I YOHANE 7 - Wunta Mempori

Ondae i Yesu lumako i Yerusale a oleo langkai Laika Lewe 7:1-13

¹ Umarino atuu Ondae i Yesu melempa sumompoo wita Galilea, nahi Dobehe mo'ia mpiha i Yudea, hangano i ra'ai to Yahudi mpo'ungke sala ka dompepate Ira.

² Tempo atuu rangkuomo oleo langkaido to Yahudi, onaemo oleo langkai Laika Lewe.

³ Onaemo ka dompotae pepaekompo-Do i Yesu ndi Ondae, ”Pelungkamo inso i ndi'ai ka lakomo i Yudea, ka domengkitao koa ana guru-Miu luwuno anu wineweu-Miu.

⁴ Hangano nahina maupo te'asa mia moweweu hapamo koa a ntewuniano, tewala ineheno domentuduo mia hadio. Tewala Iweweu ira anu kanatuu teto'ori Komiumo a wawontolino.”

⁵ Hangano maupo pepaekompo-Do isa'a nahi dompe'ala-ala Ira.

⁶ Ka Dosangki ira i Yesu, ”Napi haweako tempo-Ku, sine tempomiu hinao mpiha.

⁷ Wawontolino nahi poko'o'aliaakomiu, sine i'o'aliaa-Kune, hangano mesakosii Aku mongkona onae, nine luwuno inanggano mosa'o.

⁸ Imelakomo omiu a mpogawea atuu. Napi Aku lumako i tu'ai, hangano napi haweako tempo-Ku.”

⁹ Kanandiomo pau-Do ndi ondae, ka mo'ia Iramo i Galilea.

¹⁰ Sine umarido melako pepaekompo-Do i Yesu a gawe atuu, lumako Ira koa mbo'u i tu'ai, nahi Dopepopokita sine menongko-nongkoako.

¹¹ To Yahudi me'ungke Ira a gawe atuu ka dompotae, ”Isua Iramo?”

¹² Ka hadio teronge petanga-tanga i olodo mia hadio mongkona Ondae. Hinao anu motae, ”Ondae mia moiko.” Hinao mbo'u anu motae, ”Naahi, Dopopo'oo ira palili.”

¹³ Sine nahina maupo te'asa mia anu sapa pauo manasa mongkona Ondae hangano domedoitoako ira to Yahudi.

Ponsakosii-Do i Yesu mongkona koroi-Do 7:14-24

¹⁴ Tempono da kontongaado mpogawe, Ondae i Yesu mewinso a Raha-Do Ue Ala ka Do'amba mompaguru i tu'ai.

¹⁵ Ka mengkohali-hali iramo to Yahudi ka dompotae, ”Kana'umpeke mia andio ka Doponto'ori kanandio nahi Dopepaguru!”

¹⁶ Sumangki Ira i Yesu ndi ondae, ”Pompaguru-Ku komba inso a ngkoroi-Ku Ongkue-Ku, sine inso ndi Ondae anu tumena Aku.

¹⁷ Ba isema anu behe weweuo po'ehe-Do, onae ta tumo'orio pompaguru-Ku andio ba te'inso ndi Ondae Ue Ala, ke pepau-Ku inso a ngkoroi-Ku Ongkue-Ku.

¹⁸ Ba isema mompau pauno onaeno, onae mo'ungke pelangkaino onaeno, sine ba isema anu mo'ungke pelangkai-Do anu tumenao, onae mentee ka nahina anu nahi mentee ndi onae.

¹⁹ Kombake i Musa anu moweeakomiumo songka Taura? Sine nahina maupo te'asa mia i olomiu anu weweuo songka Taura atuu. Tembio ka impo'ungke-ungkeako komiu mpepate Aku?”

²⁰ Mesangki ira mia hadio atuu, ”Ipewinsoki-Komiu onitu nsa'o; isemake mo'ungke-ungkeako ta mepate Komiu?”

²¹ Sumangki Ira i Yesu, ”Butu aasa wineweu-Ku mengkohali-hali komiumo luwu.

²² Gaagi: I Musa pakosio ka impetindi – menteeano petindi atuu komba inso ndi Musa, sine inso a uempu'uto – ka omiu mpotindi mia a oleo Saba!

²³ Tewala asa mia tinindi a oleo Saba, ka simelaloo Songkano i Musa, tembio ka imentekudaa-Kune, hangano Kupokotompao asa ngkoroino mia a oleo Saba.

²⁴ Si mpobitara montonda hapa anu tengkita, sine impobitaramo a moleoa.”

Teposisalaa mongkona insoa-Do i Yesu 7:25-36

²⁵ Ba opia mia i Yerusale mpotae, ”Kombake Ondae andio anu ira mpepateo?

²⁶ Ka kitaomo, nahi Donanta-nanta mepau ka nahi dompompauako Ira hapa-hapa. Nde doto'oriomo ntu'u petewawatoke, nine Ondaemo i Kerisituu?

²⁷ Sine mongkona mia andio tomento'orio i sua insoa-Do, sine ba Dohawe i Kerisituu, nahina maupo te'asa mia anu tumo'orio insoa-Do.”

