I YOHANE 8 - Wunta Mempori

¹ sine Ondae i Yesu lumako a pongku Saitu.

² Mo'o-mo'oru ntu'u kongko Iramo mbo'u a Raha-Do Ue Ala, ka luwuno palili mehawe ndi Ondae. Mentoro Ira ka Dopaguru ira.

³ Ka anu mponto'ori Taura ka to Parisi mewawao ndi Ondae aasa beine anu hinawe monsosabo. Domenaao beine atuu i tonga-tongano

⁴ ka do'amba mpotaeako Ira i Yesu, ”Guru, beine andio hinawe kontongaano monsosabo.

⁵ A songka Taurano i Musa mempinarenta kita ka iwinunoako watu beine anu kanandio. Hapake pohawe-Miu mongkona atuu?”

⁶ Domempauo mongkona atuu ira me'ara-arahako Ira, ka dompohawe pesalaado mokonsala Ira. Sine metuundu Ira i Yesu ka Do'amba moburiako toniso-Do a wita.

⁷ Ka mansano mpesikeno ira mpiha ndi Ondae, mewanguako Ira mentade ka Do'amba mepauako ira, ”Ba isema i olomiu nahi tehala, onaemo anu amba-ambano wunoakono watu a beine atuu.”

⁸ Ka Do'amba metuundu mbo'u ka moburi a wita.

⁹ Sine mansado merongeo pau atuu, melako iramo nte'o'asa mia, mompu'u anu lalu mota'u. Poko'ariano mo'ia Iramo i Yesu asa-asa-Do saru beine atuu anu mo'ia mpiha a mpo'iangano.

¹⁰ Ka Do'amba i Yesu mewanguako mentade ka Dopotaeakono, ”Hei beine, isua iramoke? Nahinake te'asa mia anu humukuko?”

¹¹ Sangkino, ”Nahina, Ue.” Ka Do'amba motae i Yesu, ”Ongkue mbo'u nahi Aku humukuko. Lakomo, ka si poweweu mbo'u hala mompu'u kanandio-andio.”

Ondae i Yesu mewineno wawontolino 8:12-20

¹² Ka mepau Ira mbo'u i Yesu a mia hadio, Dopotae, ”Ongkuemo mewineno wawontolino; ba isema tumonda Aku, onae nahi ta melempa a laro wongi-wongiano, tendeano onae ta mohawe mewineno tuwua.”

¹³ Dompotaeako Ira to Parisi, ”Omiu mesakosii mongkona koroi-Miu, pesakosii-Miu nahi mentee.”

¹⁴ Sumangki Ira i Yesu ndi ondae, Dopotae, ”Maupo Kupesakosii mongkona koroi-Ku Ongkue-Ku, sine pensokosii-Ku atuu mentee, hangano Kuto'orio ba i sua insoa-Ku ka Kuto'orio ba i sua Kulako. Sine nahi imento'orio, ba i sua insoa-Ku ka ba i sua Kulako.

¹⁵ Omiu mpobitara montonda pongkitano mia, Ongkue nahina maupo te'asa mia binitara-Ku,

¹⁶ ka tewala Ongkue mobitara, asalakono pobitara-Ku atuu mentee, hangano komba asa-asa-Ku, sine Ongkue meronga saru Ondae anu tumena Aku.

¹⁷ Ka a wunta Tauramiu hinao teburi, nine ponsakosiino orua mia mentee ntu'u;

¹⁸ Ongkuemo anu mesakosii mongkona koroi-Ku Ongkue-Ku, ka Ondae mbo'u i Ama, anu tumena Aku, mesakosii mongkona Ongkue.”

¹⁹ Ka dompotaeako Ira, ”I sua Irake Ama-Miu?” Sumangki Ira i Yesu, ”Moiko Ongkue, maupo Ondae Ama-Ku nahi imento'orio. Bakanaano imento'ori Aku, komiu koa mento'ori Ira mbo'u Ama-Ku.”

²⁰ Luwuno pau atuu Dopauo i Yesu umpeda a mponaapa doi pesomba, tempono Dopompaguru a Raha-Do Ue Ala. Ka nahina maupo te'asa mia anu rumako Ira, hangano tempo-Do napi haweako.

