MENGKAAA 20 - Wunta Mempori

Poparentaa asa nsowu ta'u 20:1-6

¹ Ka ku'amba kumitao aasa mala'eka metii inso i suruga mo'ini kunsino wingke matea ka aasa rante langkai a ngkaeno;

² irakoo naga, i ule mota'u atuu, onaemo i Mosa'o ka i Satani. Ka iponguo asa nsowu ta'u tehineno,

³ ka i'amba metadiakono a laro wingke matea, ka tumondoo wingke matea atuu ka tumondonio i wawono, ka si popo'oo ira mbo'u tongku, se'eluno napi tampula tempo asa nsowu ta'u atuu; ka i'amba umarino atuu onae ta motolao sarai.

⁴ Ka ku'amba kumita ira kadera poparentaa ka mia anu mpentoro i wawono; ndi ondae mempinoweeako pabawa ka dompobitara. Kukita ira mbo'u sumangado, anu me'inimpahiomo uludo hangano ponsakosii mongkona Ondae i Yesu ka hangano pau-Do Ue Ala; anu nahi pesombaio kondehora atuu ka tinahano ka anu nahi hori montarima pontondoni a ra'i ka a ngkaedo; ka wali ira mentuwu ka pomparenta kana mokole meronga saru Ondae i Kerisituu tiano tempo asa nsowu ta'u.

⁵ Sine mia memate anu mehano nahi dompewangu se'eluno napi tampula tempo anu asa nsowu ta'u atuu. Onaemo andio pewangua amba-ambano.

⁶ Me'uraomo ka memporiomo onae, anu mohawe tia a mpewangua amba-ambano atuu. Matea anu kompenduano nahina mbo'u pabawano ndi ondae, sine ira megagi sando mpesomba-Do Ue Ala ka i Kerisituu, ka ira mpomparenta kana mokole meronga saru Ondae, asa nsowu ta'u tehineno.

I Mosa'o hinuku 20:7-10

⁷ Ka mansano tampulaomo tempo asa nsowu ta'u atuu, i Mosa'o ta pinotola inso a torungkuno,

⁸ ka onae ta lumako mopo'oo ira tongku a opaa siuno tolino, onaemo Goge ka Magoge, ka pumpu ira ka dompetea ka porokodo mengkena saru hadiono one a ntahi.

⁹ Ka mpewuatako iramo i asa wawontolino, ka do'amba mengkaduo pekemaado sorodadudo mia mempori ka kota anu pinehohawa atuu. Sine inso i langi metiiomo api mokomo'ai ira,

¹⁰ ka i Mosa'o, anu mopo'oo ira, pinetadiako a laro ntahi api ka walira, onaemo po'iangano kondehora ka nabi megaupi atuu, ka binobarasai ira meene wongi ranta nahina tampulaano.

Pohuku anu pokotompa 20:11-15

¹¹ Ka ku'amba kumitao aasa kadera poparentaa mopute anu langkai ka Ondae, anu mentoro i wawono. Inso i aro-Do moliuomo tolino ka langi ka nami hinawe mbo'u po'iangano.

¹² Ka kukita ira mia memate, langkai ka kodei, mpentade i arono kadera poparentaa atuu. Ka i'amba winile luwuno wunta. Ka winile mbo'u aasa wunta susua, onaemo wunta tuwua. Ka mia memate binitara montonda wineweudo, me'empehiako hapa anu hinao teburi i larono wunta atuudo.

¹³ Ka tahi meweengako ira mia memate anu mekongko i larono, ka matea ka poparentaano matea meweengako ira mia memate anu kongko i larono, ka ondae mebinitara singge mia montonda wineweuno.

¹⁴ Ka i'amba matea ka poparentaano matea atuu pinetadiako iramo a laro ntahi api. Onaemo atuu matea anu ko'orua: tahi api.

¹⁵ Ka sompo mia anu nahi hinawe neeno teburi a wunta tuwua atuu, onae pinetadiako a laro ntahi api atuu.