MENGKAAA 4 - Wunta Mempori

Rua pulu ka opaa mia pinemota'u ka opaa kondehora 4:1-11

¹ Ka i'amba umarino atuu kukitao: Menteeano, aasa pewowa te'ungkahi i suruga ka suara anu i ndi'upua kurongeomo, motae ndi ongkue kana unino tawuwua, ipotae: Pewuatakomo ramai ka Aku tumisoakomu hapa anu asalakono gagi umarino andio.

² Rongaomo Dopabawai aku Penaa ka kukitaomo, hiano aasa kadera poparentaa i suruga, ka a ngkadera poparentaa atuu mentoro Asa Mia.

³ Ka Ondae anu mentoro a ngkadera poparentaa atuu tengkita kana paramata yasipisi ka paramata saradisi; ka aasa toro'ue tumutuwio kadera poparentaa atuu tekosi ntu'u kana samaru.

⁴ Ka lumimbuo kadera poparentaa atuu hinao ruapulu ka opaa kadera poparentaa, ka a luwuno kadera poparentaa atuu mpentoro ruapulu ka opaa mia pinemota'u, anu mpesangka mopute ka ramba-ramba ulu wulaa i uludo.

⁵ Ka inso a ngkadera poparentaa atuu meluarako koliki ka unino rundu anu u'uru, ka opitu pansona kolanga-langa i arono kadera poparentaa atuu: onaemo atuu opitu Penaa-Do Ue Ala.

⁶ Ka i arono kadera poparentaa atuu hinao tahi malua tami kana kerisitala; i tonga-tongano kadera poparentaa atuu ka lumimbuo hinao opaa anu tuwu bukeako mata, te'alaako i arono ka te'alaako i bungkuno.

⁷ Mongkona anu tuwu anu amba-ambano mengkena kana singa, ka anu tuwu anu ko'orua mengkena kana ana nsapi, ka anu tuwu anu ko'otolu hinao rupano kana rupano mia, ka anu tuwu anu ko'opaa mengkena kana manu-manu singko anu kontongaano menee.

⁸ Ka opaa anu mentuwu atuu singge hinao panino onoo, lumimbuo ka te'alaako i larono bukeako mata, ka saru nahi dompenaa-naa mpebooli meene ka wongi, ”Mempori, mempori, mempori Iramo Ue Ala, Anu Tedoa Pabawa, anu kongko Iramo ka anu kongko ka anu Ira hawe.”

⁹ Ka luwuno anu tuwu atuu sompo dompompesombaako po'unde-unde, ka pompelangkai ka pontarimakasi ndi Ondae, anu mentoro a wawo ngkadera poparentaa atuu ka anu tuwu ranta nahina tampulaano,

¹⁰ ka mpenggolontu iramo ruapulu ka opaa mia mempinemota'u atuudo i aro-Do anu mentoro a wawo ngkadera poparentaa atuu, ka dompesombai Ira anu tuwu ranta nahina tampulaano. Ka dompetadiakono ramba-ramba uludo i arono kadera poparentaa atuu, saru mpotae,

¹¹ ”Oo Ue ka Ue Alamami, Omiu tekona tumarimao po'unde-unde ka pompelangkai ka pabawa; hangano Ipokogagiomo luwuakoano; ka hangano po'ehe-Miu luwuno atuu hinao ka pinokogagi.”