I YOHANE 2 - Wunta Mempori

Petaoa i Kana 2:1-11

¹ A oleo ko'otolu hinao petaoa i kota Kana i wita Galilea, ka ine-Do i Yesu kongko ira i tu'ai;

² Ondae i Yesu ka ana guru-Do me'inolu ira koa mbo'u a mpetaoa atuu.

³ Mansado memakuraako anggoro, motae ira ine-Do i Yesu ndi Ondae, ”Pingkoomo anggorodo.”

⁴ Dopotae i Yesu, ”Hapake inehemiu inso ndi Ongkue, ine? Napi haweako tempo-Ku.”

⁵ Sine ine-Do i Yesu motaeako ira anu mpompekakaako, ”Hapa anu imempinauako, imeweweuomo atuu!”

⁶ I tu'ai hinao onoo gumba anu pinatinda pewo'ohia montonda gaudo to Yahudi, asa gumba ihino otolu kusi.

⁷ Dopotaeako ira i Yesu anu mpompekakaako atuu, ”Ime'ihiiakono uwoi tebuke luwuno gumba atuudo.” Ka dome'ihiiomo ranta ka ibuke.

⁸ Ka Do'amba i Yesu motaeako ira, ”Kanandio-andio imentambuomo ka imewawao a mpetewawa gawe.” Ka do'amba mewawao.

⁹ Mansano menamio petewawa gawe atuu uwoi, anu gagiomo anggoro atuu – ka nahi to'orio ba isua insoano, sine anu mpompekakaako, anu mentambuo uwoi atuu, domento'orio – ipoboio umbu ngkoroi tama,

¹⁰ ka ipotaeakono, ”Sompo mia montawa anggoro moiko se'elu ka mansano menteende iramo mia mpo'inu, ka i'amba anu nahi moiko lahi; sine omue monaa anggoro anu moiko hawe kanandio-andio.”

¹¹ Mongkona atuu Doweweuo i Yesu i kota Kana i wita Galilea, gagi anu amba-ambano inso a luwuno petondoni-Do ka saru atuu Dopokomengkaaomo maramba-Do, ka dompe'ala-ala Ira ana guru-Do.

Ondae i Yesu i Kapenau 2:12

¹² Umarino atuu Ondae i Yesu lumako i Kapenau, mperonga saru ine-Do ka pepaekompo-Do ka ana guru-Do, ka mpo'ia ira i tu'ai butu ba opia oleo koa.

Ondae i Yesu mokomemporio Raha-Do Ue Ala 2:13-25 (Mat. 21:12-13; Mrk. 11:15-17; Luk. 19:45-46)

¹³ Tempono rangkuomo oleo langkai Pasado to Yahudi, Ondae i Yesu melungka lumako i Yerusale.

¹⁴ A laro Raha Mempori Dohawe ira mia mpebalu-balu sapi, bawaano bembe bimba ka marapatii, ka anu mpotobosi doi mpentoro i tu'ai.

¹⁵ Moweweu Ira ponsepi inso a ngkoloro ka Do'amba sumaari ira luwu inso a Raha Mempori saru luwuno bawaano bembe bimba ka sapido; doi pontobosi Doperawoakono a wita ka medado Dowalite ira.

¹⁶ Anu mpebalu-balu marapatii Dopotaeako ira, ”Ime'alao luwu andio inso i ndi'ai, si meweweuo raha-Do Ama-Ku gagi po'asaa.”

¹⁷ Ka dopasimpewowoloomo ana guru-Do nine hinao teburi, ”Pongkekewoi a raha-Miu mokomo'ai Aku.”

¹⁸ To Yahudi umewai Ira i Yesu, dompotae, ”Petondoni hapake Ipontisoakami, nine moiko Ipoweweu kanandio?”

¹⁹ Sumangki Ira i Yesu ndi ondae, ”Betao Raha-Do Ue Ala andio, ka i larono otolu oleo Aku wali wanguo.”

²⁰ Ka do'amba to Yahudi mpotaeako Ira, ”Pato pulu ka onoo nta'u domewanguo mia Raha-Do Ue Ala andio ka Komiu mokowanguo i larono otolu oleo?”

²¹ Sine Raha-Do Ue Ala anu tinoo-Do onaemo koroi-Do Ondae-Do.

²² Ka i'amba, umari-Do mewangu inso i olodo mia mate, ka do'amba mpokompewowoloo ana guruDo nine mongkona atuu Dopauomo, ka dompe'ala-alaomo Wunta Mempori ka pau anu Dopauomo i Yesu.

²³ Ka kontongaa-Do i Yerusale tempono oleo langkai Pasa, hadio mpompe'ala-ala a nee-Do, hangano domengkitaomo luwuno petondoni anu wineweu-Do.

²⁴ Sine Ondae i Yesu isa'a nahi Dope'ala-ala ira, hangano Doto'ori ira luwu,

²⁵ ka hangano nahi kinere maupo te'asa mia mesakosii ndi Ondae mongkona mia, hangano Doto'orio hapa anu hina i laro aroano mia.