MENGKAAA 1 - Wunta Mempori

Pompu'uano wunta 1:1-3

¹ Ndiomo pinokomengkaa-Do i Yesu Kerisituu, anu Doweeako Ira Ue Ala ndi Ondae, ka Dopopokitaako ira tetenaa-Do hapa anu asalakono ta ronga gagi. Ka a mala'eka-Do anu tinena-Do, Dopokomengkaaomo ndi Yohane, tetenaa-Do.

² I Yohane mesakosiiomo mongkona pau-Do Ue Ala ka mongkona anu sinakosii-Do i Yesu Kerisituu, onaemo luwuakoano anu ikitaomo.

³ Me'uraomo onae anu basao ka ondae anu mperorongeakono luwuno pau anu ta gagi andio, ka anu tumondao hapa anu teburi i larono, hangano tempono umpedaomo.

Tabea a opitu bawaa 1:4-8

⁴ Inso ndi Yohane hawe a opitu bawaa anu i Asia Kodei: Pe'aroa ka rodoa kumongkomi komiu, inso ndi Ondae, anu kongko ka anu kongko Iramo ka anu Ira hawe, ka inso a opitu penaa anu kongko i arono kadera poparentaa-Do,

⁵ ka inso ndi Ondae i Yesu Kerisituu, Sakosii anu metenunu, anu amba-ambano mewangu inso i olodo mia mate ka anu pabawa a luwuno mokoleno tolino andio. Ndi Ondae, anu mehohawa kita ka anu motola kitamo inso a halato hangano rea-Do –

⁶ ka anu weweu kitamo megagi aasa poparentaa, megagi luwuno sando mpesomba-Do Ue Ala, Ama-Do, – ndi Ondaemo marambaa ka pabawa ranta nahina tampulaano. Ami.

⁷ Kitaomo, hawe Ira melaro nseru ka sompo mata ta kumita Ira, ondae mbo'u anu tumobo Ira. Ka luwuno tongku i tolino ira mensabangi Ira. Humbee, ami.

⁸ ”Ongkuemo Alfa ka Omega, pau-Do Ue Ala, anu kongko ka anu kongko Iramo ka anu Ira hawe, Anu Tedoa Pabawa.”

Kinitano i Yohane i Patomosi 1:9-20

⁹ Ongkue, i Yohane, pepaekompo ka pe'asamiu a laro masusaa, a laro Poparentaa ka a laro pompedato sumikori Ira i Yesu, kongko i togo anu meneeako Patomosi hangano pau-Do Ue Ala ka ponsakosii-Do i Yesu.

¹⁰ A oleo-Do i Ue Dopabawai aku Penaa ka kurongeo inso i bungkuku aasa suara anu meroku, kana unino tawuwua,

¹¹ ipotae, ”Hapa anu kinitamu, buriomo a aasa wunta ka oliwiako iramo opitu bawaa andio: i Epesu, i Semirina, i Peregamusu, i Tiatira, i Saradisi, i Piladepia ka i Laodikia.”

¹² Ka ku'amba mewolili aku kumitao suara anu mepau ndi ongkue. Ka mansaku mewolili, kukitaomo opitu karuno hulu inso a wulaa.

¹³ Ka i tonga-tongano karuno hulu atuu hinao asa mia kana Ondae i Ana Manusia, mesangka lemba meloe anu ondauno hawe a ngkaru, ka rada-Do mebooako peboo ntonga inso a wulaa.

¹⁴ Ulu ka wuu-Do mopute kana wulu anu mopute ntu'u, ka mata-Do kana langano api.

¹⁵ Ka karu-Do mangkilo kana mala motaha a laro api; suara-Do kana u'uruno lolowi.

¹⁶ Ka a ngkae koana-Do mo'ini Ira opitu anano wula ka inso a nganga-Do meluarako aasa ponai montaso memata orua, ka rupa-Do mewanta kana mata'oleo anu mokula ntu'u.

¹⁷ Tempono kukita Ira, menggolontu akumo a mpuu karu-Do mengkena kana mia anu mate. Sine Dodampoakune kae ngkoana-Do ka Do'amba mepau, ”Si doito! Ongkuemo Anu Amba-ambano ka Anu Pokotompa,

¹⁸ ka Anu Tuwu. Mate Akumo, sine kitaomo, Tuwu Aku, ranta nahina tampulaano ka Ongkue uminio luwuno kunsino matea ka poparentaano matea.

¹⁹ Onaemo pu'uno buriomo hapa anu ukitaomo, moiko anu gagi kanandio-andio maupo anu ta gagi umarino andio.

²⁰ Ka rahasiano opitu anano wula anu ukitaomo a ngkae koana-Ku ka opitu karuno hulu wulaa atuu: opitu anano wula atuu onaemo mala'ekado opitu bawaa ka opitu karuno hulu atuu onaemo opitu bawaa.”