MENGKAAA 16 - Wunta Mempori

Opitu masolaa 16:1-21

¹ Ka kurongeo suara meroku inso a laro Raha Mempori motaeako ira mala'eka opitu atuu, ”Imelakomo ka ime'uwuomo opitu tonde tekuda-Do Ue Ala atuu i wawontolino.”

² Ka lumakoomo mala'eka anu ko'aasa ka i'uwuo tondeno i wawontolino; ka mesabaakoomo kamba anu lambaha ka anu ira memasolaako luwuno mia anu hinao tondonino inso a ngkodehora atuu ka anu mpesomba a ntinahano.

³ Ka mala'eka anu ko'orua umuwuo tondeno a wawo ntahi; onaemo ka igagi rea uwoino, kana reano mia mate ka memate iramo luwuno anu hinao penaano, anu mentuwu i laro ntahi.

⁴ Ka mala'eka anu ko'otolu umuwuo tondeno a wawo luwuno korono ka luwuno mata uwoi, ka luwuno gagi rea.

⁵ Ka kurongeo mala'eka anu pabawaio uwoi atuu motae, ”Moleo Komiu, Omiu anu ndio ka anu ndio Komiumo, Omiu anu mempori, anu motiio pohuku andio.

⁶ Hangano dome'uwuomo reado mia mempori ka luwuno nabi, Omiu mbo'u moweeako iramo rea ka dome'inuo; mongkona atuu tekona ndi ondae!”

⁷ Ka kurongeo meda pontunua pesomba atuu motae, ”Oo Ue, Ue Ala, Anu Tedoa Pabawa, mentee ka moleo luwuno pobitara-Miu.”

⁸ Ka mala'eka anu ko'opaa umuwuo tondeno a wawo mata'oleo, ka ndi onae pinoweeako pabawa ka mia ipokomo'aiako ira api.

⁹ Ka mia pinokomo'aiako mokulano api anu mongkokongiri, ka dompepaukiakono nee-Do Ue Ala anu pabawaio luwuno marasaia atuu ka nahi dontepidi ka dompelangkai Ira.

¹⁰ Ka mala'eka anu ko'olima umuwuo tondeno a wawo ngkadera poparentaano kondehora atuu ka poparentaano gagi wongi-wongi, ka domengkikio elodo hangano mpompemahaki,

¹¹ ka dompepaukiako Ira Ue Ala anu i suruga hangano mpompemahaki ka hangano pihodo, sine nahi dontepidi inso a luwuno wineweudo.

¹² Ka mala'eka anu ko'onoo umuwuo tondeno a wawo ngkorono anu langkai, koro Eparata, ka i'amba mo'areomo uwoino, ka itetindamo pesalaado luwuno mokole anu me'aiwa inso i sabaano oleo.

¹³ Ka kukitao inso a ngangano naga ka inso a ngangano kondehora ka inso a ngangano nabi megaupi atuu meluarako otolu penaa mokoburu anu kana tumpa.

¹⁴ Ondaemo atuu penaado onitu anu mpopokohina luwuno wineweu kinohali-haliako, ka domelako ntepohaweako ira mokole i asa wawontolino, ka dopumpu ira tiano peteaa a oleo langkai, onaemo oleo-Do Ue Ala Anu Tedoa Pabawa.

¹⁵ ”Kitaomo, hawe Aku kana anu monako. Me'uraomo onae, anu medaga-dagai ka anu mekakaakono sangkano, ka si pelempa kolambe-lambe ka si tengkita anuno.”

¹⁶ Ka i'amba pumpu ira a mpo'ianga, anu a mpau Ibarani nineeako Harmagedon.

¹⁷ Ka mala'eka anu ko'opitu umuwuo tondeno i laro meene. Ka inso a laro Raha Mempori terongeomo suara anu meroku inso a ngkadera poparentaa atuu, ipotae, ”Umariomo wineweu.”

¹⁸ Ka mepansariomo koliki ka u'uruomo unino rundu, ka gagiomo leelu anu mongkokongiri kana napi hori gagi mompu'u ihina mia i wawontolino. Tedoa mokora leelu atuu.

¹⁹ Ka i'amba tebansiomo kota langkai atuu gagi otolu ntia ka mentehoa iramo kotado luwuno tongku anu nahi domento'ori Ira Ue Ala. Ka Dorambeo Ue Ala Babeli anu langkai atuu ka Dopoweeakono tonde anu bukeako anggoro bamburuno tekuda-Do.

²⁰ Ka luwuno togo moliu, ka torukuno nami domehinawe mbo'u.

²¹ Ka usa seru baku langkai, mobeano limapulu kilo, tedonta inso i langi modunsi mia, ka mia mepaukiako Ira Ue Ala hangano masolaako usa seru baku atuu, hangano masolaa atuu tedoa mongkokongiri.