I YOHANE 18 - Wunta Mempori

Ondae i Yesu rinako 18:1-11 (Mat. 26:47-56; Mrk. 14:43-50; Luk. 22:47-53)

¹ Umari-do i Yesu pauo luwuno atuu meluarako Iramo inso i tu'ai mperonga saru ana guru-Do ka domelako i asatowano koro Kidoro. I tu'ai hinao aasa bonde ka Dopewinso a bonde atuu mperonga saru ana guru-Do.

² I Yudasi, anu meweengako Ira i Yesu, ito'orio koa mbo'u po'ianga atuu, hangano Ondae i Yesu mararu dompempumpu i tu'ai saru ana guru-Do.

³ Onaemo ka ihawe mbo'u i Yudasi i tu'ai saru bawaano sorodadu ka anu mpodagai Raha-Do Ue Ala anu tinenado petewawado sando mpesomba ka to Parisi mpowawa lantera, pansona ka parewa mpetea.

⁴ Ka Ondae i Yesu, anu tumo'orio luwuno anu ta umalu Ira, lumako i arono ka Dopotaeako ira, ”Isemake anu inungkemiu?”

⁵ Mesangki ira, ”I Yesu to Nasare.” Dopotaeako ira, ”Ongkuemo ndio.” I Yudasi anu meweengako Ira mentade mbo'u i tu'ai saru ondae.

⁶ Tempono Dopotaeako ira, ”Ongkuemo andio,” mposuka iramo ka ntebangku a wita.

⁷ Onaemo ka Dopesikeno mbo'u, ”Isemake anu inungkemiu?” Dompotae, ”I Yesu inso i Nasare.”

⁸ Sumangki Ira i Yesu, ”Kupauakomiumo, Ongkuemo andio. Tewala Ongkue inungkemiu, impo'inee iramo ondae andio ka domelako.”

⁹ Kanadiomo ka i'inihii koa pau anu Dopauomo, ”Inso ndi ondae anu Iweea-Kune, nahina maupo te'asa mia Kupo'ineeo ka imate.”

¹⁰ Ka i'amba i Simo Peturu, anu mowawa ponai, ibutao ponai atuu, metebasiakono a atano Sando Mpesomba Langkai ka te'opu biri ngkoanano. Neeno ata atuu i Malakusu.

¹¹ Dopotaeakono i Yesu i Peturu, ”Tampio ponaimu atuu; kombake asalakono Aku uminuo ihino tonde anu Doweea-Kune i Ama?”

Ondae i Yesu i arono i Hanasi – I Peturu humapu Ira i Yesu 18:12-27 (Mat. 26:57-75; Mrk. 14:53-72; Luk. 22:54-71)

¹² Ka bawaano sorodadu saru petewawado ka anu mpodagai tinenado to Yahudi atuu merako Ira i Yesu ka pongu Ira.

¹³ Ka do'amba mewawa Ira amba-ambano ndi Hanasi onaemo ponino i Kayapa, anu gagi Sando Mpesomba Langkai a nta'u atuu;

¹⁴ ka i Kayapamo anu umari patudu ira to Yahudi, ”Mentuduopo ba imate asa mia tiado luwuno tongku.”

¹⁵ I Simo Peturu ka aasa ana guru susua tumonda Ira i Yesu. Ana guru atuu tumo'orio Sando mpesomba Langkai ka onae mewinso meronga saru Ondae i Yesu a kintala langkanaeno Sando Mpesomba Langkai,

¹⁶ sine i Peturu mo'ia i bungkuno umpeda pewowa. Ka ana guru susua hieno, anu tumo'orio Sando Mpesomba Langkai, mepau-pauakono beine anu modagai pewowa ka i'amba wawao i Peturu mewinso.

¹⁷ Onaemo ka ipotae beine anu modagai pewowa ndi Peturu, ”Komba omue mbo'uke ana guruno mia atuu?” Sumangki i Peturu, ”Naahi!”

¹⁸ Kontongaano atuu luwuno ata ka anu mpodagai Raha-Do Ue Ala mpompuuri iramo api halo, hangano morini tempo atuu, ka ondae mpentade meraho i tu'ai. I Peturu mbo'u mentade meraho i tu'ai meronga saru ondae.

¹⁹ Ka mompu'uomo Sando Mpesomba Langkai sumikeno Ira i Yesu mongkona ana guru-Do ka mongkona pompaguru-Do.

²⁰ Sumangki Ira i Yesu, ”Ongkue mepauakono wawontolino a manasaano: Ongkue wela mompaguru a luwuno raha tepumpua ka a Raha-Do Ue Ala, pepumpuado luwuno to Yahudi; Nahi Kuhori mepau mewuni-wuni.

