I YOHANE 6 - Wunta Mempori

Ondae i Yesu mompaka lima nsowu mia 6:1-15 (Mat. 14:13-21; Mrk. 6:32-44; Luk. 9:10-17)

¹ Umarino atuu Ondae i Yesu melungka lumako i asatowano rano Galilea, onaemo rano Tiberia.

² Mia hadio ntehuhu tumonda Ira, hangano domengkitao luwuno pompokotompa anu kinohali-haliako, anu wineweu-Do a mia memahaki.

³ Ka Ondae i Yesu mewuatako a wawo ntorukuno ka Dopentoro i tu'ai saru ana guruDo.

⁴ Ka Pasa, oleo langkaido to Yahudi rangkuomo.

⁵ Tempono Ondae i Yesu mengkita limbu-limbu ka Dokitao, nine mia hadio ntehuhu me'aiwa ndi Ondae, motae Iramo ndi Pilipu, ”I suake ba topo'oli roti, ka dompongkaa mia andiodo?”

⁶ Mongkona atuu Dopauo butu Ira umarahakono, hangano Ondae-Do tumo'orio, hapa anu Ira weweuo.

⁷ Sumangki i Pilipu, ”Roti me'oli rua etu dinare nahi ta sompo tiado mia andiodo, maupo singge mia mohawe te'asa nsibamo koa.”

⁸ Asa mia inso a ana guru-Do, onaemo i Andarea, pepaekompono i Simo Peturu, motaeako Ira,

⁹ ”I ndi'ai hinao asa nana'ote, anu monaa olima roti jelai ka orua bou; sine hapake pengkonaano atuu a mia hadio andio?”

¹⁰ Dopotae i Yesu, ”Tena iramo mia atuudo mpentoro.” A mpo'ianga atuu hadio ewo. Ka mpentoro iramo mia atuudo, bara'ura lima nsowu tama hadiono.

¹¹ Ka Do'amba i Yesu umalao roti atuu, ka Dopontarimakasi ka Dotia-tiaako ira anu pentoro i tu'ai, kanatuu koa mbo'u Doweweuo a luwuno bou atuu montonda hadiono anu inehedo.

¹² Ka mansado memowohi Dopotaeako ira ana guru-Do, ”Imepumpu iramo siba-sibano anu torea ka si hina tetadi-tadi.”

¹³ Ka do'amba mepumpuo, ka me'ihiio hopulu ka orua baki bukeako siba-sibano inso a olima roti jelai anu torea umarido mia mpongkaa.

¹⁴ Tempono domengkitao mia atuudo kinohali-haliako anu Doweweuomo, dompotae, ”Ondae andio mentee ntu'u Nabi anu Ira hawe i wawontolino.”

¹⁵ Hangano Doto'orio i Yesu, nine ira mehawe umala Ira ka dumadai Ira gagi mokole, meliahako Ira mbo'u a ntorukuno, asa-asa-Do.

Ondae i Yesu melempa a wawo uwoi 6:16-21 (Mat. 14:22-33; Mrk. 6:45-52)

¹⁶ Ka tempono mompu'uomo wongi, ana guru-Do i Yesu melako a rano, ka do'amba mpe'ula a bangka

¹⁷ ka domensakiako i Kapenau. Tempono wongi-wongiomo naapo koa mbo'u Dohawe i Yesu tepohaweako ira,

¹⁸ tahi kontongaano mebomba hangano angi mokora.

¹⁹ Mansado mpebose ta te'orua ba otolu kilo olaino, domengkita Ira i Yesu melempa a wawo uwoi rumangkuhio bangka atuu. Ka medoito iramo.

²⁰ Sine Dopotaeako ira, ”Ongkue andio, si medoito!”

²¹ Inehedo umula Ira a bangka, ka sarai koa haweomo bangka atuu a wiwi rano anu tinutuido.

Mia hadio umungke Ira i Yesu 6:22-24

²² Tisomono mia hadio, anu da mpo'ia i asatowa, mengkitao nine i tu'ai nahina bangka sangkadio anu aasa hieno ka nine Ondae i Yesu nahi Dope'ula a Bangka atuu meronga saru ana guru-Do, ka nine butu koa ana guru-Do anu mpelungka.

²³ Sine kontongaano atuu ba opia bangka susua mehawe inso i Tiberia umpeda a mpo'ianga dompongkaa roti, umari-Do i Ue montarima kasiakono.

²⁴ Tempono domengkitao mia hadio, nine nahi Dokongko i Yesu i tu'ai ka maupo mbo'u ana guru-Do naahi, mpe'ula ira a bangka atuudo ka do'amba mpelungka melako i Kapenau umungke Ira i Yesu.

