MENGKAAA 7 - Wunta Mempori

Mia anu mentinondoni inso a tongku Isaraeli 7:1-8

¹ Ka i'amba umarino atuu kukita ira opaa mala'eka pentade a opaa siuno tolino ka dome'ontoo opaa angi i tolino, ka si hina angi mepuuri a ntuwu wita, ke a ntahi ke a luwuno keu.

² Ka kukitao aasa mala'eka susua mesabaako inso a nsabaano oleo. Iwawao pontondoni-Do Ue Ala anu tuwu; ka ipebooli saru suara meroku a opaa mala'eka anu mentinena ka domensolangio tolino ka tahi,

³ ipotae, ”Si mensolangio tolino ke tahi ke luwuno keu ba napi kimentondoni ira tetenaa-Do Ue Alamami a ra'ido!”

⁴ Ka kurongeo porokodo anu mentinondoni atuu asa etu pato pulu ka opaa nsowu anu tinondoniomo inso a luwuno suku inuleno i Isaraeli.

⁵ Inso a nsuku Yehuda hopulu ka orua nsowu anu tinondoni, inso a nsuku Rube hopolu ka orua nsowu, inso a nsuku Gadi hopulu ka orua nsowu,

⁶ inso a nsuku Asere hopulu ka orua nsowu, inso a nsuku Napatali hopulu ka orua nsowu, inso a nsuku Manase hopulu ka orua nsowu,

⁷ inso a nsuku Simeo hopulu ka orua nsowu, inso a nsuku Lewi hopulu ka orua nsowu, inso a nsuku Isakari hopulu ka orua nsowu,

⁸ inso a nsuku Sebulo hopulu ka orua nsowu, inso a nsuku Yusupu hopulu ka orua nsowu, inso a nsuku Benami hopulu ka orua nsowu.

Mia hadio anu nahi pinikodoa hadiono 7:9-17

⁹ Ka i'amba umarino atuu kukitao: menteeano, aasa tepumpua langkai mia hadio anu nahi pinokodoa hadiono, inso a luwuno tongku ka suku ka pepe'etua ka pau, mpentade i arono kadera poparentaa ka i aro-Do Ana Bimba, mpelemba meloe mopute ka mpo'ini lewe palemi a ngkaedo.

¹⁰ Ka saru suara meroku mpebooli ira, ”Tekaduduia ndi Ondae Ue Alamami anu mentoro a wawo ngkadera poparentaa ka ndi Ondae Ana Bimba!”

¹¹ Ka luwuno mala'eka mpentade melimbuo kadera poparentaa ka mia mempinemota'u ka opaa anu tuwu atuu; mpenggolontu ira i arono kadera poparentaa atuu ka mpesombai Ira Ue Ala,

¹² saru mpotae, ”Ami! Po'unde-unde ka marambaa, ka ponto'ori mentee ka pontarimakasi ka pompelangkai ka pabawa ka roso tia-Do Ue Alato ranta nahina tampulaano! Ami!”

¹³ Ka asa mia inso i olodo mia mempinemota'u atuu motae ndi ongkue, ”Isemake ondae anu mpelemba meloe mopute atuu ka isuake dome'inso?”

¹⁴ Ka kupotaeakono, ”Ueku, omiu ue tumo'orio.” Ka i'amba motae ndi ongkue, ”Ondae andio onaemo luwuno mia anu mpeluarako inso a masusaa anu langkai, ka domelomboomo lemba meloedo ka dompokomoputeo a laro rea-Do Ana Bimba.

¹⁵ Onaemo pu'uno ka dompentade i arono kadera poparentaa-Do Ue Ala mekakaako Ira meene ka wongi a Raha Mempori-Do. Ka Ondae anu mentoro a wawo ngkadera poparentaa atuu Ira wileo kema-Do i wawodo.

¹⁶ Nahi ira memarasaiako mokoninggo ka mokoranga mbo'u, ka mata'oleo ke mokula ntu'u nahi ta umalu ira mbo'u.

¹⁷ Hangano Ana Bimba anu i tonga-tongano kadera poparentaa atuu, ta pakambi ira ka ta tumaate ira a mata uwoi tuwua. Ka Ondae Ue Ala Ira pahihio luwuno uwoi mata inso a matado.”