MENGKAAA 13 - Wunta Mempori

Kondehora anu meluarako inso a laro ntahi 13:1-10

¹ Ka ku'amba kumitao aasa kondehora meluarako inso a laro ntahi, metandu hopulu ka me'ulu opitu; i wawono luwuno tanduno hinao hopulu ramba-ramba ulu ka a uluno teburi ba opia nee pompepaukiako.

² Kondehora anu kinitaku atuu mengkena kana nggapu langkai meboti-boti, ka karuno kana karuno berua ka ngangano kana ngangano singa. Ka naga atuu moweeakono rosono, ka kadera poparentaano ka pabawano anu langkai.

³ Ka kukitaomo aasa inso a luwuno uluno kana mobela anu ta sumolangio tuwuno, sine mobela anu ta sumolangio tuwuno atuu toompa. Asa wawontolino mengkohali-hali, ka do'amba mentondao kondehora atuu.

⁴ Ka dompesombaio naga atuu, hangano ipoweeakono pabawa a ngkondehora atuu. Ka dompesombaio kondehora atuu, saru mpotae, ”Isemake anu mengkena kana kondehora andio? Ka isemake anu mokompetea umewaio?”

⁵ Ka a ngkondehora atuu pinoweeako ngangano, anu buke pompelangka-langkai ka pompepaukiako; ndi onae pinoweeako mbo'u pabawa ka iweweuo pato pulu ka orua wula tehineno.

⁶ Ka i'amba umungkahio ngangano ka ipepaukiako Ira Ue Ala, mepaukiakono nee-Do ka kema po'ianga-Do ka luwudo anu mpo'ia i suruga.

⁷ Ka onae ineheako ka ipetea umewai ira mia mempori ka inangi ira; ka ndi onae pinoweeako pabawa a sompo suku ka bawaa ka pau ka tongku.

⁸ Ka luwuno mia anu mpo'ia i wawontolino ira mpesombaio, onaemo sompo mia anu mompu'u ipinokogagi wawontolino neeno nahi teburi a wunta tuwua inso a Ana Bimba anu sinumbele Iramo.

⁹ Ba isema mebiri, po'ineeomo ka irongeo!

¹⁰ Ba isema tinantui ka itinawa, onae ta tinawa; ba isema tinantui ka ipinepateako ponai, onae asalakono pinepateako ponai. Anu kinere i ndi'ai onaemo pompedato ka pompe'ala-alado mia mempori.

Kondehora anu meluarako inso a laro wita 13:11-18

¹¹ Ka kukitao aasa kondehora susua inso a laro wita ka metandu orua mengkena kana ana bimba ka onae mepau kana aasa naga.

¹² Ka luwuno pabawano kondehora anu amba-ambano atuu ipolempao i arono matano. Hangano onae asa wawontolino ka luwuno ihino mpesombaio kondehora amba-ambano, anu tompaomo mobela langkaino.

¹³ Ka ipokohina ira petondoni anu mongkokongiri, maupo api ipotiio i tolino inso i langi i arono matado luwuno mia.

¹⁴ Ipopo'ooako ira anu mpo'ia i tolino hadio petondoni, anu iwineeako ka iweweuo i arono matano kondehora atuu. Ka itena ira anu mpo'ia i tolino, ka dopompontade tinaha ta pelangkaino kondehora anu mobelaako ponai, sine anu kongko tuwu atuu.

¹⁵ Ka ndi onae pinoweeako pabawa ka ipoweeakono penaa tinaha kondehora atuu, ranta tinaha kondehora atuu mepau mbo'u, ka ipoweweu kanatuu, ranta luwuno mia, anu nahi pesombaio tinaha kondehora atuu, pinepate.

¹⁶ Ka hangano onae, ranta a luwuno mia, kodei ke langkai, kaea ke mongkokolaro, maradeka ke ata, pinoweeako tondonino a ngkae ngkoanano ke a ra'ino,

¹⁷ ka nahina maupo te'asa mia anu mokompo'oli ke mo'asa sangkadio ondae anu mpopake tondoni atuu, onaemo neeno kondehora atuu ke doano neeno.

¹⁸ Anu kinere i ndi'ai onaemo ponto'ori anu mentee: ba isema anu pande mosongka, moikoomo idoao doano kondehora atuu, hangano podoa atuu onaemo podoano koa asa mia, ka doano onaemo nomo etu ka nomo pulu ka onoo.