MENGKAAA 14 - Wunta Mempori

Ana Bimba ka mia tumonda Ira anu tinolosi-Do 14:1-5

¹ Ka kukitao: menteeano, i Ana Bimba mentade Ira i pongku Sioni ka meronga saru Ondae asa etu ka pato pulu ka opaa nsowu mia ka a ra'ido teburi nee-Do ka nee-Do Ama-Do.

² Ka kurongeo aasa suara inso i langi kana unino lolowi ka kana u'uruno rundu anu mongkokongiri. Ka suara anu rinongeku atuu kana unino anu mpemae katapi mpemaeakono katapido.

³ Dompenaniakono aasa penani wo'ohu i arono kadera poparentaa ka i arodo opaa anu tuwu ka mia mempinemota'u atuudo, ka nahina maupo te'asa mia anu mokompepaguruakono penani atuu sangkadio mia asa etu pato pulu ka opaa nsowu anu mentinolosi iramo atuu inso i tolino.

⁴ Ondaemo mia anu nahi domengkokoburutiakono beine koroido, hangano memempori ira kana ana beine moondo. Ondaemo mia anu mentonda Ira i Ana Bimba atuu ba isuamo koa Dolako. Ondae mentinolosi inso i olodo mia kana pesomba amba-ambano tia-Do Ue Ala ka tia-Do i Ana Bimba atuu.

⁵ Ka a laro ngangado nahina pegaupi; nahina tataado.

Pompopoto'ori mongkona pobitaraa 14:6-13

⁶ Ka kukitao aasa mala'eka susua menee i tonga-tongano langi ka ndi onae hinao Lele Mawongkoa anu nahina tampulaano ka ipaleleako ira anu mpo'ia i wawontolino ka a luwuno tongku ka suku ka pau ka pepe'etua,

⁷ ka ipebooli saru suara meroku, ”Imedoitoako Iramo Ue Ala ka ipelangkai Iramo, hangano haweomo tempo pobitaraa-Do, ka impesombai Iramo anu mokogagio langi ka tolino ka tahi ka luwuno mata uwoi.”

⁸ Ka aasa mala'eka susua, mala'eka ko'orua, tumonda lembuio ka ipotae, ”Tebangkuomo, tebangkuomo Babeli, kota langkai atuu, anu luwuno tongku ipokomolanguakonomo anggoro po'eheno aroa belesuno.”

⁹ Ka aasa mala'eka susua, mala'eka ko'otolu, tumonda lembui ira, ka mepau saru suara meroku, ”Tewala asa mia mesombaio kondehora ka tinaha atuu, ka montarima pontondoni a ra'ino ke a ngkaeno,

¹⁰ asalakono onae ta mo'inu anggoro tekuda-Do Ue Ala, anu pinatinda nahina salono a ntonde tekuda-Do; ka onae ta binobarasaiako api ka walira i arono matado mala'eka mempori ka i arono mata-Do Ana Bimba.

¹¹ Ka ahuno api anu bobarasai ira atuu mewuatako i wawono hawe nahina tampulaano, ka meene wongi nahi dompenaa-naa binobarasai, onaemo ondae anu mpesombaio kondehora saru tinaha atuu, ka ba isema anu montarimaomo tondonino neeno.”

¹² Anu kinere i ndi'ai onaemo pompedatodo mia mempori, anu mentondao parenta-Do Ue Ala ka pompe'ala-ala ndi Ondae i Yesu.

¹³ Ka kurongeo suara inso i suruga motae: Burio, ”Meme'ura iramo mia memate anu mate a nee-Do i Ue, mompu'u kanandio-andio.” ”Mentee ntu'u,” Dopotae Penaa, ”ka imoiko dompenaa-naa inso a mpe'iseido, hangano luwuno wineweudo tumonda ira.”

Sowia i tolino 14:14-20

¹⁴ Ka kukitao: menteeano, hinao aasa seru mopute, ka i wawono seru atuu mentoro aasa mia kana i Ana Manusia saru aasa ramba-ramba ulu wulaa i wawo ulu-Do ka aasa ponsewo montaso a ngkae-Do.

¹⁵ Ka meluarakoomo aasa mala'eka susua inso a Raha Mempori; ka ipebooli saru suara meroku ndi Ondae anu mentoro a wawo nseru atuu, ”Pesewoakonomo ponsewo-Miu atuu ka isowimo, hangano haweomo tempono ka isinowi; hangano sowia i tolino motahaomo.”

¹⁶ Ka Ondae, anu mentoro a wawo nseru atuu, mesewoakono ponsewo-Do i wawontolino, ka sinowiomo tolino.

¹⁷ Ka aasa mala'eka susua meluarako inso a Raha Mempori anu i suruga; ndi onae mbo'u hinao aasa ponsewo montaso.

¹⁸ Ka aasa mala'eka susua aiwa inso a meda pontunua pesomba; onae pabawaio api ka ipebooli saru suara meroku a mala'eka anu mo'ini ponsewo montaso atuu, ipotae, ”Pesewoakonomo ponsewomu anu montaso atuu ka otuhi iramo wuano keu anggoro i tolino, hangano wuano motahaomo.”

¹⁹ Ka i'amba mala'eka atuu mesewoakono ponsewono i wawontolino, ka umotuhio wuano keu anggoro i tolino ka metendeakono a laro mpogilia langkai, onaemo tekuda-Do Ue Ala.

²⁰ Ka wua anggoro atuudo ginili i bungkuno kota ka inso a mpogilia atuu waa rea, mantandeno hawe a nsamano ngara ka olaino rua etu mili.