KOLOSE 4 - Wunta Mempori

¹ Hei luwuno pe'uea, impoweweumo temoleo ka mentee a atamiu; impewowoloo koa, omiu mbo'u hinao uemiu i suruga.

² Imemokua koa mpekakai ka i larono atuu impetangkoro koa saru mpontarimakasi.

³ Impekakaiakami koa mbo'u, ka Do'ungkahiakami Ue Ala pewowa a pompaleleamami, ranta ka kimempolio mpepau mongkona rahasia-Do i Kerisituu, anu hangano onae ka kutinorungku.

⁴ Hangano kanandio kupolio mokomengkaao, ba kana'umpe asalakono.

⁵ Imentuwumo ka imebukeako ponto'ori a luwuno mia i bungkuno, imempakeomo tempo anu hina.

⁶ Po'ineeomo luwuno paumiu ka ibukeako koa mpiha pompehohawa, si motewe, ranta ka imento'orio, ba kana'umpe asalakono imesangki ira mia.

Pokotompaano ka tabea 4:7-18

⁷ Luwuno teweweuku ta koa pauakomiu i Tikiku, pepaekompoto anu pinehohawa, Tetenaa anu metenunu ka waliku mo'angga ndi Ondae i Ue.

⁸ Tinooku tumenao ka i'aiwa ndi omiu, ka imento'orio koa teweweumami ka itareroakomiu aroamiu.

⁹ Onae kutenao meronga saru i Onesimu, pepaekompoto anu metenunu ka anu pinehohawa, asa mia inso i olomiu. Ira mempauakomiu luwuakoano anu gagi i ndi'ai.

¹⁰ Tabea ndi omiu inso ndi Arisatariku, pe'asa torungkuku ka inso ndi Marakusu, laki'anano i Baranaba – mongkona onae imentarimaomo pe'oliwi; tewala haweomo, imentarimaomo –

¹¹ ka inso ndi Yesu anu nineeako i Yusutusu. Butu otolu ira andio inso i olodo anu mpetindi anu gagi pe'asa mpo'anggaku tiano Poparentaa-Do Ue Ala; ondae atuu megagi iramo tareroku.

¹² Tabeano i Eparasi ndi omiu; onae asa mia inso i olomiu, tetenaa-Do i Kerisituu Yesu, anu mokua wela mekakaiakomiu, ka imemoroso mpentade, gagi mia anu sompo tinuwudo ka anu mpe'ala-alao ntu'u luwuakoano anu po'ehe-Do Ue Ala.

¹³ Hangano aku mokompesakosii mongkona onae, nine onae tedoa ipe'o'osuakomiu ka ondae anu i Laodikia ka i Hierapoli.

¹⁴ Tabeano sando Lukasi anu pinehohawa hawe ndi omiu ka inso ndi Demasi.

¹⁵ Impohaweo tabeamami a luwuno pepaekompo i Laodikia; ndi Nimipa mbo'u ka bawaa anu mekongko i rahado.

¹⁶ Ka tewala binasaomo wunta andio i olomiu, ime'ungkeakono ka domebinasaako koa mbo'u bawaa i Laodikia ka wunta anu tiano Laodikia ka imebinasaako koa mbo'u.

¹⁷ Ka impohaweakono i Arikipu: Pekokoongakono, pompekakaako anu tinarimamu ndi Ondae i Ue ka upolempao koa ntu'u tementee.

¹⁸ Tabea inso ndi ongkue, i Paulu. Tabea andio kuburiakono kaeku. Impewowoloo koa ponguku. Pe'aroa kumongkomi komiu.