I YOHANE 3 - Wunta Mempori

Pepau-paua saru i Nikodemu 3:1-21

¹ Hinao aasa to Parisi anu meneeako i Nikodemu, aasa petewawa agama Yahudi.

² Onae aiwa ndi Ondae i Yesu tempono wongi ka ipotae, ”Guru, kimento'orio, nine Omiu hawe gagi guru anu tinena-Do Ue Ala; hangano nahina maupo te'asa mia anu polio weweu ira petondoni anu wineweu-Miu atuu, ba nahi Dokongkomio Ue Ala.”

³ Sumangki Ira i Yesu, Dopotae, ”Kupauakomu, menteeano tewala asa mia nahi wali pine'anaako, nahi ta mokokitao Poparentaa-Do Ue Ala.”

⁴ Motae i Nikodemu ndi Ondae, ”Kana'umpeke asa mia ta pine'anaako, ba mota'uomo? Wali mokompewinsoke a laro mpe'anakaano ineno ka ipine'anaako mbo'u?”

⁵ Sumangki Ira i Yesu, ”Kupauakomu, menteeano tewala asa mia nahi pine'anaako inso a uwoi ka Penaa, nahi ta mokompewinso a laro Poparentaa-Do Ue Ala.

⁶ Hapa anu pine'anaako inso a koroi onaemo koroi, ka hapa anu pine'anaako inso a Mpenaa, onaemo Penaa.

⁷ Si kohali-hali, hangano Kupotaeakomu: Asalakono komiu wali mempine'anaako.

⁸ Angi mepuuri ba isua po'eheno, ka urongeo unino, sine nahi uto'orio ba isua insoano ke ba isua te'aroano. Kanandiomo teweweuno sompo mia anu hina inso a Mpenaa.”

⁹ Sumangki i Nikodemu, ipotae, ”Kana'umpeke ta gagi anu kanatuu?”

¹⁰ Sumangki Ira i Yesu, ”Omue anu paguru ira to Isaraeli, ka nahi upokonto'ori ira anu kanatuu?

¹¹ Kupauakomu, menteeano omami mpepau mongkona hapa anu tino'orimami ka mpesakosii mongkona hapa anu kinitamami, sine nahi imentarimao ponsakosiimami.

¹² Nahi impe'ala-alao, tempono Kupompauakomiu mongkona anu i wawontolino, kana'umpe komiu mpe'ala-alao, ba Kupompauakomiu mongkona anu i suruga?

¹³ Nahina maupo te'asa mia anu mewuatakoomo i suruga, sangkadio Ondae anu metii Iramo inso i suruga, onaemo i Ana Manusia.

¹⁴ Ka mengkena kana i Musa mompokomantande ule i pada one, kanatuu koa mbo'u i Ana Manusia asalakono Ira pinokomantande,

¹⁵ ka dompohawe tuwua anu nahina tampulaano sompo mia anu me'ala-ala Ira.

¹⁶ Hangano kanatuumo langkaino pompehohawa-Do Ue Ala i wawontolino andio, onaemo ka Dopeweengakono Ana-Do anu asa-asa, ka si domemate mia anu mpe'ala-ala Ira, tendeano mpohawe tuwua anu nahina tampulaano.

¹⁷ Hangano Ondae Ue Ala tumenao Ana-Do hawe i wawontolino komba ka Dobitarao wawontolino tendeano ka Dokaduduio.

¹⁸ Ba isema me'ala-ala Ira, nahi ta hinuku; ba isema nahi pompe'ala-ala, lano hinikuomo, hangano nahi pompe'ala-ala a nee-Do Ana-Do Ue Ala Anu Asa-asa.

¹⁹ Ka ndiomo pohuku atuu: Mewine haweomo i wawontolino, sine mia inehedopo wongi-wongia sekono mewine, hangano luwuno wineweudo mosa'o.

²⁰ Hangano ba isema moweweu mosa'o, i'o'aliaakono mewine ka nahi aiwa a mewine atuu, ka si tengkita luwuno wineweuno anu mosa'o atuu;

²¹ Sine ba isema moweweu anu mentee, onae aiwa a mewine, ka imengkaa, nine luwuno wineweuno iweweuo ndi Ondae Ue Ala.”

Ponsakosiino i Yohane mongkona Ondae i Yesu 3:22-36

²² Umarino atuu Ondae i Yesu lumako saru ana guru-Do i wita Yudea ka mo'ia Ira i ra'ai saru ondae ka Dopobaho.

²³ Sine maupo i Yohane mobaho koa mbo'u i Aino, umpeda i Salimi, hangano i tu'ai hadio uwoi, ka mehawe ira mia i tu'ai ka domebinaho,

²⁴ hangano i tempo atuu i Yohane napi wininso a laro torungku.

²⁵ Ka nteposisala iramo ana guruno i Yohane saru aasa to Yahudi mongkona pepokomemporia.

²⁶ Ka do'amba me'aiwa ndi Yohane ka dompotaeakono, ”Guru, mia anu perongamiu i asatowano koro Yarade ka anu mongkona Ondae mesakosii komiumo, mobaho Ira mbo'u ka luwuno mia melako ndi Ondae.”

²⁷ Sumangki i Yohane, ”Nahina maupo te'asa mia anu mokompo'ala hapa-hapa tiano koroino, tewala nahi pinoweeako inso i suruga.

²⁸ Omiumo isa'a mpokompesakosii, nine mepau akumo: Ongkue komba i Mesia, sine ongkue tinena mese'elungi Ira.

²⁹ Anu me'umbuo umbu ngkoroi beine, onaemo umbu ngkoroi tama; sine sambe'eno umbu ngkoroi tama, anu mentade i horino ka anu merorongeakono, tedoa mawongko aroano rumongeo suarano umbu ngkoroi tama atuu. Onaemo mokomawongkoo aroaku, ka kanandio-andio mawongkoomo ntu'u aroaku.

³⁰ Ondae asalakono kolangka-langkai-Do, sine ongkue asalakono kokode-kodeiku.

³¹ Isema anu hawe inso i wawono onaemo i wawono luwuno; isema anu inso i tolino, tewinso mia i tolino ka mepauako pau ntolino. Isema anu hawe inso i suruga onaemo i wawono luwuno.

³² Ondae mesakosii mongkona hapa anu kinita-Do ka anu rinonge-Do, sine nahina maupo te'asa mia tumarimao ponsakosii-Do atuu.

³³ Isema tumarimao ponsakosii-Do atuu, imangakuakono, nine Ondae Ue Ala anu mentee.

³⁴ Hangano isema tinena-Do Ue Ala, Ondaemo mohaweo pau-Do Ue Ala, hangano Ondae Ue Ala moweeako Ira Penaa-Do nahi tetidahi.

³⁵ Ondae i Ama mehohawao Ana-Do ka Dopeweengakonomo luwuakoano ndi Ondae.

³⁶ Ba isema me'ala-ala Ira Ana, onae mohawe tuwua anu nahina tampulaano, sine ba isema nahi petenunui Ira Ana, onae nahi ta kumitao tuwua, tendeano pontekudaako-Do Ue Ala kongko mpiha ndi onae.”