Ondae i Yesu komba inso i wawontolino andio 8:21-29

²¹ Ka Dopotaeako ira mbo'u i Yesu mia hadio, ”Aku lumako ka komiu me'ungke Aku sine komiu memate a laro halamiu. A lakoa-Ku, nahi komiu mehawe.”

²² Ka dompotae to Yahudi atuu, ”Nde ta me'upuke ka Dopotae: A lakoa-Ku, nahi komiu mehawe?”

²³ Ka Do'amba motaeako ira, ”Omiu inso i totono, Ongkue inso i wawono; omiu inso i wawontolino andio, Ongkue komba inso i wawontolino andio.

²⁴ Onaemo pu'uno hieno ka Kupotaeakomiu, nine komiu memateako halamiu; hangano tewala nahi impe'ala-alao, nine Ongkuemo andio, komiu memateako halamiu.”

²⁵ Onaemo ka dompotaeako Ira, ”Isemake Omiu?” Sumangki Ira i Yesu, ”Hapa mbo'uke tuduno Kupepauakomiu?

²⁶ Hadio anu asalakono Aku pauo ka bitarao mongkona omiu; sine Ondae, anu tumena Aku mentee Ira, ka hapa anu rinonge-Ku inso ndi Ondae, onae anu Kupauakono wawontolino.”

²⁷ Nahi dompokonto'orio, nine Dopepau ndi ondae mongkona Ondae i Ama.

²⁸ Ka Dopotae i Yesu, ”Tewala impelangkai Iramo i Ana Manusia, ka i'amba mento'orio, nine Ongkuemo andio, ka nine nahi Kupoweweu hapa-hapa inso a ngkoroi-Ku Ongkue-Ku, sine mongkona luwuno pinau-Ku, kana Dopagurua-Kune i Ama.

²⁹ Ka Ondae, anu tumena Akumo, Dokongkomi Aku. Nahi Dopo'inee Aku asa-asa-Ku, hangano Kuweweuo mpiha hapa anu Dopemoikoo.”

Menteea anu mompokomaradeka 8:30-36

³⁰ Umari-Do pauo i Yesu luwuno atuu, hadio mia me'ala-ala Ira.

³¹ Onaemo ka Dopotaeako ira to Yahudi anu mpe'ala-ala Ira, ”Tewala mekongko komiu mpiha a mpau-Ku, omiu mentee ntu'u ana guru-Ku

³² ka komiu mento'orio menteea, ka menteea atuu ta mokomaradeka komiu.”

³³ Mesangki ira, ”Omami inuleno i Burahima ka napi kihori ntepe'ata maupo ndi sema. Kana'umpe ka Ipotae: Komiu memaradeka?”

³⁴ Motae Ira i Yesu ndi ondae, ”Kupauakomiu, menteeano sompo mia anu moweweu hala, onaemo atano hala.

³⁵ Ka ata nahi po'ia mpiha a laro raha, sine ana mo'ia mpiha a laro raha.

³⁶ Gagi tewala Ana atuu mokomaradeka komiu, mentee ntu'u maradeka komiu.”

Inuleno i Burahima anu komba inso ndi Ondae Ue Ala 8:37-47

³⁷ ”Kuto'orio, nine omiu inuleno i Burahima, sine ime'ungkeakono komiu mpepate Aku hangano pau-Ku nahi pohawe po'iangano i laromiu.

³⁸ Hapa anu kinita-Ku ndi Ondae i Ama, onaemo pinau-Ku, ka kanatuu koa mbo'u imeweweuo mongkona hapa anu rinongemiu inso a amamiu.”

³⁹ Domesangki Ira, ”Amamami onaemo i Burahima.” Motae Ira i Yesu ndi ondae, ”Bakanaano omiu anano i Burahima, asalakono komiu meweweuo anu wineweuno i Burahima.

⁴⁰ Sine anu wineweumiu onaemo me'ungkeakono komiu mpepate Aku; Ongkue, asa mia anu mompauakomiu menteea, onaemo menteea anu rinonge-Ku inso ndi Ondae Ue Ala; wineweu anu kanatuu nahi weweuo i Burahima.