Roti tuwua 6:25-59

²⁵ Tempono domehawe Ira mia hadio Ondae i Yesu i asatowano rano atuu, dompotaeako Ira, ”Guru, indi'ipiake Ihawe i ndi'ai?”

²⁶ Sumangki Ira i Yesu, ”Kupauakomiu, menteeano ime'ungke Aku, komba hangano imengkita iramo petondoni, tendeano hangano mpongkaa komiumo roti atuu ka memowohi komiu.

²⁷ Impo'anggamo, komba ka impohawe kaanga anu ta pingko, tendeano ka impohawe kaanga anu mo'ia mpiha hawe a ntuwua anu nahina tampulaano, anu Ira weeakomiu i Ana Manusia; hangano Ondaemo anu Dopementeeakono pontondoni-Do Ue Ala, Ama.”

²⁸ Ka do'amba mpotaeako Ira, ”Hapake anu asalakono kami meweweuo, ka kime'anggao anggaa anu inehe-Do Ue Ala?”

²⁹ Sumangki Ira i Yesu, ”Ndiomo anggaa anu inehe-Do Ue Ala, onaemo ka impe'ala-ala Ira anu tinena-Do Ue Ala.”

³⁰ Ka dompotaeako Ira, ”Petondoni hapake anu wineweu-Miu, ka kimengkitao ka mpe'ala-ala Komiu? Anggaa hapake anu wineweu-Miu?

³¹ Uempu'umami mpongkaa iramo roti mana i pada one, kana hinao teburi: Ondae Dopakaako ira roti inso i suruga.”

³² Ka motae Ira i Yesu ndi ondae, ”Kupauakomiu, menteeano komba i Musa anu moweeakomiu roti inso i suruga, tendeano Ondae Ama-Ku anu moweeakomiu roti anu mentee inso i suruga.

³³ Hangano roti anu inso ndi Ondae Ue Ala onaemo roti anu metii inso i suruga ka anu moweeakono tuwua wawontolino.”

³⁴ Ka dompotaeako Ira, ”Ue, Ipowee kami mpiha roti atuu.”

³⁵ Motae Ira i Yesu ndi ondae, ”Ongkuemo roti tuwua; ba isema aiwa ndi Ongkue, nahi ta mokoninggo mbo'u, ka ba isema anu me'ala-ala Aku, nahi ta mokoranga mbo'u.

³⁶ Sine umariomo Kupauakomiu: Maupo imengkita Akumo, nahi impompe'ala-ala.

³⁷ Luwuno anu Dowee Aku i Ama, ira mehawe ndi Ongkue, ka ba isema anu aiwa ndi Ongkue, nahi Aku tumadio.

³⁸ Hangano metii Akumo inso i suruga komba ka Kupoweweu po'ehe-Ku, sine ka Kuweweuo po'ehe-Do anu tumena Akumo.

³⁹ Ka ndiomo po'ehe-Do anu tumena Akumo, onaemo inso a luwuno anu Dowee Akumo ka si hina anu tetadi, sine ka Kuwangu ira a oleo pokotampulaano wawontolino.

⁴⁰ Hangano ndiomo po'ehe-Do Ama-Ku, onaemo sompo mia, anu kumita Ira i Ana ka anu me'ala-ala Ira ka dompohawe tuwua anu nahina tampulaano, ka a tampulaano wawontolino ka Kuwanguo.”

⁴¹ Onaemo ka dompewuruki to Yahudi mongkona Ondae, hangano motae Iramo, ”Ongkuemo roti anu metii inso i suruga.”

⁴² Dompotae, ”Kombake Ondae andio i Yesu, anano i Yusupu, anu ine ka ama-Do tomento'orio? Kana'umpe ka Dopokompotae: Metii Akumo inso i suruga?”

⁴³ Dosangki ira i Yesu, ”Si mpewuruki.

⁴⁴ Nahina maupo te'asa mia anu moko'aiwa ndi Ongkue, tewala nahi Dopadiio i Ama anu tumena Aku, ka onae Aku wanguo a pokotampulaano wawontolino.

⁴⁵ Hinao teburi a wuntado nabi: Ka luwudo Ondae Ue Ala paguru ira. Ka sompo mia, anu rumongeomo ka tumarimao pompaguru inso ndi Ondae i Ama, aiwa ndi Ongkue.

⁴⁶ Mongkona atuu, komba nine hinao mia anu kumita Iramo i Ama. Butu Ondae anu hawe inso ndi Ondae Ue Ala, Ondaemo anu kumita Ira i Ama.

