MENGKAAA 11 - Wunta Mempori

Orua sakosii-Do Ue Ala 11:1-14

¹ Ka i'amba wineeako akumo asa mpole balo, kana tuko posongka tadeno, saru luwuno pau kanandio, ”Pentademo ka songkaomo Raha Mempori-Do Ue Ala ka meda pontunua pesomba ka ondae anu mpesomba i larono.

² Sine sangkadio kintalano Raha Mempori anu i te'alaako i bungkuno, si songkao, hangano onae wineeako iramo tongku susua ka ira melolandao kota Mempori pato pulu ka orua wula tehineno.”

³ Ka Aku moweeako ira anggaa a orua sakosii-Ku, ka dopompau anu ta gagi kontongaado mo'inombo, asa nsowu ka rua etu ka nomo pulu oleo tehineno.

⁴ Ondae onaemo orua keu saitu ka orua karuno hulu anu mentade i aro-Do Ueno luwuakoano.

⁵ Ka tewala hinao mia anu mingki mokomahaki ira, meluarakoomo api inso a ngangado mokomo'aio luwuno iwalido. Ka tewala hinao mia anu mingki mokomahaki ira, ka mia atuu asalakono mate kanatuu.

⁶ Ondae hinao pabawa tumutuwio langi, ka si petii usa tempono dopompau anu ta gagi; ka ondae hinao pabawa a luwuno uwoi ka dobalio gagi rea, ka mompotiiakono tolino luwuno rupano marasaia, sompo tempo inehedo.

⁷ Ka tewala dopoko'umariomo ponsakosiido, ka kondehora anu mesabaako inso a wingke matea, ta meteaako ira ka inangi ira saru mepate ira.

⁸ Ka wata ngkoroido ta mo'ia a wawo batatanano kota langkai, anu montonda pompe'ala-ala nineeako Sodomo ka Masiri, i ra'ai koa mbo'u Uedo Dopinaso a ngkeu pinotamba.

⁹ Ka mia anu me'inso a luwuno tongku ka suku ka pau ka pepe'etua, mengkitao wata ngkoroido otolu ka entonga oleo tehineno ka mia atuudo nahi dome'eheakono wata ngkoroido ikinaburu.

¹⁰ Ka ondae anu mpo'ia i wawontolino memawongko ka mpo'undeakono ondae atuu ka mpogawe ka memambe oliwi pompowee, hangano orua nabi atuu gagi bobarasaino luwuno mia anu mpo'ia i wawontolino.

¹¹ Otolu ka entonga oleo lembuino mewinsoomo penaa tuwua inso ndi Ondae Ue Ala i larodo, onaemo ka dopewangu ka luwuno mia anu mengkita ira gagi tedoa medoito.

¹² Ka mia atuudo merongeo aasa suara anu meroku inso i suruga mepauako ira, ”Impewuatakomo ramai!” Ka do'amba mpewuatako i langi, itutuwi ira seru, domensakosii ira iwalido.

¹³ I tempo atuu gagiomo leelu anu tedoa meroku ka asa ntia hopulu inso a ngkota atuu tebangku, ka pitu nsowu mia memate hangano leelu atuu ka mia susua tedoa medoito, ka do'amba me'unde-unde Ira Ue Ala anu i suruga.

¹⁴ Masolaa anu ko'orua telaloomo: kitaomo, masolaa anu ko'otolu tamo ronga hawe.

Tawuwua anu ko'opitu Penani po'unde-undedo mia mempinemota'u 11:15-19

¹⁵ Ka i'amba mala'eka anu ko'opitu puurio tawuwuano, ka terongeomo luwuno suara meroku i laro nsuruga, motae, ”Poparentaa i wawontolino Do'inio Ueto ka Ondae anu inurapi-Do, ka Ira momparenta gagi mokole ranta nahina tampulaano.”

¹⁶ Ka rua pulu ka opaa mia mempinemota'u, anu mpentoro i aro-Do Ue Ala a wawo ngkadera poparentaado, mpenggolontu ka mpesombai Ira Ue Ala,

¹⁷ saru mpotae, ”Mpontarimakasi kami ndi Omiu, oo Ue, Ue Ala, Anu Tedoa Pabawa, anu ndio ka anu ndio Komiumo, hangano I'iniomo pabawa-Miu anu langkai ka mompu'u Komiumo momparenta gagi mokole

¹⁸ ka luwuno tongku ntekuda iramo, sine haweakoomo tekuda-Miu ka tempono ka domebinitara mia mate ka domewineeako tambodo tetenaa-Miu, luwuno nabi ka mia memempori ka ndi ondae anu medoitoakono nee-Miu, a luwuno mia kodei ka luwuno mia langkai ka rumopuo ba isema anu rumopuo tolino.”

¹⁹ Ka te'ungkahiomo Raha Mempori-Do Ue Ala anu i suruga, ka tengkitaomo burua pedandia-Do i larono Raha Mempori atuu ka gagiomo koliki ka u'uruno rundu ka leelu ka usa seru baku marombo.