MENGKAAA 22 - Wunta Mempori

¹ Ka i'amba tumisoakune korono uwoi tuwua, anu molino kana tami, ka waa meluarako inso a ngkadera poparentaa-Do Ue Ala ka a ngkadera poparentaa-Do Ana Bimba atuu.

² I tonga-tongano batatanano kota atuu, onaemo a mompombali wiwi ngkorono atuu, hadio keu tuwua anu mewua pempulu ka orua, sompo-sompo wula pohona; ka leweno keu atuudo pinake mompokotompa luwuno tongku.

³ Ka nahi ta hina mbo'u pontutundali. Kadera poparentaa-Do Ue Ala ka kadera poparentaa-Do Ana Bimba ta kongko i larono ka luwuno tetenaa-Do ira mpesomba ndi Ondae,

⁴ ka ira mengkitao rupa-Do, ka nee-Do ta teburi a ra'ido.

⁵ Ka wongi nahi ta hina mbo'u i ra'ai, ka nahi dompongkere wantano hulu ka wantano mata'oleo, hangano Ondae Ue Ala Ira mokomewine ira, ka ira pomparenta kana mokole ranta nahina tampulaano.

Hawe-Do Ue Yesu 22:6-17

⁶ Ka Do'amba motaeakune, ”Luwuno pau andio kona ntu'u ka mentee, ka Ondae i Ue, Ue Ala anu mompowee penaa a luwuno nabi, montena Iramo mala'eka-Do ka dotisoako ira tetenaa-Do hapa anu asalakono ronga gagi.”

⁷ ”Menteeano Aku ronga hawe. Me'uraomo mia anu tumondao luwuno pinau anu ta gagi a wunta andio!”

⁸ Ka ongkue, i Yohane, ongkuemo anu rumongeo ka kumitao luwuno atuu. Ka mansaku rumongeo ka kumitao, menggolontu aku a puu ngkaruno mala'eka, anu tumisoakunemo luwuno atuu, aku mesombaio.

⁹ Sine ipotaeakune, ”Si poweweu kanandio! Ongkue onaemo ata, mengkena kana omue ka luwuno pepaekompomu, luwuno nabi ka luwudo anu mentondao luwuno pauno wunta andio. Pesombai Iramo Ue Ala!”

¹⁰ Ka i'amba motaeakune, ”Si tondonio luwuno pinau anu ta gagi inso a wunta andio, hangano rangkuomo tempono.

¹¹ Ba isema anu moweweu mosa'o, po'ineeomo ka ipoweweu mpiha mosa'o; ba isema anu mokoburu, po'ineeomo ka imokoburu mpiha, ka ba isema anu mentee, po'ineeomo ka ipoweweu mpiha menteea; ba isema anu mempori, po'ineeomo ka ipokomemporio mpiha koroino!”

¹² ”Menteeano Aku ronga hawe ka Kuwawao tambo-Ku ka isinuloako sompo mia montonda wineweuno.

¹³ Ongkuemo Alfa ka Omega, Anu Amba-ambano ka Anu Telembui, Anu Pompu'uano ka Anu Pokotompaano.”

¹⁴ Meme'ura iramo anu melomboo lemba meloedo. Ondae ira mpohawe tia a luwuno keu tuwua ka mpewinso telalo a luwuno pewowa langkai melako a laro ngkota atuu.

¹⁵ Sine luwuno dahu ka puu mposihiri, mia mebelesu, mia anu pompepate, anu mpesomba a lahumoa ka sompo mia anu kumekewoio pegaupi ka anu meleluakono, mpo'ia i bungkuno.

¹⁶ ”Ongkue, i Yesu, montena Akumo mala'eka-Ku ka dompesakosii mongkona luwuno andio ndi omue tiado bawaa. Ongkuemo tumba, onaemo inuleno i Daudi, buntala anu mewanta ntu'u.”

¹⁷ Penaa ka umbu ngkoroi beine atuu motae, ”Aiwamo!” Ka ba isema anu rumongeo, ka ipotaemo, ”Aiwamo!” Ka ba isema anu mokoranga, ka i'aiwamo, ka ba isema anu behe, ka i'alaomo mpena uwoi tuwua!

Pokotompaano 22:18-21

¹⁸ Mesakosii aku a sompo mia anu rumongeo luwuno pinau anu ta gagi inso a wunta andio, ”Tewala asa mia tumiangiakono hapa a luwuno pau andio, asalakono Ondae Ue Ala Ira tumiangiakono luwuno masolaa anu teburi a wunta andio.

¹⁹ Ka tewala asa mia hinao inoninino inso a luwuno pau a wunta pinau anu ta gagi andio, asalakono Ondae Ue Ala Ira umalao tiano inso a ngkeu tuwua ka inso a ngkota mempori, kana anu teburi a wunta andio.”

²⁰ Ondae anu mesakosii mongkona luwuno andio, mepau, ”Humbee, Aku ronga hawe!” Ami, I'aiwamo, Ue Yesu!

²¹ Pe'aroa-Do Ue Yesu kumongkomi komiu luwu! Ami.