MENGKAAA 3 - Wunta Mempori

Hawe a bawaa i Saradisi 3:1-6

¹ ”Ka buriakonomo mala'ekado bawaa i Saradisi: Ndiomo pau-Do, anu me'ueo opitu Penaa-Do Ue Ala ka opitu anano wula atuu: Kuto'orio luwuno inanggamu: omue pinotaeako tuwu, kahinaano mateko!

² Pewangumo, ka pokorosoomo hapa anu da mo'ia anu mingkiomo mate, hangano nahina maupo te'asa inso a inanggamu Kuhaweo soompo ntu'u i aro-Do Ue Ala-Ku.

³ Onaemo pu'uno pewowoloomo, ba kana'umpe utarimaomo ka rumongeo; tondaomo atuu ka tepidimo! Hangano tewala nahi upedaga-dagai, Aku hawe kana mia monako ka nahi uto'orio a tempo isuake Kumansa hawe ndi omue.

⁴ Sine i Saradisi hinao ba opia mia anu nahi domeregeio sangkado; ondae ira mpelempa saru Ongkue mpesangka mopute, hangano pototodo kanatuu.

⁵ Ba isema monangi, onae ta pinokonaako sangka mopute anu kanandio; Nahi Aku pahihio neeno inso a wunta tuwua, tendeano Aku mangakuakono neeno i aro-Do Ama-Ku ka i arodo luwuno mala'eka-Do.

⁶ Isema mebiri, po'ineeomo ka iperorongeakono hapa anu pinau-Do Penaa a luwuno bawaa.”

Hawe a bawaa i Piladepia 3:7-13

⁷ ”Ka buriakonomo mala'ekado bawaa i Piladepia: Ndiomo pau inso ndi Ondae Anu Mempori, Anu Mentee, anu uminio kunsino i Daudi; tewala Do'ungkahio, nahina mokotondoo; tewala Dotondoo, nahina moko'ungkahio.

⁸ Kuto'orio luwuno inanggamu: kitaomo, Ku'ungkahiakomumo pewowa, anu nahina maupo te'asa mia mokotondoo. Kuto'orio nine rosomu nahi te'asa hapa, sine utondao pau-Ku ka nahi uhapuo nee-Ku.

⁹ Kitaomo, ba opia mia inso a bawaano i Mosa'o, onaemo ondae anu mempauo koroido to Yahudi, sine anu menteeano komba kanandio, tendeano mpegaupi, Aku meweengako ira ndi omue. Menteeano Aku tumena ira me'aiwa ka mpenggolontu a mpuu karumu ka memangaku, nine Kupehohawako.

¹⁰ Hangano omue tumondao pau-Ku, ka upompedato sumikori Aku, ka Ongkue mbo'u Aku kumaduduiko inso a oleo po'ara-arahakoa anu ta hawe i asa wawontolino ka dome'inara-arahako anu mpo'ia i tolino.

¹¹ Aku ronga hawe. Iniomo hapa anu kongko ndi omue, ka si hina maupo te'asa mia umalao ramba-ramba ulumu.

¹² Ba isema monangi, onae Aku mokogagio karuno a laro Raha Mempori-Do Ue Ala-Ku, ka onae nahi ta meluarako mbo'u inso i tu'ai; ka ndi onae Aku burio nee-Do Ue Ala-Ku, neeno kota-Do Ue Ala-Ku, onaemo Yerusale wo'ohu, anu metii inso i suruga inso ndi Ondae Ue Ala-Ku, ka nee-Ku anu wo'ohu.

¹³ Isema mebiri, po'ineeomo ka iperorongeakono hapa anu pinau-Do Penaa a luwuno bawaa.”

Hawe a bawaa i Laodikia 3:14-22

¹⁴ ”Ka buriakonomo mala'ekado bawaa i Laodikia: Ndiomo pau inso ndi Ondae Ami, Sakosii anu metenunu ka mentee, pompu'uano inso a mpinokogagi-Do Ue Ala:

¹⁵ Kuto'orio luwuno inanggamu: omue komba morini ka komba mokula. Tedoa moiko tewala moriniko ke mokula!

¹⁶ Gaagi hangano omue melaho-laho, ka komba morini ke mokula, Aku lumuako inso a nganga-Ku.

¹⁷ Hangano motaeko: Kaea aku ka kupokokaeaomo koroiku ka nahina makuraku hapa-hapa, ka hangano nahi uto'orio, nine marasaiko, ka urasa'o, mongkokolaro, morawu ka kolambe-lambe,

¹⁸ onaemo ka Kupatuduko, ka upo'oli inso ndi Ongkue wulaa anu pinokomorinaomo a laro api, ka ugagi kaea, ka sangka mopute mbo'u, ka upokonao, ka si tengkita kolambe-lambemu anu mompokoko'ii; ka lana mbo'u lanaino matamu, ka upokompongkita.

¹⁹ Ba isema Kupehohawao, Kukuahakono ka Kusepio; onaemo pu'uno peweengakonomo aroamu ka tepidimo!

²⁰ Kitao, mentade Aku i arono pewowa ka metingko-tingko; tewala hinao mia anu rumongeo suara-Ku ka umungkahia-Kune pewowa, Aku koa mewinso tepohaweakono ka Aku mongkaa meronga saru onae, ka onae meronga saru Ongkue.

²¹ Ba isema monangi, onae Aku montoroo meronga saru Ongkue a wawo ngkadera poparentaa-Ku, kana Ongkue mbo'u monangi Akumo ka mentoro meronga saru Ondae Ama-Ku a wawo ngkadera poparentaa-Do.

²² Isema mebiri, po'ineeomo ka iperorongeakono hapa anu pinau-Do Penaa a luwuno bawaa.”