I YOHANE 21 - Wunta Mempori

Ondae i Yesu mepopokita a ana guru-Do a wiwi rano Tiberia 21:1-14

¹ Ka Do'amba i Yesu mepopokita mbo'u a ana guru-Do a wiwi rano Tiberia ka Dopepopokita kanandio.

² A wiwi rano atuu mpepumpu ira i Simo Peturu, i Toma anu nineeako i Didimu, i Natanae inso i Kana i wita Galilea, luwuno anano i Sebedeu ka orua ira ana guru susua.

³ Ipotaeako ira i Simo Peturu, ”Aku lumako mobuani.” Dompotaeakono, ”kami me'aiwa mentondako.” Mpelungka iramo ka dompe'ula a bangka, sine wongi atuu nahina hapa-hapa dompohawe.

⁴ Mansano mompu'uomo meene, Ondae i Yesu mentade a wiwi rano; sine nahi domento'ori Ira ana guru, nine Ondaemo i Yesu atuu.

⁵ Motae Ira i Yesu ndi ondae, ”Hei ana-Ku, hinaoke pe'inahu ndi omiu?” Mesangki ira, ”Nahina.”

⁶ Onaemo ka Dopotaeako ira i Yesu, ”Imentendeo buanimiu i koanano bangka, asalakono komiu mpohawe.” Ka do'amba mentendeo buanido ka nami dompokopadiio mbo'u hangano hadiono bou.

⁷ Motaeomo ana guru anu pinehohawa-Do i Yesu atuu ndi Peturu, ”Ondae i Ue atuu.” Mansano rumongeo i Peturu, nine Ondae i Ue atuu, onaemo ka ipokonao sangkano, hangano nahi pesangka, ka i'amba mentoa a rano.

⁸ Ana guru anu mehano aiwa mpebangka hangano komba me'olai ira inso a ntuwu wita, bara'ura butu rua etu hiku koa ka domempadiio buani anu bukeako bou atuu.

⁹ Tempono domehawe a ntuwu wita, domengkitao hinao waro api ka i wawono bou ka roti.

¹⁰ Dopotaeako ira i Yesu, ”Imewawaomo ba te'opia bou, anu pinongko'alamiu da sarai atuu.”

¹¹ Mewuatako i Simo Peturu a bangka ka i'amba padiio buani atuu a ntuwu wita, buke bou melolangkai: asa etu ka lima pulu ka otolu botoli hadiono, ka maupo ihadio kanatuu, buani atuu nahi teberi.

¹² Dopotaeako ira i Yesu, ”Ime'aiwamo ka impebaku.” Nahina i olodo ana guru atuu anu sapa mesikeno ndi Ondae, ”Isemake Omiu?” Hangano domento'orio, nine Ondaemo i Ue.

¹³ Ondae i Yesu lumako i arono, Do'alao roti ka Doweeako ira, kanatuu koa mbo'u bou atuu.

¹⁴ Onaemo atuu kopentoluno Dopepopokita i Yesu a ana guru-Do umari-Do mewangu inso i olodo mia mate.

Pakambi iramo bimba-Ku 21:15-19

¹⁵ Umarido mpebaku Dopotaeakono i Yesu i Simo Peturu, ”Simo, anano i Yohane, Nde upehohawa Aku koake laluaopo sekono ondae andio?” Isangki Ira i Peturu, ”Mentee Ue, Ito'orio, nine kupehohawa Komiu.” Dopotaeakono i Yesu, ”Pakambi iramo bimba-Ku.”

¹⁶ Dopotaeakono mbo'u i Yesu anu kompenduano, ”Simo, anano i Yohane, nde upehohawa Aku koake?” Isangki Ira i Peturu, ”Mentee Ue, Ito'orio, nine kupehohawa Komiu.” Dopotaeakono i Yesu, ”Pakambi iramo bimba-Ku.”

¹⁷ Dopotaeakono i Yesu anu kopentoluno, ”Simo, anano i Yohane, nde upehohawa Aku koake?” Masusaomo aroano i Peturu hangano pentolumo Dopotaeakono i Yesu, ”Nde upehohawa Aku koake?” Ka ipotaeako Ira, ”Ue, Ito'orio luwuakoano, Ito'orio, nine kupehohawa Komiu.” Dopotaeakono i Yesu, ”Pakambi iramo bimba-Ku.

¹⁸ Kupauakomu: Menteeano tempono da umongura meboo ntongako omuemu ka upelempa ba isuamo koa inehemu, sine tewala mota'ukomo, kotumasio kaemu ka mia susua ta umonggoko ka wawako a mpo'ianga anu nahi ukakahanio.”

¹⁹ Ka Dopauo mongkona andio mopoto'orio kana'umpe ba imate i Peturu ka ipokomaramba Ira Ue Ala. Umari-Do mepau kanandio Dopotaeakono i Peturu, ”Tonda Akumo.”

Ana guru anu pinehohawa-Do i Yesu 21:20-23

²⁰ Mansano mewolili i Peturu, ikitao nine ana guru anu pinehohawa-Do i Yesu kontongaano tumonda ira, onaemo ana guru anu i tempono kontongaado mpongkaa mperonga mentoro umpeda ndi Ondae i Yesu ka anu motae, ”Ue, isemake onae anu ta meweengako Komiu?”

²¹ Tempono ikitao i Peturu ana guru atuu, ipotaeako Ira i Yesu, ”Ue, hapake anu ta gagi ndi onae andio?”

²² Sumangki Ira i Yesu, ”Tewala inehe-Ku ka kongko tuwu ranta ka Kuhawe, komba to'oriamu atuu. Sine omue: tonda Akumo.”

²³ Ka tepaleleomo lele i olodo anu mpepe'etu atuu, nine ana guru atuu nahi ta mate. Sine Ondae i Yesu nahi Dopauakono i Peturu, nine ana guru atuu nahi ta mate, tendeano, ”Tewala inehe-Ku ka i kongko tuwu ranta ka Kuhawe, komba to'oriamu atuu.”

Pau pokotompa 21:24-25

²⁴ Onaemo ana guru anu mesakosii mongkona luwuno andio ka anu buriomo ka tomento'orio, nine pesakosiino atuu mentee.

²⁵ Da hadio mbo'u anu susua anu wineweu-Do i Yesu, sine tewala luwuno atuu asalakono ka ibinuri nte'o'asa, ka bara'ura wawontolino andio nahi poko'ulao luwuno wunta anu asalakono binuri atuu.