²¹ Tembioke ka isikeno Aku? Isikeno iramo, anu merongeomo hapa anu Kupauako ira; mentee ntu'u, ondae mento'orio hapa anu pinau-Ku.”

²² Tempono Dopepau kanatuu, asa mia puu mpodagai anu mentade i tu'ai, itampeleo rupa-Do ka ipotae, ”Kanatuuke ba Isangki ira Sando Mpesomba Langkai?”

²³ Sumangki Ira i Yesu ndi onae, ”Tewala sala pau-Ku atuu, tisoa-Kune salano, sine tewala mentee pau-Ku atuu, tembio ka utampele Aku?”

²⁴ Onaemo ka ipetena i Hanasi wawa Ira kongko pongu ndi Kayapa, Sando Mpesomba Langkai atuu.

²⁵ I Simo Peturu da mentade meraho. Dompotaeakono mia i tu'ai, ”Komba omue mbo'uke aasa ana guru-Do?”

²⁶ Onae mehapu, ipotae, ”Naahi.” Motae aasa atano Sando Mpesomba Langkai, aasa pe'etuno ata anu tinebasino i Peturu birino, ”Komba omueke kukitako a bonde atuu meronga saru Ondae?”

²⁷ Ka mehapuomo mbo'u i Peturu ka tempo atuu kumokoroidoomo manu.

Ondae i Yesu i arono i Pilatu 18:28-38a (Mat. 27:1-2, 11-14; Mrk. 15:1-5; Luk. 23:1-5)

²⁸ Onaemo ka domewawa Ira i Yesu inso ndi Kayapa lumako a raha pobitaraa. Tempo atuu da mo'oru. Ondae nahi dompewinso a raha pobitaraa atuu, ka si dompokomokoburuo koroido, hangano ira mpongkaa kaanga Pasa.

²⁹ Onaemo pu'uno ka ipeluarako i Pilatu tepohaweako ira ka ipotae, ”Hapake imentuluriakono mia andio?”

³⁰ Domesangkio, ”Tewala Ondae komba asa mia anu moweweu mosa'o, nahi kami mpeweengako Ira ndi omiu!”

³¹ Motae i Pilatu ndi ondae, ”Ime'ala Iramo ka imebitara Ira montonda Songkamiu.” Dompotae to Yahudi atuudo, ”Nahi kime'ineheako mpopepate mia.”

³² Kanandiomo ka i'inihii koa pauDo i Yesu, anu pinau-Do mokomengkaao ba kana'umpe teweweuno ba Domate.

³³ Ka mekuleomo i Pilatu a raha pobitaraa, ka i'amba moboi Ira i Yesu ka isikeno Ira, ”Omiu andioke mokoledo to Yahudi?”

³⁴ Sumangki Ira i Yesu, ”Nde inso koa i aroamiuke ipauo atuu, ke hinao mia susua anu mompau komiu mongkona Ongkue?”

³⁵ Motae i Pilatu, ”Nde to Yahudi akuke Tongku-Miu isa'a ka petewawado sando mpesomba anu mpeweengaKomiu ndi ongkue; hapamoke anu wineweu-Miu?”

³⁶ Sumangki Ira i Yesu, ”Poparentaa-Ku komba inso i wawontolino andio; Tewala PoparentaaKu inso i wawontolino andio, manasa me'ewa iramo ata-Ku, ka si Kupineweengako a nto Yahudi, sine Poparentaa-Ku komba inso i ndi'ai.”

³⁷ Onaemo ka ipotaeako Ira i Pilatu, ”Gagi Omiumo mokole?” Sumangki Ira i Yesu, ”Omiu pauo, nine Ongkue mokole. Onaemo ka Kuhina ka onaemo ka Kuhawe i wawontolino andio, ka Kupesakosii mongkona menteea; sompo mia anu inso a menteea merorongeakono pau-Ku.”

^38a Ipotaeako Ira i Pilatu, ”Hapake menteea atuu?”

Ondae i Yesu hinuku mate 18:38b–19:16a (Mat. 27:15-31; Mrk. 15:6-20; Luk. 23:13-25)

^38b Umarino mepau kanandio, meluarakoomo mbo'u i Pilatu tepohaweako ira to Yahudi ka ipotaeako ira, ”Nahina kupohawe maupo hapa sala-Do.

³⁹ Sine ndi omiu hinao gau, nine a oleo Pasa aku motolaakomiu asa mia. Inehemiu koake, ba kupotolaakomiu mokoledo to Yahudi?”

⁴⁰ Mpebooli ira mbo'u, ”Komba Ondae, tendeano i Baraba!” I Baraba onaemo asa mia puu mporontu.