MENGKAAA 2 - Wunta Mempori

Hawe a bawaa i Epesu 2:1-7

¹ ”Buriakonomo mala'ekado bawaa i Epesu: Ndiomo pau inso ndi Ondae, anu mo'ini opitu anano wula atuu a ngkae ngkoana-Do ka melempa i olodo opitu karuno hulu wulaa atuu.

² Kuto'orio luwuno inanggamu: moiko pe'iseimu maupo pompedatomu. Kuto'orio, nine nahi upokompeteao aroamu a mia anu me mosa'o, nine u'ara-arahako iramo mia anu mempauo koroido tinena, sine anu menteeano komba kanandio, nine uhawe iramo mpegaupi.

³ Ka kongkomu mpiha sabara ka tebobarasai hangano nee-Ku; ka nahi uponto'ori mokendo.

⁴ Sine maupo kanandio Kutatako, hangano ubintaomo pompehohawamu anu amba-ambano.

⁵ Onaemo pu'uno pewowoloomo tedontakomo tedoa ondalo! Tepidimo ka weweuomo mbo'u hapa anu wineweumu amba-ambano. Tewala nahi kanandio, Aku aiwa ndi omue ka Aku umalao karuno hulumu inso a mpo'iangano, tewala nahi utepidi.

⁶ Sine ndio anu kongko ndi omue, onaemo u'o'aliaakono luwuno wineweudo anu mentondao i Nikolau, anu Ku'o'aliaakono mbo'u.

⁷ Isema mebiri, po'ineeomo ka iperorongeakono hapa anu pinau-Do Penaa a luwuno bawaa: Ba isema monangi, onae Aku moweeakono ka ipongkaa inso a ngkeu tuwua anu kongko a Bonde Paradesi-Do Ue Ala.”

Hawe a bawaa i Semirina 2:8-11

⁸ ”Ka buriakonomo mala'ekado bawaa i Semirina: Ndiomo pau inso Anu Amba-ambano ka Anu Pokotompaano, anu mate Iramo ka wali tuwu:

⁹ Kuto'orio pinemasusamu ka mongkokolaromu – sine kaeako – ka pomposebedo, anu mempauo koroido to Yahudi, sine anu menteeano komba kanandio: tendeano ondaemo bawaano i Mosa'o.

¹⁰ Si doitoakono hapa anu asalakono kotebobarasaiako! Menteeano i Mosa'o ta metadiako ira ba opia mia inso i olomiu a laro torungku ka ime'inara-arahako ka komiu mpohawe masusaa hopulu oleo tehineno. Petenunumo ranta mate, ka Aku moweeakomu ramba-ramba ulu tuwua.

¹¹ Isema mebiri, po'ineeomo ka ipomperorongeako hapa anu pinau-Do Penaa a luwuno bawaa: Ba isema monangi, onae nahi ta marasai hapa-hapa a matea anu kompenduano.”

Hawe a bawaa i Peregamusu 2:12-17

¹² ”Ka buriakonomo mala'ekado bawaa i Peregamusu: Ndiomo pau-Do, anu mompake ponai anu montaso ka memata orua;

¹³ Kuto'orio ba isua upo'ia, onaemo i ra'ai, a mpo'iangano kadera poparentaano i Mosa'o; ka omue me'ini a nee-Ku, ka komba uhapuo pompe'ala-alamu ndi Ongkue, naahi koa mbo'u a tempono i Antipasi, sakosii-Ku, anu metenunu ndi Ongkue, anu pinepate i aromiu, a mpo'iangano i Mosa'o.

¹⁴ Sine Ongkue hinao ba opia nahi Kupemoikoo ndi omue: i olomiu hinao ba opia mia anu tumondao pompaguruno i Bilea, anu mompauakono i Bala ka ipopo'oo ira to Isaraeli, ka domengkaano pesomba a lahumoa ka mponsosabo.

¹⁵ Kanandio koa mbo'u hinao ndi omue mia anu mpe'ini a pompagurudo anu mpetonda ndi Nikolau.

¹⁶ Onaemo pu'uno tepidimo! Tewala nahi kanandio, Aku koa ronga aiwa ndi omue ka Aku meteaako ira mompake ponai anu a nganga-Ku andio.

¹⁷ Isema mebiri, po'ineeomo ka iperorongeakono hapa anu pinau-Do Penaa a luwuno bawaa: Ba isema monangi, ndi onae Aku moweeakono inso a manna anu tewuni; ka Aku moweeakono watu mopute, anu i wawono teburi nee wo'ohu, anu nahi to'orio maupo isema, sangkadio anu tumarimao.”

Hawe a bawaa i Tiatira 2:18-29

¹⁸ ”Ka buriakonomo mala'ekado bawaa i Tiatira: Ndiomo pau-Do Ana-Do Ue Ala, anu mata-Do kana langano api ka karu-Do kana mala:

¹⁹ Kuto'orio luwuno inanggamu: moiko pompehohawamu maupo pompe'ala-alamu, moiko pompekakaakomu maupo pompedatomu. Kuto'orio, nine anggaamu anu pokotompa hadioopo sekono anu amba-ambano.

²⁰ Sine Kutatako, hangano upo'ineeo beine i Isebeli, anu pauo koroino nabi beine, mompaguru ka mopo'oo ira tetenaa-Ku ka domponsosabo ka mpongkaa luwuno pesomba a lahumoa.

²¹ Ka Kupoweeakonomo tempo ka itepidi, sine nahi behe tepidi inso a ponsosabono.

²² Kitaomo, Aku metadiakono a wawo mpoturiano mia mahaki ka ondae anu mponsosabo saru onae Aku metadiako ira a laro masukaraa langkai, tewala nahi dontepidi inso a luwuno wineweuno beine atuu.

²³ Ka luwuno anano Aku mepate ira ka luwuno bawaa ira mento'orio, nine Ongkuemo anu paresao laro aroa ka aroano mia, ka nine Aku mombalo ndi omiu sompo mia montonda wineweuno.

²⁴ Sine ndi omiu, onaemo luwuno mia susua i Tiatira, anu nahi tondao pompaguru atuu ka anu nahi pepenteeo hapa anu pinaudo penggoeno i Mosa'o, ndi omiu Kupepau: Nahi Kubehe mopotembiakomiu tembia susua.

²⁵ Sine hapa anu hina ndi omiu, ime'iniomo atuu ranta ka Kuhawe.

²⁶ Ka ba isema monangi ka weweuo anggaa-Ku hawe pokotompaano, ndi onae Aku weeakono pabawa a luwuno tongku,

²⁷ ka onae ta parentaako ira tuko labu; ondae ira mempinuro kana kuro witano puu ponsuu – mengkena kana anu tinarima-Ku inso ndi Ondae Ama-Ku –

²⁸ ka ndi onae Aku weeakono buntala.

²⁹ Isema mebiri, po'ineeomo ka iperorongeakono hapa anu pinau-Do Penaa a luwuno bawaa.”