MENGKAAA 8 - Wunta Mempori

Pontondoni anu ko'opitu 8:1-5

¹ Ka tempono Ana Bimba atuu umungkahio pontondoni anu ko'opitu, ka boni-boniomo i suruga, bara'ura entonga langku tehineno.

² Ka ku'amba kumitao opitu mala'eka, anu mpentade i aro-Do Ue Ala, ka ndi ondae wineeako opitu tawuwua.

³ Ka aiwaomo aasa mala'eka susua, ka ilako mentade umpeda meda pontunua pesomba saru aasa pontunua dupa wulaa. Ka ndi onae wineeako hadio dupa ka ipesombaakono meronga saru pekakaido luwuno mia mempori a wawo meda pontunua pesomba wulaa i arono kadera poparentaa atuu.

⁴ Ka mewuatakoomo ahuno dupa meronga saru pekakaido mia mempori atuu inso a ngkaeno mala'eka atuu i aro-Do Ue Ala.

⁵ Ka i'amba mala'eka atuu umalao pontunua dupa atuu, umihiiakono api inso a meda pontunua pesomba, ka metadiakono i tolino. Ka lumpaomo unino rundu, itondao koliki ka leelu.

Opaa tawuwua anu amba-ambano 8:6-13

⁶ Ka opitu mala'eka anu mpo'ini opitu tawuwua atuu mpepatinda ira mempuurio tawuwua.

⁷ Ka i'amba mala'eka anu amba-ambano puurio tawuwuano ka gagiomo usa seru baku, ka api, mesalo rea; ka luwuno atuu pinetadiako i tolino; ka mo'aiomo asa ntia otolu inso a ntolino ka asa ntia otolu inso a luwuno keu ka mo'aiomo luwuno ewo molowulu.

⁸ Ka i'amba mala'eka anu ko'orua puurio tawuwuano ka hinao aasa kana torukuno langkai, anu kolanga-langa api, pinetadiako a laro ntahi. Ka asa ntia otolu inso a ntahi atuu gagi rea,

⁹ ka memate iramo asa ntia otolu inso a luwuno anu tuwu anu hinao penaano a laro ntahi ka masolaomo asa ntia otolu inso a luwuno kapala.

¹⁰ Ka i'amba mala'eka anu ko'otolu puurio tawuwuano ka tedontaomo inso i langi aasa anano wula langkai, kolanga-langa kana pansona, ka idunsio asa ntia otolu inso a luwuno korono ka luwuno mata uwoi.

¹¹ Neeno anano wula atuu onaemo Apisintusi. Ka asa ntia otolu inso a luwuno uwoi gagi apisintusi, ka hadio mia memate hangano uwoi atuu, hangano gagiomo mopa'i.

¹² Ka i'amba mala'eka anu ko'opaa puurio tawuwuano ka i'aluo asa ntia otulu inso a mata'oleo ka asa ntia otolu inso a wula ka asa ntia otolu inso a luwuno anano wula, ranta asa ntia otolu inso ndi onae gagi wongi-wongi ka asa ntia otolu inso a meene nahi mewine ka kanandio koa mbo'u wongi.

¹³ Ka ku'amba kumitao: kurongeo aasa manu-manu singko menee i tonga-tongano langi ka mepau saru suara meroku, ”Masola, masola, memasola iramo anu mpo'ia i wawontolino hangano unino tawuwua ko'otoluno mala'eka susua, anu da ta puurio tawuwuano.”