I YOHANE 17 - Wunta Mempori

Pekakai-Do i Yesu tiado ana guru-Do 17:1-26

¹ Kanandiomo Dopotae i Yesu. Ka Do'amba mentombu i langi ka Dopotae, ”Ama, haweomo tempono; Ipokomarambaomo Ana-Miu, ka Dopokomaramba Komiu Ana-Miu.

² Mengkena kana Ipoweeako Iramo pabawa a luwuno anu tuwu, kanatuu koa mbo'u Ira moweeako ira tuwua anu nahina tampulaano a luwuno anu Iweeako Iramo.

³ Ndiomo tuwua anu nahina tampulaano atuu, onaemo nine domento'ori Komiu, butu Omiu Ue Ala anu mentee, ka tumo'ori Ira i Yesu Kerisituu anu tinena-Miu.

⁴ Kupokomaramba Komiumo i tolino hangano Kupoko'umario anggaa anu Iwee Aku ka Kuweweuo.

⁵ Onaemo pu'uno, oo Ama, Ipokomaramba Akumo ndi Omiu saru marambaa anu ndi Ongkue i aro-Miu se'eluno napi hina wawontolino.

⁶ Kupokomengkaaomo nee-Miu a luwuno mia, anu Iwee Aku inso i wawontolino. Ondae atuu mia-Miu ka Iwee Akumo ka domentondaomo pau-Miu.

⁷ Kanandio-andio domento'orio, nine luwuno anu Iwee Aku atuu te'inso ndi Omiu.

⁸ Hangano luwuno pau anu pinohawe-Miu ndi Ongkue Kupohaweomo ndi ondae ka domentarimaomo. Domento'orio ntu'u, nine Ongkue hawe inso ndi omiu, ka dompe'ala-alao, nine Omiumo anu tumena Aku.

⁹ Kupekakaiako ira. Komba tiano wawontolino Kupekakai, sine tiado, anu Iwee Akumo, hangano ondae mia-Miu

¹⁰ ka luwuno mia-Ku onaemo mia-Miu ka mia-Miu onaemo mia-Ku, ka pinokomaramba Akumo ndi ondae.

¹¹ Ka nami Kukongko mbo'u i wawontolino, sine ondae da mekongko ira i wawontolino, ka aiwa Aku ndi Omiu. Oo Ama anu mempori, Ipekaria iramo a nee-Miu, onaemo nee-Miu anu Iwee Akumo, ka domegagi aasa kana Ontae.

¹² Tempono Kupe'asaako ira, Kupekaria ira a nee-Miu, onaemo nee-Miu anu Iwee Akumo; Kudagai iramo ka nahina maupo te'asa mia inso ndi ondae anu mate sangkadio onae anu Ipakosiomo ka imate, ka i'inihii koa anu teburi a Wunta Mempori.

¹³ Sine kanandio-andio, aiwa Aku ndi Omiu ka Kupauo luwuno andio tekonai da Kongko Aku i wawontolino, ka isompomo po'unde-Ku i larodo.

¹⁴ Kuweeako iramo pau-Miu ka wawontolino umo'aliaako ira, hangano ondae komba inso i wawontolino, mengkena kana Ongkue komba inso i wawontolino.

¹⁵ Komba Ku'emao, ka I'ala ira inso i wawontolino, sine ka Idagai ira inso ndi mosa'o.

¹⁶ Ondae komba inso i wawontolino, mengkena kana Ongkue komba inso iwawontolino.

¹⁷ Ipokomempori iramo a laro menteea; pau-Miu onaemo menteea.

¹⁸ Mengkena kana Itena Aku i wawontolino kanandio koa mbo'u Kutena ira i wawontolino;

¹⁹ ka hangano ondae Kupokomemporio koroi-Ku, ka domempinokomempori koa mbo'u a menteea.

²⁰ Ka komba butu tiado ondae andio Kupekakai, sine tiado mbo'u luwuno mia anu mpe'ala-ala Aku hangano pompaleledo;

²¹ ka domegagi luwu aasa, mengkena kana Omiu, oo Ama, i laro-Ku ka Ongkue i laro-Miu, ka dompo'ia mbo'u i laro-To, ka ipe'ala-alao wawontolino, nine Omiumo anu tumena Aku.

²² Ka Kuweeako iramo marambaa, anu Iweea-Kune, ka domegagi aasa, mengkena kana Ontae aasa koa:

²³ Ongkue i larodo ka Omiu i laro-Ku ka isoompo dontepe'asa, ka ito'orio wawontolino, nine Omiu anu tumena Aku ka nine Ipehohawa ira, mengkena kana Ipehohawa Aku.

²⁴ Oo Ama, inehe-Ku, maupo ba i sua Kupo'ia, ondae mbo'u mpe'asaa-Kune, ondae anu Iweea-Kunemo, ka domengkitao maramba-Ku anu Iweea-Kunemo, hangano Ipehohawa Akumo se'eluno napi pinokogagi wawontolino.

²⁵ Oo Ama anu moleo, lano nahi to'ori Komiu wawontolino, sine Kuto'ori Komiu, ka ondae andio domento'orio, nine Omiumo anu tumena Aku;

²⁶ ka Kupauomo nee-Miu ndi ondae ka Aku pauako ira, ka ikongko i larodo pompehohawa anu Iweea-Kune ka Ongkue i larodo.”