KOLOSE 2 - Wunta Mempori

¹ Hangano ineheku, ka imento'orio, ba kana'umpe mobeano kupeteahakoakomiu, ka ondae anu i Laodikia ka luwuno, anu napi domento'ori aku,

² ka itetarero aroado ka dontepo'asa a pompehohawa, ranta ka domehaweo luwuno kaeaa ka pompe'ala-ala mento'orio ntu'u ka mento'orio rahasia-Do Ue Ala, onaemo Ondae i Kerisituu,

³ hangano i laro-Do tewuni luwuno arataa ponto'ori mentee ka pande.

⁴ Mongkona andio kupauo, ka si hina anu mopo'ooakomiu pau mpo'o'ahiti.

⁵ Hangano maupo nahi kukongko i olomiu, sine a mpenaa kuperonga-rongaakomiu ka mawongko aroaku kumita komiu te'atora tuwumiu ka morosono pompe'ala-alamiu ndi Ondae i Kerisituu.

Bukeano tumuwu ndi Ondae i Kerisituu 2:6-15

⁶ Imentarima Iramo i Kerisituu Yesu, Ueto. Onaemo pu'uno po'ineeomo tuwumiu ka kongko mpiha ndi Ondae.

⁷ Impehakamo ndi Ondae ka mewinangu i wawo-Do, po'ineeomo ka ikomoro-morosono pompe'ala-alamiu anu imempinaguruakomo, ka po'ineeomo aroamiu ka ibukeako pontarimakasi.

⁸ Impetangkoromo, ka si hina anu umo'ahitiakomiu pompaguruno anu mooa ka nahi mentee montonda pompaguru mapa'api-api inule ka rupa-rupa penaa anu pabawaio wawontolino, sine komba montonda Ondae i Kerisituu.

⁹ Hangano i laro-Domo ipo'ia montonda koroi luwuno bukeano pe'Ue Alaa,

¹⁰ ka mempinobuke komiumo ndi Ondae. Ondaemo pu'uno poparenta ka anu mempabawa.

¹¹ Ndi Ondae mentinindi komiumo, komba petindi anu wineweuno mia, sine pontindi-Do i Kerisituu, onaemo pololohia koroi anu tehala,

¹² hangano mengkinaburu komiu saru Ondae a mpebahoa, ka ndi Ondae mpetonda komiu mbo'u mewinangu hangano pompe'ala-alamiu a mpo'anggano pabawa-Do Ue Ala, anu wangu Iramo inso a mpo'iangado mia mate.

¹³ Omiu mbo'u, maupo i ndi'upua memate hangano halamiu ka hangano nahi mpetindi montonda koroi ntolino, Dopotuwu komiumo Ue Ala meronga saru Ondae, umari-Do umanpunio luwuno halato,

¹⁴ Dopahihio wunta pasua, anu hangano luwuno pompakosino songka umewai kita ka mokodoito kita. Ka Do'oninio atuu saru mepasoakono a ngkeu pinotamba:

¹⁵ Dololohi iramo anu mpeparenta ka anu mempabawa ka mokogagi ira kikitaado mia hadio a mponangi-Do ndi ondae.

Ime'ungkeomo poparentaa anu i wawono 2:16–3:4

¹⁶ Onaemo pu'uno si mpo'inee ira mia mehuku komiu mongkona kaanga ka inua ke mongkona oleo langkai, wula wo'ohu ke oleo Saba;

¹⁷ luwuno andio butu eo-eono hapa anu asalakono ta hawe, sine tadeno Ondaemo i Kerisituu.

¹⁸ Si mpo'ineeo ponangimiu nahi pokogagio mia anu mo'onde-onde me'urumako ka mesomba a mala'eka, saru me'ini moroso a luwuno pongkita ka nahina pu'uno ka ipompelangka-langkaiako pinewowolono ntolino,

¹⁹ sine nahi pe'ini moroso a Ulu, insoano asa ngkoroi, anu pinokoroso ka iwutuo hadio ia ka luwuno pesombuano wuku ka igagi aasa, montarima tuwu inso ndi Ondae Ue Ala.

²⁰ Tewala memate komiumo meronga saru Ondae i Kerisituu ka ntepotola inso a luwuno penaa i wawontolino, tembioke ka impetuundu a mperupa-rupa atora, kana da mentuwu komiu i wawontolino:

²¹ si me'inio andio, si mpenamio atuu, si medanggio andio;

²² luwuno atuu butu mongkona sangka anu masola hangano pinake ka butu montonda luwuno parenta ka pompaguruno mia.

²³ Luwuno atora andio, maupo tengkita buke ponto'ori a mpesomba wineweudo ondaedo, kana mpe'urumako, mebobarasaio koroi, nahina tuduno butu motendeo tuwu ntolino.