MENGKAAA 15 - Wunta Mempori

Penanido anu mponangi 15:1-4

¹ Ka kukitao aasa petondoni susua i langi, langkai ka kinohali-haliako: opitu mala'eka saru opitu masolaa poko'ariano, hangano saru atuu tompaanomo tekuda-Do Ue Ala.

² Ka kukitao aasa kana tahi tami malua mesalo api, ka i wiwino tahi tami malua atuu mentade ira mia anu menangiomo kondehora atuu ka tinahano ka doano neeno. Ndi ondae hinao katapi-Do Ue Ala.

³ Ka dompenaniako penanino i Musa, tetenaa-Do Ue Ala, ka penani-Do i Ana Bimba, unino, ”Langkai ka kinohali-haliako inangga-Miu, oo Ue, Ue Ala, Anu Tedoa Pabawa! Moleo ka mentee luwuno pesalaa-Miu, oo Mokoleno luwuno tongku!

⁴ Isemake nahi doito, oo Ue, ka anu nahi pelangkaio nee-Miu? Hangano butu Omiu anu mempori; hangano luwuno tongku ira me'aiwa mpenggolontu mpesombai Komiu, hangano mengkaaomo menteeno luwuno pobitara-Miu.”

Opitu mala'eka saru opitu tonde tekuda-Do Ue Ala 15:5-8

⁵ Ka i'amba umarino atuu kukitao mia umungkahio Raha Mempori – kema ponsakosii – i suruga.

⁶ Ka opitu mala'eka saru opitu masolaa atuu, meluarako inso a Raha Mempori, mesangka lena anu mopute morina ka tesosangkilo ka radano mewewesiako peboo ntonga inso a wulaa.

⁷ Ka aasa inso a opaa anu tuwu atuu moweeako ira opitu mala'eka atuu opitu tonde inso a wulaa anu buke me'ihi tekuda-Do Ue Ala, onaemo Ondae Ue Ala anu tuwu ranta nahina tampulaano.

⁸ Ka Raha Mempori atuu ibuketio ahu hangano maramba-Do Ue Ala ka hangano pabawa-Do, ka maupo te'asa mia nahi pokompewinsokio Raha Mempori atuu, se'eluno napi tampula opitu masolaa inso a mala'eka opitu atuu.