⁴¹ Omiu meweweuo wineweudo amamiu.” Mesangki ira, ”Omami komba anado anu mpososabo. Amamami aasa, onaemo Ondae Ue Ala.”

⁴² Motae Ira i Yesu ndi ondae, ”Tewala Ondae Ue Ala Amamiu, komiu koa mpehohawa Aku, hangano Ongkue meluarako ka hawe inso ndi Ondae Ue Ala. Ka hawe-Ku komba po'ehe-Ku Ongkue-Ku, tendeano Ondaemo anu tumena Aku.

⁴³ Hapake pu'uno ka nahi impokonto'orio pau-Ku? Hangano nahi merongeo pau-Ku.

⁴⁴ I Mosa'o anu gagiomo amamiu ka inehemiu meweweuo luwuno anu ineheno amamiu. Onae tampu'uno puu pompepate mia ka nahi tuwu a menteea, hangano ndi onae nahina menteea. Tewala mompau pegaupi, ipauo a mpo'eheno onaeno, hangano onae lano puu mpegaupi ka amado luwuno pegaupi.

⁴⁵ Sine hangano mompau Aku menteea ndi omiu, nahi impe'ala-ala Aku.

⁴⁶ Isema i olomiu anu mokotisoa-Kune nine moweweu Aku hala? Tewala menteea Kupompau, tembio ka nahi impe'ala-ala Aku?

⁴⁷ Ba isema inso ndi Ondae Ue Ala, iperorongeakono pau-Do Ue Ala; onaemo pu'uno ka nahi imperorongeakono, hangano omiu komba inso ndi Ondae Ue Ala.”

Ondae i Yesu kongko Iramo mese'elungio i Burahima 8:48-59

⁴⁸ To Yahudi mesangki Ira i Yesu, ”Nahi menteeke ba kimpotae nine Omiu to Samaria ka anu pinewinsokino onitu nsa'o?”

⁴⁹ Sumangki Ira i Yesu, ”Komba ipewinsoki Aku onitu nsa'o, sine Kupelangkai Ira Ama-Ku ka omiu nahi mpelangkai Aku.

⁵⁰ Sine nahi Kupo'ungke pompelangkai-Ku: hinao Aasa anu umungkeo ka Ondae koa mbo'u anu mobitara.

⁵¹ Kupauakomiu: Menteeano ba isema tumondao Pau-Ku, nahi ta membasaio matea hawe nahina tampulaano.”

⁵² Dompotae ira to Yahudi ndi Ondae, ”Kanandio-andio kimento'orio, nine ipewinsoki-Komiu onitu nsa'o. Hangano mateomo i Burahima ka kanatuu koa mbo'u luwuno nabi, sine Ipotae: Ba isema tumondao pau-Ku, onae nahi ta membasaio matea hawe nahina tampulaano.

⁵³ Nde langkai Komiupoke sekono amato i Burahima, anu mate iramo! Maupo luwuno nabi memate iramo; saru isemake Ipongkenaakono Koroi-Miu?”

⁵⁴ Sumangki Ira i Yesu, ”Tewala Kupelangkaio koroi-Ku Ongkue-Ku, ka pompelangkai-Ku atuu maupo tedei nahina pengkonaano. Ondaemo Ama-Ku anu melangkai Aku, mongkona isema impotae: Ondaemo Ue Alamami,

⁵⁵ kahinaano nahi imento'ori Ira, sine Ongkue tumo'ori Ira. Ka tewala motae Aku: Nahi Kuto'ori Ira, megaupi Akumo, mengkena kana omiu, sine Kuto'ori Ira ka Kutondao pau-Do.

⁵⁶ I Burahima amamiu mo'unde nine ta kumitao oleo-Ku ka ikitaomo ka ipo'unde.”

⁵⁷ Mpotae iramo to Yahudi atuu ndi Ondae, ”Tinuwu-Miu napi haweako lima pulu nta'u ka Ikitaomo i Burahima?”

⁵⁸ Dopotae i Yesu, ”Kupauakomiu, menteeano napi gagi i Burahima, kongko Akumo.”

⁵⁹ Ka do'amba mpo'ala watu ira mewuno Ira; sine moliu Ira i Yesu ka Dobintao Raha-Do Ue Ala.