MENGKAAA 18 - Wunta Mempori

Tedontano Babeli 18:1-20

¹ Ka i'amba umarino atuu kukitao aasa mala'eka susua metii inso i suruga. Onae hinao pabawa langkai ka tolino gagi mewineako marambano.

² Ka ipebooli saru suara anu meroku, ipotae, ”Tebangkuomo, tebangkuomo Babeli, kota langkai atuu, ka onae gagiomo po'iangado onitu nsa'o ka pewuniado luwuno penaa mokoburu ka pewuniado luwuno manu-manu anu mokoburu ka anu ino'aliaako,

³ hangano luwuno tongku mpo'inu iramo inso a anggoro po'eheno aroa belesuno ka luwuno mokole i tolino mpebelesu iramo saru onae, ka anu mpebalu-balu i tolino mengkaeaako iramo mare'eno po'eheno aroano.”

⁴ Ka ku'amba rumongeo suara susua inso i suruga motae, ”Imelakomo, hei bawaa-Ku, imelakomo inso ndi onae ka si mpo'ala tia a luwuno halano, ka si saru omiu inaluno luwuno masolaano.

⁵ Hangano luwuno halano tehowuomo hawe i langi, ka Dopewowoloo Ue Ala luwuno mosa'ono.

⁶ Pombalomo ndi onae, mengkena kana onae mbo'u mombalo, ka weeakonomo meluka mpendua montonda inanggano, saloakonomo meluka mpendua a laro tonde ponsaloano;

⁷ poweeakonomo pobobarasai ka po'inombo, montonda hadiono marambaa ka mare'ea, anu i hinaweno. Hangano ipotae i laro aroano: Mentoro aku a ngkadera poparentaa kana mokole beine, ongkue komba tuwu beine, ka nahi aku hori mo'inombo.

⁸ Onaemo pu'uno luwuno marasaiano ta hawe i larono aasa oleo, onaemo haki lele ka po'inombo ka mokoninggoa; ka onae ta tinunu a api, hangano Ondae Ue Ala, anu bitarao, moroso Ira.”

⁹ Ka luwuno mokole i tolino, anu mpoweweu iramo mokoburu ka mentuwu a laro mare'ea saru onae, ira mpengeseio ka mensabangio, tewala domengkitao ahuno api anu tumunuo.

¹⁰ Ira mpentade ola-olai hangano medoitoakono bobarasaino ka ira mpotae, ”Masola, masolako, hei kota anu langkai, Babeli, hei kota anu moroso, hangano i larono asa langku koa kontongaanomo ubinitara!”

¹¹ Ka anu mpebalu-balu i tolino mpengese ka mpo'inombo hangano onae, hangano nami hina mbo'u mia anu mo'oli balu-baludo,

¹² onaemo balu-balu me'inasa inso a wulaa ka salaka, paramata ka mutiara, lena alusu ka sawu wungo, sabe ka sawu kirimisi, mperupa-rupa balu-balu inso a ngkeu anu mana mo'ahi woono, mperupa-rupa balu-balu inso a ntindu, mperupa-rupa balu-balu inso a ngkeu anu masuli olino, inso a mala, labu ka puala,

¹³ kuli ngkeu mo'ahi ka rampa-rampa, mina-mina, mire ka dupa, anggoro, lana, tarigu motutu ka gandu, sapi, bimba, ngara ka kareta, ata ka maupo penaano mia.

¹⁴ Ka ira mpotae, ”Tampulaomo wua ngkeu anu ineheno aroamu, ka luwuno anu mangkilo ka tekosi tetadiomo inso ndi omue, ka nahi ta hinawe mbo'u.”

¹⁵ Ondae anu mpo'asa balu-balu atuu, anu megagi ira mengkaea hangano onae, ira mpentade ola-olai hangano medoitoakono bobarasaino, ka kontongaado mpengese ka mponsabangi,

¹⁶ dompotae, ”Masola, masola, kota langkai, anu mesangka lena alusu, ka sawu wungo ka sawu kirimisi, ka anu rinamba-rambaako wulaa, ka paramata ka mutiara, hangano i larono asa langku koa kaeaa hadio atuu tampulaomo.”

¹⁷ Ka sompo anu wawao kapala ntahi ka anu mensumomba ka luwuno anu mpo'angga a ngkapala ka luwuno mia anu po'ungkeano i tahi, mpentade ola-olai,

¹⁸ ka mpebooli, tempono domengkitao ahuno api anu tumunuo, dompotae, ”Kota isuake anu mengkena saru kota langkai andio?”

¹⁹ Ka mporawo ira pampawu a wawo uludo ka mpebooli, kontongaado mpengese ka mposabangi, dompotae, ”Masola, masola, kota langkai, anu hangano onae luwuno mia, anu hinao kapalano a ntahi, gagiomo kaea hangano balu-baluno anu masuli olino, hangano i larono asa langku koa tampulaomo.

²⁰ Impo'undeakonomo, hei suruga, ka omiu, hei luwuno mia mempori, luwuno tinena ka luwuno nabi, hangano Ondae Ue Ala mompotii Iramo pohuku ndi onae hangano omiu.”

Babeli nahi ta mewangu mbo'u 18:21-24

²¹ Ka aasa mala'eka anu moroso, tumandeo aasa watu kana langkaino watu pogili, ka i'amba metadiakono a laro ntahi, ipotae, ”Kanandiomo Babeli, kota langkai atuu, ta pinetadiako meroku i totono, ka onae nahi ta hinawe mbo'u.

²² Ka suarado anu mpemae katapi ka anu mpenani, ka anu pompuuri siloli ka tawuwua, nahi ta teronge mbo'u i laromu, ka asa mia anu pande ntu'u a laro aasa pepalindoa nahi ta hinawe mbo'u i laromu, ka unino pogilia nahi ta teronge mbo'u i laromu.

²³ Ka wantano hulu nahi ta mepansari mbo'u i laromu, ka suarano umbu ngkoroi tama ka umbu ngkoroi beine nahi ta teronge mbo'u i laromu. Hangano puu mpebalu-balumu onaemo luwuno anu langkai potorodo i tolino, hangano ponto'ori sihirimu luwuno tongku pinopo'oo.”

²⁴ Ka i larono hinawe reado nabi ka mia memempori ka reado luwuno mia, anu mempinepate i tolino.