MENGKAAA 21 - Wunta Mempori

Langi anu wo'ohu ka tolino anu wo'ohu 21:1-8

¹ Ka ku'amba kumitao langi anu wo'ohu ka tolino anu wo'ohu, hangano langi anu amba-ambano ka tolino anu amba-ambano moliuomo, ka maupo tahi nami hina mbo'u.

² Ka kukitao kota anu mempori, Yerusale anu wo'ohu, metii inso i suruga, inso ndi Ondae Ue Ala, anu meramba-ramba kana umbu ngkoroi beine anu meparakai tiano tamano.

³ Ka ku'amba rumongeo suara anu meroku inso a ngkadera poparentaa atuu motae, ”Kitaomo, kema-Do Ue Ala kongko i tonga-tongado mia ka Ira mo'ia meronga saru ondae. Ondae ira megagi bawaa-Do ka Ondae Ira gagi Ue Alado.

⁴ Ka Ira pahihio luwuno uwoi mata inso a matado, ka matea nahi ta hina mbo'u; nahi ta hina mbo'u po'inomboa, ke ponsabangi, ke pompemasusa, hangano luwuakoano anu tehine atuu telaloomo.”

⁵ Ondae anu mentoro a wawo ngkadera poparentaa atuu mepau, ”Kitaomo, Kupokogagio luwuakoano wo'ohu!” Ka pau-Do, ”Buriomo, hangano luwuno pau andio kona ntu'u ka mentee.”

⁶ Pau-Do mbo'u ndi ongkue, ”Luwuno gagiomo. Ongkuemo Alfa ka Omega, Anu Pompu'uano ka Anu Pokotompa. Mia anu mokoranga Aku moweeakono mo'inu mpena inso a mata uwoi tuwua.

⁷ Ba isema monangi, onae ta humaweo luwuno andio, ka Aku gagi Ue Alano ka onae ta gagi ana-Ku.

⁸ Sine mia medoito, mia anu nahi dompompe'ala-ala, mia memokoburu, mia anu pompepate, mia mebelesu, puu ponsihiri, anu mpesomba a lahumoa ka luwuno anu mpegaupi, ondae ira mpohawe tiado a laro ntahi anu kolanga-langa hangano api ka walira; onaemo andio matea anu ko'orua.”

Yerusale anu wo'ohu 21:9–22:5

⁹ Ka haweomo asa mia inso a opitu mala'eka anu mpo'ini opitu tonde, anu bukeako opitu masolaa poko'ariano atuu, ka i'amba motaeakune, ipotae, ”Aiwamo i ndi'ai, aku tumisoakomu umbu ngkoroi baine, umbu ngkoroi-Do Ana Bimba.”

¹⁰ Ka i'amba a laro penaa iwawa aku a wawo aasa torukuno anu langkai ka ondau ka itisoakune kota anu mempori atuu, Yerusale, metii inso i suruga, inso ndi Ondae Ue Ala.

¹¹ Kota atuu bukeako maramba-Do Ue Ala ka wantano mengkena kana paramata anu lalu tekosi, kana paramata yasapisi, molino kana tami.

¹² Ka rere watuno langkai ka ondau ka pewowa langkaino hopulu ka orua; ka i wawono luwuno pewowa langkai atuu hinao hopulu ka orua mala'eka ka i wawono teburi needo hopulu ka orua suku Isaraeli.

¹³ I sabaano oleo hinao otolu pewowa langkai ka i utara otolu pewowa langkai ka i selata otolu pewowa langkai ka i sumooano oleo otolu pewowa langkai.

¹⁴ Ka rere watuno kota atuu hinao hopulu ka orua watu empehino ka i wawono teburi hopulu ka orua needo hopulu ka orua tinena-Do Ana Bimba atuu.

¹⁵ Ka onae, anu mepauakune, hinao aasa tuko posongka inso a wulaa ta sumongkao kota atuu saru luwuno pewowa langkaino ka rere watuno.

¹⁶ Kota atuu tadeno mensiu opaa, ondauno mengkena saru maluano. Ka kota atuu isongkaakono tuko atuu: hopulu ka orua nsowu setadia; ondauno ka maluano ka mantandeno mengkena.

¹⁷ Ka i'amba sumongkao rere watuno: asa etu pato pulu ka opaa hiku, montonda posongkano mia, anu onae koa mbo'u posongkano mala'eka.

¹⁸ Rere watu atuu wineweu inso a mparamata yasapisi; ka kota atuu inso a wulaa mpena, kana tami molino.

¹⁹ Ka luwuno empehino rere watuno kota atuu rinamba-rambaako luwuno rupano paramata. Empehino anu amba-ambano watu yasapisi, empehino anu ko'orua watu nilami, empehino anu ko'otolu watu mira, empehino anu ko'opaa watu samaru,

²⁰ empehino anu ko'olima watu unami, empehino anu ko'onoo watu saradisi, empehino anu ko'opitu watu ratina cempaka, anu ko'oalu watu berili, anu ko'osio watu kerisoli, anu kohopulu watu kerisopara, anu kohopulu ka aasa watu lasuaradi ka anu kohopulu ka orua watu kesubu.

²¹ Ka hopulu ka orua pewowa langkai atuu onaemo hopulu ka orua mutiara: sompo pewowa langkai hinao aasa mutiara ka luwuno pesalaa a ngkota atuu inso a wulaa ntu'u kana tami molino.

²² Ka nahi kupongkita Raha Mempori i larono; hangano Ondae Ue Ala, Ue Anu Tedoa Pabawa, Ondae Raha Mempori, kanatuu koa mbo'u Ondae Ana Bimba atuu.

²³ Ka kota atuu nahi pongkere mata'oleo ka wula ta wantahio, hangano maramba-Do Ue Ala mokomewineo ka Ondae Ana Bimba atuu onaemo huluno.

²⁴ Ka luwuno tongku ira mpelempa a laro mewineno ka luwuno mokole i tolino mewawao kaeado ndi onae;

²⁵ ka luwuno pewowa langkaino nahi ta tinondo tempono meene, hangano wongi nahi ta hina mbo'u i ra'ai;

²⁶ ka kaeaa ka pompelangkaido luwuno tongku ta winawa ndi onae.

²⁷ Sine nahi ta mewinso i larono hapamo koa anu mokoburu, ke mia anu moweweu mokoburua ke megaupi, sine butu ondae anu needo teburi a wunta tuwua-Do Ana Bimba atuu.