MENGKAAA 19 - Wunta Mempori

Penani a tedontano Babeli 19:1-5

¹ Ka i'amba umarino atuu kurongeo kana suara anu meroku inso a tepumpua langkai mia hadio i suruga, dompotae, ”Haleluya! Tekaduduia ka marambaa ka pabawa onaemo ndi Ondae Ue Alato,

² hangano mentee ka moleo luwuno pobitaraa-Do, hangano Ondaemo anu bitarao mia belesu ntu'u atuu, anu sumolangio tolino hangano poweweuno mokoburu; ka Ondaemo anu mombaloakono reado tetenaa-Do a mia belesu atuu.”

³ Ka anu kompenduano dompotae, ”Haleluya! Oo, ahuno mewuatako hawe nahina tampulaano.”

⁴ Ka rua pulu ka opaa mia mempinemota'u ka opaa anu tuwu atuu mpenggolontu ka mpesombai Ira Ue Ala anu mentoro a wawo ngkadera poparentaa atuu, ka dompotae, ”Ami, Haleluya.”

⁵ Ka terongeomo aasa suara inso a ngkadera poparentaa atuu, ”Unde-unde Iramo Ue Alato, hei omiu luwuno tetenaa-Do, omiu anu medoitoako Ira, moiko kodei maupo langkai!”

Pelimbua petaoa-Do Ana Bimba 19:6-10

⁶ Ka ku'amba rumongeo kana suarano mia hadio a tepumpua langkai, kana unino lolowi ka kana u'uruno rundu anu meroku, dompotae, ”Haleluya! Hangano Ondae i Ue, Ue Alato, Anu Tedoa Pabawa, gagi Iramo mokole.

⁷ Aiwamo tompo'unde ka mengkokora-kora memawongko, ka melangkai Ira! Hangano oleo petaoa-Do Ana Bimba haweakoomo, ka umbu ngkoroi-Do tetindaomo.

⁸ Ka ndi onae pinoweeako ka ipompokona sawu lena alusu anu tesosangkilo ka anu mopute ntu'u!” [Lena alusu onaemo luwuno wineweu anu mentee inso a luwuno mia mempori.]

⁹ Ka i'amba motaeakune, ”Buriomo: Meme'ura iramo anu me'inolu a mpelimbua petaoa-Do Ana Bimba.” Ipotaeakune mbo'u, ”Pau andio mentee, luwuno pau inso ndi Ondae Ue Ala.”

¹⁰ Ka menggolontu akumo a mpuu karuno aku mesombaio, sine ipotaeakune, ”Si poweweu kanandio! Ongkue ata koa, mengkena saru omue ka luwuno pepaekompomu, anu uminio ponsakosii-Do i Yesu. Pesombai Iramo Ue Ala! Hangano ponsakosii-Do i Yesu onaemo penaa mompau anu ta gagi.”

Pau-Do Ue Ala 19:11-16

¹¹ Ka ku'amba kumitao suruga te'ungkahi: menteeano, hinao aasa ngara mopute; ka Ondae anu mesawikio meneeako: Anu Metenunu ka Anu Mentee, moleo Dopobitara ka metea.

¹² Ka mata-Do kana langano api ka a wawo ulu-Do hadio ramba-ramba ulu ka ndi Ondae hinao teburi aasa nee anu nahina tumo'orio maupo te'asa mia, sangkadio Ondae isa'a.

¹³ Ka Ondae mompokona lemba meloe anu inemoomo a rea ka nee-Do onaemo, ”Pau-Do Ue Ala.”

¹⁴ Ka luwuno sorodadu anu i suruga mentonda Ira; ondae mpesawi a ngara mopute ka mpopokona lena alusu anu mopute ntu'u.

¹⁵ Ka inso a nganga-Do meluarakoomo aasa ponai montaso anu ta numangio luwuno tongku. Ka Ira pakambiako ira tuko labu ka Ira momporo'i anggoro a mpogilia anggoro, onaemo bamburuno tekuda-Do Ue Ala, Anu Tedoa Pabawa.

¹⁶ Ka a lemba meloe-Do ka pa'a-Do teburi aasa nee, onaemo, ”Mokoledo luwuno mokole ka Ue i wawono luwuno ue.”

Kondehora saru nabino ninangi 19:17-21

¹⁷ Ka ku'amba kumitao aasa mala'eka mentade a laro mata'oleo ka onae mebooli saru suara meroku a luwuno manu-manu anu mpenee i tonga-tongano langi, ipotae, ”Ime'aiwamo i ndi'ai ka impepumpumo ka impetonda a mpelimbua-Do Ue Ala, pelimbua anu langkai,

¹⁸ ka imengkaano baudo luwuno mokole ka baudo luwuno tadulako ka baudo luwuno pongkiari ka baudo luwuno ngara ka baudo luwuno anu mpesawikio ka baudo luwuno mia, moiko anu maradeka ke maupo ata, moiko anu kodei maupo anu langkai.”

¹⁹ Ka kukitao kondehora atuu ka luwuno mokole i tolino saru luwuno sorodadudo mpepumpu iramo ira mpoweweu peteaa umewaio Anu Mesawi a ngara atuu ka sorodadu-Do.

²⁰ Ka kona rakoomo kondehora atuu ka meronga saru onae nabi megaupi, anu mompokohinaomo hadio petondoni i arono matano, ka hangano kanandio ipopo'oo ira anu mpontarima iramo pontondoni inso a ngkodehora atuu ka anu mpesombaiomo tinahano. Oruano pinetadiako tuwu-tuwu a laro ntahi api anu kolanga-langaako walira.

²¹ Ka luwuno mia susua mempinepateako ponai, anu meluarako inso a nganga-Do Anu Mesawi a ngara atuu; ka luwuno manu-manu memowohiako baudo.