MENGKAAA 6 - Wunta Mempori

Onoo pontondoni amba-ambano inungkahi 6:1-17

¹ Ka kukitao Ana Bimba atuu umungkahio anu amba-ambano inso a opitu pontondoni atuu, ka kurongeo anu amba-ambano inso a opaa anu tuwu atuu mepau saru suara kana unino rundu, ”Aiwa!”

² Ka kukitao: menteeano, hinao aasa ngara mopute ka mia anu mesawikio mo'ini aasa pana ka ndi onae wineeako aasa ramba-ramba ulu. Ka i'amba lumako kana poponangi ka ihaweo ponangia.

³ Ka tempono Ana Bimba atuu umungkahio pontondoni anu ko'orua, kurongeo anu tuwu anu ko'orua motae, ”Aiwa!”

⁴ Ka meluarakoomo aasa ngara susua, aasa ngara motaha ka mia anu mesawikio pinoweeako pabawa ka i'alao rodoa inso i wawontolino, ranta ka domambepepate, ka ndi onae pinoweeako aasa ponai anu langkai.

⁵ Ka tempono Ana Bimba atuu umungkahio pontondoni anu ko'otolu, kurongeo anu tuwu anu ko'otolu motae, ”Aiwa!” Ka kukitao: menteeano, hinao aasa ngara mo'ito ka mia anu mesawikio mo'ini aasa pontimba a ngkaeno.

⁶ Ka kurongeo kana hinao suara i tonga-tongado opaa anu tuwu atuu motae, ”Aasa ponsa'u gandu aasa dinare olino, ka otolu ponsa'u jelai aasa dinare olino. Sine si sosa'orio lana ka anggoro atuu.”

⁷ Ka tempono Ana Bimba atuu umungkahio pontondoni anu ko'opaa, kurongeo suarano anu tuwu anu ko'opaa motae, ”Aiwa!”

⁸ Ka kukitao: Menteeano, hinao aasa ngara molowulu mongkuni ka mia anu mesawikio meneeako i Matea ka poparentaano matea tumondao. Ka ndi ondae mempinoweeako pabawa a asa ntia opaano tolino ka dompompepateako ponai, ka mokoninggoa ka haki lele, ka saru luwuno kondehora lambaha anu i tolino.

⁹ Ka tempono Ana Bimba atuu umungkahio pontondoni anu ko'olima, kukitao i totono meda pontunua pesomba luwuno sumangado anu mempinepate iramo hangano pau-Do Ue Ala ka hangano ponsakosii anu ininido.

¹⁰ Ka mpebooli ira saru suara meroku, dompotae, ”Opiapoke tehineno, oo Anu Pabawa anu mempori ka mentee, Omiu nahi pobitara ka nahi pombaloakono reamami ndi ondae anu mpo'ia i tolino?”

¹¹ Ka ndi ondae singge mia pinoweeako aasa lemba meloe mopute, ka ndi ondae pinotaeako, nine ondae asalakono mpenaa-naa mbo'u sarai ranta ka isompo doado walido mpompekakaako ka luwuno pepaekompodo, anu ira mempinepate mengkena kana ondae.

¹² Ka kukitao, tempono Ana Bimba atuu umungkahio pontondoni anu ko'onoo, menteeano gagiomo leelu anu mongkokongiri ka mata'oleo gagi mo'ito kana kampili wuu ka wula gagi motaha luwuno kana rea.

¹³ Ka anano wula i langi ntedodonta i wawontolino kana keu ara morontahi wuano anu momata, tewala ileluo angi anu mokora.

¹⁴ Ka tenonoomo langi kana paluluno wunta anu pinalulu ka tepaheomo luwuno torukuno ka togo inso a mpo'iangano.

¹⁵ Ka luwuno mokole i tolino ka anu langkai potorodo saru luwuno petewawado sorodadu, ka mia mengkaea saru mia mempabawa, ka luwuno ata saru mia maradeka mpewuni a laro luwuno kunepo ka olo-olo watu a ntorukuno.

¹⁶ Ka dompotaeako ira torukuno ka watu atuudo, ”Intehoamo dumunsi kami ka imewuni kamimo inso ndi Ondae, anu mentoro a wawo ngkadera poparentaa ka a ntekuda-Do Ana Bimba atuu.”

¹⁷ Hangano haweomo oleo langkai tekuda-Do ka isemake mokompekorahako?