²⁸ Tempono Dopompaguru i Kerisituu a Raha-Do Ue Ala, mebooli Ira, ”Lano imento'ori Aku ka imento'orio i sua insoa-Ku; sine hawe-Ku komba po'ehe-Ku Ongkue-Ku, sine Dotena Aku anu mentee anu nahi imento'ori Ira.

²⁹ Ongkue Kuto'ori Ira, hangano Ongkue hawe inso ndi Ondae ka Ondaemo anu tumena Aku.”

³⁰ Dome'ungkeakono ka dompokorako Ira, sine nahina maupo te'asa mia anu dumanggi Ira, hangano napi haweako tempo-Do.

³¹ Sine i olodo mia hadio atuu hadio anu mpe'ala-ala Ira ka dompotae, ”Ba Dohawe i Kerisituu, nde ta hadioopoke Dopoweweu kinohali-haliako sekonopo anu Doweweuomo Ondae andio?”

³² Domerongeo to Parisi dompetanga-tangaakono mia hadio luwuno atuu mongkona Ondae, ka onaemo pu'uno petewawado sando mpesomba ka to Parisi mentena ira anu mpodagai Raha-Do Ue Ala ka domerako Ira.

³³ Motae Iramo i Yesu, ”Saraimo koa Kupo'ia meronga omiu ka umarino atuu Aku lumako ndi Ondae anu tumena Akumo.

³⁴ Komiu me'ungke Aku, sine nahi komiu mehawe Aku, hangano nahi komiu mpoko'aiwa a mpo'ianga ba i sua Kupo'ia.”

³⁵ To Yahudi atuudo mpepau-pau pada ondaedo, ”I suake Ira lumako, ranta nahi kita mpokohawe Ira? Onaeke tinoo-Do Ira lumako ndi ondae anu mpo'ia a mpelakopia, i olodo to Yunani, ka Dopaguru ira to Yunani?

³⁶ Hapake pengkonaano pau anu pinau-Do andio: Komiu me'ungke Aku, sine nahi komiu mehawe Aku, ka: Nahi komiu mpokohawe a mpo'ianga ba i sua Kupo'ia?”

Uwoi pu'uno tuwua 7:37-44

³⁷ Ka a oleo pokotompa, onaemo oleonomo ntu'u porame-ramea atuu, mentade Ira i Yesu ka Dopebooli, ”Ba isema mokoranga, ka i'aiwa ndi Ongkue ka ipo'inu!

³⁸ Ba isema me'ala-ala Aku, kana anu pinau a Wunta Mempori: Inso i laro aroano ta waa uwoi tuwu.”

³⁹ Anu tinoo-Do onaemo Penaa anu ira mentarimao anu mpompe'ala-ala ndi Ondae; hangano Penaa atuu napi hawe, hangano Ondae i Yesu napi Dopinokomaramba.

⁴⁰ Ba opia mia i olodo mia hadio, anu mperorongeakono pau atuu, mpotae, ”Ondae andio mentee ntu'u nabi anu ta hawe.”

⁴¹ Anu mehano mpotae, ”Ondae andio i Mesia.” Sine anu mehano mbo'u mpotae, ”Naahi, i Mesia nahi Ira hawe inso i Galilea!

⁴² Hangano pinau a Wunta mempori, nine i Mesia inso a inuleno i Daudi ka inso i inia Beteleme, po'iangano i Daudi i ndi'upua.”

⁴³ Ka Gagiomo teposisalaa i olodo mia hadio hangano Ondae.

⁴⁴ Ba opia mia i olodo mingki rumako Ira, sine nahina maupo te'asa mia anu mosia dumanggi Ira.

I Nikodemu umala-alaako Ira i Yesu 7:45-52

⁴⁵ Ka luwuno anu mpodagai atuu melako a mpetewawado sando mesomba ka to Parisi, anu mpotaeako ira, ”Tembio ka nahi imewawa Ira?”

⁴⁶ Mesangki ira anu mpodagai atuu, ”Napi hori hina mia mepau kana mia atuu!”

⁴⁷ Mesangki ira to Parisi atuu, ”Nde omiu mbo'uke mempinopo'oo?

⁴⁸ Hinaoke te'asa mia i olodo petewawa anu me'ala-ala Ira, ke te'asa mia i olodo to Parisi?

⁴⁹ Sine mia hadio andiodo anu nahi domponto'ori songka Taura, ntetotonaa iramo!”

⁵⁰ I Nikodemu, asa mia inso ndi ondae, anu i ndi'upua horiomo aiwa ndi Ondae, motaeako ira,

⁵¹ ”Nde ihukuo songka Tauratoke asa mia, se'eluno napi rinonge ka se'eluno napi domento'orio mia hapa anu Doweweuomo?”

⁵² Mesangki ira, ”Nde omue mbo'uke to Galilea? Paresaomo Wunta Mempori ka kotumo'orio nine nahina nabi anu hawe inso i Galilea.”

Beine anu monsosabo 7:53–8:11

⁵³ Ka do'amba mpekule, singge mia lumako a rahano,