁰ Ka ikido mengkena kana kasi-kasi molea ka hinao senguno, ka a laro ikido atuu hinao pabawado pompokomahakido mia, olima wula tehineno.

¹¹ Ka mokole anu parenta ira onaemo mala'ekano wingke matea; neeno a mpau Ibarani onaemo Abadoni ka a mpau Yunani onaemo Apolioni.

¹² Masolaa anu amba-ambano telaloomo. Kanandio-andio ta metonda orua mbo'u masolaa.

Tawuwua anu ko'onoo 9:13-21

¹³ Ka i'amba mala'eka anu ko'onoo puurio tawuwuano, ka kurongeo aasa suara meluarako inso a opaa tanduno meda pontunua pesomba wulaa anu i aro-Do Ue Ala,

¹⁴ ka motaeakono mala'eka anu ko'onoo atuu, ”Potola iramo opaa mala'eka anu pinongu umpeda korono langkai Eparata atuu.”

¹⁵ Ka ipotola iramo opaa mala'eka anu pinatindaomo a langku ka oleo, wula ka ta'u ka dompepate ira asa ntia otolu inso a luwuno mia.

¹⁶ Ka porokodo sorodadu atuu onaemo rua etu juta sorodadu mpengara; kurongeo porokodo.

¹⁷ Ka kanandiomo kukitao a laro pongkita andio luwuno ngara ka mia anu mpesawiki ira; mpelemba labu ira, motaha kana api ka molowulu ka mongkuni walira sorano; Uludo ngara atuudo mengkena kana uluno singa, ka inso a ngangado mpeluarako api, ka ahu ka walira.

¹⁸ Hangano otolu marasaia andio mempinepate asa ntia otolu inso a luwuno mia, onaemo hangano api, ka ahu ka walira, anu meluarako inso a ngangado.

¹⁹ Hangano pabawado ngara atuudo mo'ia a laro ngangado ka a laro ikido. Hangano ikido mengkena kana ule, hinao uludo ka saru uludo atuu domposolangiako.

²⁰ Sine mia mehano, anu nahi mateako marasaia atuu, nahi dontepidi koa mbo'u inso a wineweuno kaedo: nahi dompenaa-naa mpesombai ira onitu nsa'o ka luwuno lahumoa inso a wulaa ka salaka, inso a mala, watu ka keu anu nahi pokompongkita ke moronge ke melempa,

²¹ ka nahi dontepidi inso a pompepatea, sihiri, pebelesua ka ponakoa.