KOLOSE 3 - Wunta Mempori

¹ Onaemo pu'uno, tewala mewinangu komiu meronga saru Ondae i Kerisituu, ime'ungkeomo mongkona anu i wawono, a mpo'ianga-Do i Kerisituu, mentoro i koana-Do Ue Ala.

² Impewowoloomo mongkona anu i wawono, komba anu i tolino.

³ Hangano memate komiumo ka tuwumiu tewuni meronga saru Ondae i Kerisituu ndi Ondae Ue Ala.

⁴ Tewala Ondae i Kerisituu, anu onaemo tuwuto, mepokomengkaa Ira te'upua, komiu koa mbo'u mpepokomengkaa meronga saru Ondae a marambaa.

Mia wo'ohu 3:5-17

⁵ Onaemo pu'uno impepateomo a laro ngkoroimiu luwuakoano anu po'eheno wawontolino, onaemo pebelesua, mokoburua, po'eheno aroa, pinewowolo mosa'o ka medokoli mbo'u anu mengkena saru mompesombai lahumoa,

⁶ luwuno atuu mokontekuda Ira Ue Ala [a luwuno mia mpe'ewa].

⁷ I ndi'upua imeweweu ira koa mbo'u mongkona atuu tempono imentuwu i larono.

⁸ Sine kanandio-andio, imentadiomo luwuno andio, onaemo tekuda, bamburu, mosa'oa, momposebe ka pau mokoburu anu meluarako inso a wiwimiu.

⁹ Siimo mbo'u imemambe gaupi, hangano imelohuomo mia laanomiu saru peleluno,

¹⁰ ka impokonaomo mia wo'ohu anu pinokowo'ohu mpiha ka impohawe ponto'ori anu mentee montonda gambara-Do Anu Mokogagio;

¹¹ mongkona andio nami hina mbo'u to Yunani ke to Yahudi, mia metindi ke mia nahi petindi, to Barabara ke to Sikiti, ata ke mia maradeka, sine luwuno Ondae i Kerisituu ka a luwuakoano.

¹² Onaemo pu'uno, kana mia bininiki-Do Ue Ala anu mempinokomempori ka pinehohawa-Do, impokonaomo pompehohawa, pe'aroa, pe'urumako, mauru ka sabara.

¹³ Imemambe sabaramo, ka imemambe ampunimo tewala asa mia monaa-naa aroa a walino, mengkena kana Ondae i Ue Do'ampuni komiumo, imeweweuomo mbo'u kanatuu.

¹⁴ Ka i wawono luwuno atuu: impokonaomo pompehohawa, gagi powutu anu mompo'asa ka mompokosompo.

¹⁵ Po'ineeomo rodoa inso ndi Ondae i Kerisituu moparenta i laro aroamiu, hangano onaemo atuu ka imempinoboi gagi aasa koroi. Ka impontarimakasimo.

¹⁶ Po'ineeomo pau-Do i Kerisituu ka ipo'ia saru luwuno kaeano i olomiu, ranta ka imemambe paguru ka mambe patuduako luwuno ponto'ori ka saru mpenaniako po'unde-unde, ka po'unde-unde ka penani rohani, impontarimakasi ndi Ondae Ue Ala i laro aroamiu.

¹⁷ Ka luwuakoano anu wineweumiu molalo pau ke mpoweweu, imeweweuomo luwuno atuu a nee-Do Ue Yesu, saru mpontarimakasi hangano Ondae ndi Ondae Ue Ala, Amato.

Penggoeado luwuno mia asa nsombori 3:18–4:6

¹⁸ Hei luwuno beine, impetuundumo a ntamamiu, ba kana'umpe asalakono ndi Ondae i Ue.

¹⁹ Hei luwuno tama, impehohawao beinemiu ka si melambaha ndi onae.

²⁰ Hei nana'ote, impomperorongeako a mia mota'umiu a luwuakoano, hangano onaemo anu Dopetekosio i Ue.

²¹ Hei luwuno ama, si mpokomahakio aroano anamiu, ka si motewe aroano.

²² Hei luwuno ata, impetenunumo a uemiu anu i wawontolino andio a luwuakoano, si komba butu mokonsanaa ira i arodo, tendeano a moleono aroa hangano doitoako Ira i Ue.

²³ Hapamo koa anu wineweumiu, imeweweuomo tompaano aroamiu kana tia-Do i Ue ka komba tiano mia.

²⁴ Imento'orio, nine insomo ndi Ondae i Ue komiu mpontarima tia anu imempinakosiako gagi tambo. Ondaemo i Kerisituu pe'uea ka omiu ata-Do.

²⁵ Ba isema sala poweweuno, ta tumembio salano atuu, hangano Ondae i Ue nahi Dopobiniki mia.