MENGKAAA 17 - Wunta Mempori

Babeli binitara 17:1-18

¹ Ka i'amba haweomo asa mia inso a opitu mala'eka, anu mpowawa opitu tonde atuu ka motae ndi ongkue, ”Aiwa i ndi'ai, aku tumisoakomu pomputusi a mia tedoa belesu, anu mentoro a mpo'ianga anu hadio uwoino.

² Hadio mokole i tolino mpebelesu iramo saru onae, ka anu mpo'ia i tolino memolanguako iramo anggoro pebelesuno.”

³ A laro Penaa Dowawa aku i pada one. Ka kukitao aasa beine mesawi a wawo aasa kondehora anu motaha wungo, anu buke teburiako nee pompepaukiako. Kondehora atuu hinao opitu uluno ka hopulu tanduno.

⁴ Ka beine atuu mesangka sawu wungo ka sawu kirimisi anu rinamba-rambaako wulaa, paramata ka mutiara, ka a ngkaeno hinao aasa tonde wulaa bukeako luwuno mokoburua ka mokoburuno pebelesuno.

⁵ Ka a ra'ino teburi aasa nee, aasa rahasia, ”Babeli langkai, inedo beine mebelesu ka inso a mokoburuno tolino.”

⁶ Ka kukitao beine atuu molanguako reado mia mempori ka reado sakosii-Do i Yesu. Ka tempono kukitao, tedoa aku kohali-hali.

⁷ Ka i'amba motae mala'eka atuu ndi ongkue, ”Tembio ka ukohali-hali? Aku pauakomu rahasiano beine atuu ka rahasiano kondehora anu pesawiano, kondehora anu me'ulu opitu ka metandu hopulu atuu.

⁸ Ka kondehora anu ukitaomo atuu, hinaomo, sine nahina, onae ta mesabaako inso a wingke matea, ka onae te'aro a matea. Ka ondae anu mpo'ia i tolino, onaemo ondae anu nahi donteburi a wunta tuwua mompu'u ipinokogagi wawontolino, ira mengkohali-hali, tewala domengkitao, nine kondehora atuu hinaomo, sine nahina, ka ta mesabaako mbo'u.

⁹ Anu kinere i ndi'ai onaemo akala anu hinao ponto'ori mentee: opitu ulu atuu onaemo opitu torukuno, anu i wawono mentoro beine atuu,

¹⁰ anu opitu onaemo opitu mbo'u mokole: olima i olodo ntedonta iramo, anu aasa kongko ka anu susua napi hawe, ka tewala hawe, onae ta mo'ia sarai koa.

¹¹ Ka kondehora anu horio hina ka anu kanandio-andio nahina atuu, onae isa'a mokole onaemo mokole ko oalu ka maupo kanandio aasa inso anu opitu atuu ka onae te'aro a matea.

¹² Ka hopulu tandu anu ukitaomo atuu onaemo hopulu mokole, anu napi dompompu'u mpomparenta, sine asa langku tehineno ira mpontarima pabawa kana mokole, mperonga saru kondehora atuu.

¹³ Aasa luwu aroado mpeweengakono roso ka pabawado a ngkondehora atuu.

¹⁴ Ondae ira mpetea umewai Ira i Ana Bimba. Sine i Ana Bimba ta numangi ira, hangano Ondaemo Ue i wawono luwuno ue ka Mokole i wawono luwuno mokole. Ira koa mperonga mbo'u saru Ondae mponangi, onaemo ondae anu mempinoboi, anu mebininiki iramo ka anu mpetenunu.”

¹⁵ Ka i'amba motaeakune, ”Luwuno uwoi anu ukitaomo, i sua ipentoro beine belesu atuu, onaemo luwuno tongku ka hadio palili ka suku ka pau.

¹⁶ Ka hopulu tandu anu ukitaomo atuu saru kondehora atuu ira me'o'aliaakono beine belesu atuu ka ira meweweuo gagi boni-boni ka kolambe-lambe, ka ira mengkaano bauno ka ira mentunuo a api.

¹⁷ Hangano Dopokomewineomo Ue Ala aroado ka domeweweuo po'ehe-Do saru ntepo'asa aroa ka dompeweengakono poparentaado a ngkondehora atuu, ranta luwuno pau-Do Ue Ala inihiiomo.

¹⁸ Ka beine anu ukitaomo atuu, onaemo kota langkai anu meparenta a luwuno mokole i tolino.”