I YOHANE 5 - Wunta Mempori

Pompokotompaa a oleo Saba a limbo Beteseda 5:1-18

¹ Umarino atuu hinao oleo langkaido to Yahudi, ka Ondae i Yesu melungka lumako i Yerusale.

² I Yerusale umpeda Pewowa Langkai Bimba hinao aasa limbo, anu a mpau Ibarani nineeako Beteseda; hinao olima tambino

³ ka a luwuno tambino atuu mpepombole hadio mia memahaki: mia memorawu, mia tiimpa karu ka mia pungku, anu mensikorio peleluano uwoi a limbo atuu.

⁴ Hangano metempo-tempo mala'eka-Do i Ue metii a limbo atuu ka ileluao uwoi atuu; ba isema anu tese'elu mewinso i larono umarino melelu uwoi atuu, gagi tompa, hapamo koa hakino.

⁵ I tu'ai hinao asa mia anu tolu pulu ka oalu nta'umo tehineno imahaki.

⁶ Mansa-Do kumitao i Yesu mia atuu mepombole i tu'ai ka hangano Doto'orio, nine tehineomo iteweweu kanatuu, motae Iramo ndi onae, ”Inehemuke tompa?”

⁷ Sumangki mia mahaki atuu, ”Ue, nahina mia anu motii aku a laro limbo atuu ba mompu'uomo melelu uwoino, ka kontongaaku te'aro a limbo atuu, metiiomo mia susua mese'elungi aku.”

⁸ Dopotae i Yesu, ”Pewangumo, tandeomo poturiamu ka pelempamo.”

⁹ Ka i tempo koa mbo'u atuu tompaomo mia atuu ka i'amba tumandeo poturiano ka ipelempa. Sine oleo atuu oleo Saba.

¹⁰ Onaemo pu'uno to Yahudi ka dompotaeakono mia anu da sarai itompa atuu, ”Oleo andio oleo Saba ka nahi moiko upo'ahao poturiamu.”

¹¹ Sine isangki ira, ”Mia anu mokotompa akumo, Ondae anu motaeakune: Tandeomo poturiamu ka pelempamo.”

¹² Domensikenoo, ”Isemake mia atuu anu motaeakomu: Tandeomo poturiamu ka pelempamo?”

¹³ Sine mia anu da sarai itompa atuu nahi to'orio ba isema mia atuu, hangano Ondae i Yesu tewuni Iramo i tonga-tongano mia hadio a mpo'ianga atuu.

¹⁴ Ka Do'amba i Yesu tepohaweakono a laro RahaDo Ue Ala ka Do'amba motaeakono, ”Tompakomo; si poweweu mbo'u hala, ka si gagi ndi omue anu lansaraopo.”

¹⁵ Meluarako mia atuu, ka i'amba tumutuluako ira to Yahudi, nine Ondaemo i Yesu anu mokotompao.

¹⁶ Ka onaemo pu'uno ka dompo'ungke-ungkeako to Yahudi weweu nsa'o Ira i Yesu, hangano Doweweuo luwuno atuu a oleo Saba.

¹⁷ Sine Dopotaeako ira, ”Ondae Ama-Ku mo'angga Ira hawe kanandio-andio, onaemo ka Kupo'angga mbo'u.”

¹⁸ Onaemo pu'uno to Yahudi tepaheomo ntu'u dompo'ungke-ungkeako ka dompepate Ira, komba butu hangano nahi Dopelangkaio oleo Saba, sine hangano mbo'u Dopauo nine Ondae Ue Ala onaemo Ama-Do ka ba kanandio Dopongkenaomo koroi-Do saru Ondae Ue Ala.

Ponsakosii-Do i Yesu mongkona koroi-Do 5:19-47

¹⁹ Ka Do'amba i Yesu sumangki ira, Dopotae, ”Kupauakomiu, menteeano, Ana nahi pokompo'angga maupo hapa inso a ngkoroi-Do Ondae-Do, tewala nahi Dokitao Do'anggao Ama-Do; hangano hapa anu inangga-Do Ama, onae koa mbo'u anu inangga-Do Ana.

²⁰ Hangano Ama mompehohawa Ana ka luwuakoano anu inangga-Do Ondae-Do Dotisoako Ira, tendeano Ira tumisoako Ira luwuno anggaa anu langkaiopo mbo'u sekono luwuno anggaa atuu, ranta ka imengkohali-hali.

²¹ Hangano mengkena kana Ondae i Ama wangu ira mia mate ka motuwu ira, kanatuu koa mbo'u Ondae i Ana motuwuo ba isema anu inehe-Do.

²² Ondae i Ama nahi Dobitarao maupo isema, tendeano Dopeweengakono pobitaraa atuu ndi Ondae i Ana,

²³ ka dompelangkai Ira luwuno mia i Ana mengkena kana dompelangkai Ira i Ama. Ba isema nahi pelangkai Ira i Ana, onae nahi pelangkai Ira mbo'u i Ama, anu tumena Ira.