⁴⁷ Kupauakomiu, menteeano ba isema mompe'ala-ala, onae hinaomo tuwua anu nahina tampulaano.

⁴⁸ Ongkuemo roti tuwua.

⁴⁹ Uempu'umiu mpongkaa iramo roti mana i pada one ka memate iramo.

⁵⁰ Ndiomo roti anu metii inso i suruga: Ba isema kumaano, nahi ta mate.

⁵¹ Ongkuemo roti tuwua anu metii inso i suruga. Tewala asa mia mongkaa roti andio, onae ta tuwu nahina tampulaano, ka roti anu Kuweeakono atuu koroi-Ku, anu Aku weeakono wawontolino tuwuano.”

⁵² Mpengenge iramo to Yahudi pada ondaedo ka dompotae, ”Kana'umpe Ondae andio ka Dopokoweeakita koroi-Do ka tomengkaano.”

⁵³ Ka motae Ira i Yesu ndi ondae, ”Kupauakomiu, menteeano tewala nahi imengkaano koroi-Do i Ana Manusia ka me'inuo rea-Do, nahina tuwua a ngkoroimiu.

⁵⁴ Ba isema mongkaa koroi-Ku ka mo'inu rea-Ku, onae hinaomo tuwua anu nahina tampulaano ka Aku wanguo a pokotampulaano wawontolino.

⁵⁵ Hangano koroi-Ku onaemo kaanga ntu'u ka rea-Ku onaemo inua ntu'u.

⁵⁶ Ba isema mongkaa koroi-Ku ka mo'inu rea-Ku, onae mo'ia i laro-Ku ka Ongkue i larono.

⁵⁷ Mengkena kana Ondae i Ama anu tuwu tumena Aku ka Kutuwu hangano Ondae i Ama, kanatuu koa mbo'u ba isema mongkaa koroi-Ku, ta tuwu hangano Ongkue.

⁵⁸ Ndiomo roti anu metii inso i suruga, komba roti kana anu kinaado uempu'umiu ka memate iramo. Ba isema mongkaa roti andio, onae ta tuwu nahina tampulaano.”

⁵⁹ Luwuno andio Dopauo i Yesu i Kapenau tempono Dopompaguru a raha tepumpua.

Ana guru anu mponsuka i Galilea 6:60-66

⁶⁰ Umarido merongeo luwuno atuu hadio inso a ana guru-Do i Yesu anu mpotae, ”Pau andio mokora, isemake anu polio rumongeo?”

⁶¹ Ondae i Yesu i laro aroa-Do Doto'orio, nine mongkona pinau-Do atuu dompewurukiako ana guru-Do, onaemo ka Dopotaeako ira, ”Nde teleluke pompe'ala-alamiu hangano pau atuu?

⁶² Ka kana'umpeke, tewala imengkita Ira i Ana Manusia mewuatako a mpo'ianga-Do se'eluno?

⁶³ Penaamo anu mompowee tuwua, koroi nahina tuduno. Luwuno pau anu pinau-Ku ndi omiu onaemo penaa ka tuwua.

⁶⁴ Sine i olomiu hinao anu nahi pompe'ala-ala.” Hangano inso a pompu'uano Doto'orio i Yesu, isema anu nahi pompe'ala-ala ka isema anu ta meweengako Ira.

⁶⁵ Ka Do'amba motae, ”Onaemo pu'uno Kupauakomiumo: Nahina maupo te'asa mia moko'aiwa ndi Ongkue, tewala komba Ondae i Ama meweengakono ndi onae.”

⁶⁶ Mompu'u inso a tempo atuu hadio ana guru-Do memposuka ka nami domentonda Ira mbo'u.

Mangakuno i Peturu 6:67-71

⁶⁷ Onaemo ka Dopotae i Yesu a hopulu ka orua ana guru-Do, ”Omiu mbo'u nahi komiu melakoke?”

⁶⁸ Isangki Ira i Simo Peturu, ”Ue, ndi semake kami melako? Pau-Miu onaemo pau tuwua anu nahina tampulaano;

⁶⁹ ka kimpe'ala-alaomo ka mento'orio nine Omiu Anu Mempori inso ndi Ondae Ue Ala.”

⁷⁰ Sumangki Ira i Yesu, ”Kombake Ongkue-Ku anu biniki komiu anu hopulu ka orua andio? Sine asa mia i olomiu onaemo i Mosa'o.”

⁷¹ Anu tinoo-Do onaemo i Yudasi, anano i Simo Karioti; hangano onaemo anu ta meweengako Ira i Yesu, onae asa mia i olodo hopulu ka orua ana guru atuu.