MENGKAAA 10 - Wunta Mempori

Wunta tewile 10:1-11

¹ Ka kukitao aasa mala'eka susua anu moroso metii inso i suruga, mesoumbuako seru, ka toro'ue kongko a wawo uluno ka rupano mengkena kana mata'oleo, ka karuno kana karu api.

² A laro ngkaeno i'inio aasa paluluno wunta kodei anu tewile. Ipelandaakono karu ngkoanano a wawo ntahi ka karu manggalino a wawontolino,

³ ka ipebooli saru suara meroku mengkena kana singa anu mengaoli. Ka umarino mebooli, opitu rundu atuu moporongeo suarano.

⁴ Ka mansano opitu rundu anu umari mepau, aku burio, sine kurongeo aasa suara inso i suruga mepau, ”Tondoniomo hapa anu pinaudo opitu rundu atuu ka si burio!”

⁵ Ka mala'eka anu kinitaku mentade a wawo ntahi ka a wawontolino, tumandeo kae ngkoanano kontahane i langi,

⁶ ka ipesumpa a nee-Do anu tuwu ranta nahina tampulaano, anu mokogagiomo langi ka luwuno ihino, ka tolino ka luwuno ihino ka tahi ka luwuno ihino, ipotae, ”Nahi ta pinotulu mbo'u!

⁷ Sine i tempono unino tawuwua inso a mala'eka anu ko'opitu, onaemo tewala ipuurio tawuwuano, ka tamo inihii pomputusi rahasia-Do Ue Ala, kana anu Dopaleleako iramo tetenaa-Do, onaemo luwuno nabi.”

⁸ Ka suara anu kurongeomo inso i langi atuu, mepau mbo'u ndi ongkue ipotae, ”Lakomo, alaomo paluluno wunta anu tewile a ngkaeno mala'eka, anu mentade a wawo ntahi ka a wawontolino atuu.”

⁹ Ka ku'amba lumako a mala'eka atuu ka umemao ndi onae, ka iweeakune paluluno wunta atuu. Ipotae ndi ongkue, ”Alaomo ka kaanomo; onae ta weweuo kompomu mompemopa'i, sine a laro ngangamu onae ta pinemo'ahi kana siu hoani.”

¹⁰ Ka ku'amba umalao wunta atuu inso a ngkaeno mala'eka atuu, ka kukaano; a laro ngangaku onae kupemo'ahio kana siu hoani, sine umariku kumaano, kompoku gagi mompemopa'i.

¹¹ Ka ipotaeakune, ”Omue asalakono mompau mbo'u anu ta gagi a hadio tongku ka suku ka pau ka mokole.”