²⁴ Kupauakomiu: Menteeano ba isema rumongeo pinau-Ku ka ipe'ala-ala Ira anu tumena Aku, onae mohawe tuwua anu nahina tampulaano ka nahi ta hinuku, hangano melimbaomo inso a laro matea a laro ntuwua.

²⁵ Kupauakomiu: Menteeano ta hawe tempono ka haweomo, nine mia memate ira merongeo suara-Do Ana-Do Ue Ala, ka ondae anu merongeo, ta tuwu.

²⁶ Hangano mengkena kana Ondae i Ama hinao tuwua a ngkoroi-Do Ondae-Do, kanandio koa mbo'u Doweeako Ira Ana ka ihina tuwua a ngkoroi-Do Ondae-Do.

²⁷ Ka Dopoweeako Iramo pabawa ka Dopobitara, hangano Ondae Ana Manusia.

²⁸ Si mengkohali-haliakono mongkona atuu, hangano ta hawe tempono, nine luwuno mia anu a laro ngkaburu ira merongeo suara-Do,

²⁹ ka ondae anu mpoweweu iramo moiko ira mpeluarako ka ira mpewangu a ntuwua anu nahina tampulaano, sine ondae anu mpoweweu mosa'o ira mpewangu mehinuku.

³⁰ Nahi Kupolio moweweu hapa-hapa inso a ngkoroi-Ku Ongkue-Ku; Kupobitara menunu saru hapa anu rinonge-Ku, ka pobitara-Ku moleo, hangano nahi Kutondao po'ehe-Ku Ongkue-Ku, tendeano po'ehe-Do anu tumena Aku.

³¹ Tewala mesakosii Aku mongkona koroi-Ku Ongkue-Ku, ka ponsakosii-Ku atuu nahi mentee;

³² hinao anu susua mesakosii mongkona Ongkue ka Kuto'orio, nine ponsakosii-Do mongkona Ongkue lano mentee.

³³ Mpotena komiumo mia lumako ndi Yohane ka onae mesakosiiomo mongkona menteea;

³⁴ sine nahi Kukereo ponsakosiino mia, sine Kupauo mongkona andio, ka imengkinadudui.

³⁵ Ondaemo hulu anu melanga ka mewanta ka sarai koa imebehe mpo'undeakono wantano atuu.

³⁶ Sine hinao aasa ponsakosii-Ku anu lalu mentudu sekono ponsakosiino i Yohane, onaemo luwuno anggaa anu Doweea-Kune i Ama, ka Ku'anggao. Anggaa mbo'u atuu anu inangga-Ku kanandio-andio, ka onaemo anu sumakosiio mongkona Ongkue, nine Ondae i Ama anu tumena Aku.

³⁷ Ondae i Ama anu tumena Aku, Ondaemo sumakosiio mongkona Ongkue. Omiu nahi hori merongeo suara-Do, maupo rupa-Do nahi hori mengkitao,

³⁸ ka pau-Do nahi po'ia mpiha i laro aroamiu, hangano nahi mpe'ala-ala Ira anu tinena-Do.

³⁹ Imemparesao luwuno Wunta Mempori, hangano imengko'aro-aroa nine hangano Wunta Mempori komiu mpohawe tuwua anu nahina tampulaano, sine maupo luwuno Wunta Mempori atuu sumakosiio mongkona Ongkue,

⁴⁰ sine nahi mebehe me'aiwa ndi Ongkue ka impohawe tuwua atuu.

⁴¹ Nahi Kukereo pompelangkai inso a mia.

⁴² Sine mongkona omiu, lano Kuto'orio nine i laro aroamiu nahina pongkekewoimiu ndi Ondae Ue Ala.

⁴³ Hawe Aku a nee-Do Ama-Ku ka nahi imentarima Aku; tewala mia susua hawe a neeno onaeno, komiu mentarimao.

⁴⁴ Kana'umpeke komiu mpokopompe'ala-ala, omiu anu mpontarima pompelangkai inso a mpe'asa miamiu ka nahi me'ungkeo pompelangkai anu hawe inso ndi Ondae Ue Ala anu Asa-Asa-Do?

⁴⁵ Si mengko'aro-aroa, nine Aku mokonsala komiu i aro-Do Ama-Ku; anu mokonsala komiu onaemo i Musa, onaemo i Musa anu pinerorohimiu.

⁴⁶ Hangano tewala impe'ala-alao i Musa, asalakono komiu koa mpompe'ala-ala mbo'u ndi Ongkue, hangano iburiomo mongkona Ongkue.

⁴⁷ Sine tewala nahi impe'ala-alao hapa anu binurino, kana'umpeke komiu mpe'ala-alao hapa anu pinau-Ku?”