MENGKAAA 5 - Wunta Mempori

Wunta anu tinondoni ka Ana Bimba 5:1-14

¹ Ka kukitao a ngkae ngkoana-Do anu mentoro a wawo ngkadera poparentaa atuu, aasa paluluno wunta, anu binuri i larono ka i bungkuno ka tinondoniako opitu pontondoni.

² Ka kukitao aasa mala'eka anu moroso, anu mebooli saru suara meroku, ipotae, ”Isemake anu tekona wileo paluluno wunta atuu ka umungkahio luwuno tondonino?”

³ Sine nahina maupo te'asa mia anu i suruga ke anu i tolino ke anu i totono tolino, anu mokowileo paluluno wunta atuu ke anu mokokitao i larono.

⁴ Ka mengese akumo tedoa mompemasusa, hangano nahina maupo te'asa mia anu pinetekona ka iwileo paluluno wunta atuu ke maupo kumitao i larono.

⁵ Ka i'amba mepauomo asa mia inso a mia mempinemota'u atuudo ndi ongkue, ”Si pengese! Menteeano, singa inso a nsuku Yehuda, onaemo tumbano i Daudi monangiomo, onaemo ka Dopokowileo paluluno wunta atuu ka umungkahio opitu tondonino.”

⁶ Ka kukitao i tonga-tongano kadera poparentaa ka opaa anu tuwu atuu ka i tonga-tongado mia mempinemota'u atuudo mentade aasa Ana Bimba ka sinumbeleomo, metandu opitu ka memata opitu: onaemo atuu opitu Penaa-Do Ue Ala anu tinena i asa wawontolino.

⁷ Ka i'amba aiwaomo Ana Bimba atuu ka tumarimao paluluno wunta atuu inso a ngkae-Do anu mentoro a wawo ngkadera poparentaa atuu.

⁸ Tempono Do'alao paluluno wunta atuu, mpenggolontu iramo opaa anu tuwu ka ruapulu ka opaa mia mempinemota'u i aro-Do Ana Bimba atuu, singge mia mo'ini aasa katapi ka aasa tonde wulaa, bukeako dupa: onaemo atuu pekakaido mia mempori.

⁹ Ka dompenaniakono aasa penani wo'ohu dompotae, ”Omiu tekona tumarimao paluluno wunta atuu ka umungkahio luwuno tondonino; hangano sinumbele Komiumo ka I'oliako iramo rea-Miu tia-Do Ue Ala inso a sompo-sompo suku ka pau ka pepe'etua ka tongku.

¹⁰ Ka Iweweu iramo gagi aasa poparentaa, ka megagi sando mpesomba tia-Do Ue Alato, ka ira mpeparenta kana mokole i tolino.”

¹¹ Ka kukitao ka rumongeo suarado hadio mala'eka liimbu kadera poparentaa, luwuno anu tuwu ka mia mempinemota'u atuudo; porokodo mapulu-pulu nsowu ka mapulu-pulu juta,

¹² dompotae saru suara meroku, ”Ana Bimba anu sinumbele atuu tekona ka Dotarimao pabawa, ka kaeaa, ka ponto'ori anu mentee, ka roso, ka pompelangkai, ka marambaa, ka po'unde-unde!”

¹³ Ka kurongeo luwuno anu tuwu i suruga ka anu i tolino ka anu i totono tolino ka anu a ntahi ka luwuno anu mekongko i larono, mpotae, ”Tia-Do anu mentoro a wawo ngkadera poparentaa ka tia-Do Ana Bimba, onaemo po'unde-unde ka pompelangkai ka marambaa ka pabawa ranta nahina tampulaano!”

¹⁴ Ka opaa anu tuwu atuu mpotae, ”Ami.” Ka mia mempinemota'u atuudo ntebangku mpenggolontu ka mpesomba.