I YOHANE 16 - Wunta Mempori

Mompedato 16:1-4a

¹ ”Luwuno andio Kupauakomiu, ka si mengkodei aroa ka nahi mentarima Aku.

² Komiu meliniahako, tendeano ta hawe tempono nine sompo mia anu mepate komiu ira mpotae nine mpesomba ira ndi Ondae Ue Ala.

³ Ira mpoweweu kanandio, hangano nahi domento'orio moiko Ondae i Ama maupo Ongkue.

^4a Sine luwuno andio Kupauakomiu, ka impewowoloo tewala hawe tempono, nine umariomo Kupauakomiu.”

Anggaa Pontarero 16:4b-15

^4b ”Mongkona andio nahi Kupauakomiu inso amba-ambano, hangano tempo andio da kongko aku saru omiu,

⁵ sine kanandio-andio Aku lumako ndi Ondae anu tumena Aku, ka nahina maupo te'asa mia i olomiu anu mesikeno ndi Ongkue: Isuake ba Ilako?

⁶ Sine hangano Kupauakomiu mongkona atuu, onaemo pu'uno ka imasusa aroamiu.

⁷ Sine mentee anu Kupauakomiu andio: Mentuduopo ndi omiu, ba Kulako. Hangano tewala nahi Kulako, Pontarero atuu nahi Ira hawe ndi omiu, sine tewala lumako Aku, Aku tumena Ira ndi omiu.

⁸ Ka tewala hawe Ira, Ira mopoto'oriakono ntu'u wawontolino mongkona hala, menteea ka pobitaraa;

⁹ mongkona hala, hangano kongkodo nahi dompe'ala-ala Aku;

¹⁰ mongkona menteea, hangano Aku lumako ndi Ondae i Ama ka nahi komiu mengkita Aku mbo'u;

¹¹ mongkona pobitaraa, hangano anu pabawa i wawontolino andio hinukuomo.

¹² Da hadio rupa anu asalakono Kupauakomiu, sine kanandio-andio napi komiu mpokotembio.

¹³ Sine tewala hawe Ira, onaemo Penaa Menteea, Ondae Ira wawa komiu a luwuno menteea; hangano nahi Ira mepau inso a mpo'ehe-Do Ondae-Do, sine luwuakoano anu rinonge-Do onaemo anu Ira pauo ka Ira paleleakomiu luwuno anu ta hawe.

¹⁴ Ira mokomaramba Aku, hangano Ira paleleakomiu hapa anu tinarima-Do inso ndi Ongkue.

¹⁵ Luwuakoano anu ndi Ondae i Ama, Ongkue me'ueo; onaemo pu'uno ka Kupotae: Ira paleleakomiu hapa anu tinarima-Do inso ndi Ongkue.”

Masusaa anu mese'elungio poponangia 16:16-33

¹⁶ ”Saraimo koa ka nami komiu mengkita Aku mbo'u ka saraimo koa mbo'u ka komiu mengkita Aku.”

¹⁷ Rumongeo atuu ba opia ira inso a ana guru-Do mpepau-pau pada ondaedo, ”Hapake pengkonaano Dopepau ndi ontae: Saraimo koa ka nami komiu mengkita Aku ka saraimo koa mbo'u ka komiu mengkita Aku? Ka: Aku lumako ndi Ondae i Ama?”

¹⁸ Onaemo ka dompotae, ”Hapake pengkonaano Dopotae: Saraimo koa? Nahi tomento'orio hapa tinoo-Do.”

¹⁹ Doto'orio i Yesu, nine hinao anu ira mingki mpesikeno ndi Ondae, ka Do'amba motaeako ira, ”Onaeke impepau-pauako anu pinau-Ku hieno, onaemo: Saraimo koa ka nami imengkita Aku ka saraimo koa mbo'u ka komiu mengkita Aku?

²⁰ Kupauakomiu: Menteeano komiu mpengese ka mposabangi, sine wawontolino ta mo'unde; komiu mpompemasusa, sine pompemasusamiu ta bali gagi po'undea.

²¹ Aasa beine mompemasusa tempono ipe'ana, sine umarino me'anaakono anano, nami pewowoloo mbo'u marasaino, hangano mo'unde nine aasa mia hinaomo i wawontolino.

²² Kanandio koa mbo'u omiu kanandio-andio i'alukomiu pompemasusa, sine Aku koa kumita komiu mbo'u ka ta mawongko aroamiu ka nahina maupo te'asa mia anu mokorontuo mawongkomiu atuu inso ndi omiu.

²³ Ka a oleo atuu nahi komiu mpompesikenoako hapa-hapa ndi Ongkue. Kupauakomiu: Menteeano luwuakoano anu inemamiu ndi Ondae i Ama, Ira weeakomiu a nee-Ku.

²⁴ Hawe kanandio-andio napi hina maupo te'asa impo'ema a nee-Ku. Impo'emamo ka komiu mentarimao, ka isompomo po'undemiu.

²⁵ Luwuno andio Kupauakomiu a mpotundaano. Ta hawe tempono nami Aku mepauakomiu a mpotundaano, sine mepau a manasaano ndi omiu mongkona Ondae i Ama.

²⁶ A oleo atuu komiu mpekakai a neeKu. Ka komba Kupauakomiu nine Kupo'emaakomiu ndi Ondae i Ama,

²⁷ nde Dopehohawa komiu i Ama, hangano impehohawa Akumo ka mpe'ala-alao nine Ongkue hawe inso ndi Ondae Ue Ala.

²⁸ Ongkue aiwa inso ndi Ondae i Ama ka Kuhawe i wawontolino; Kubintao mbo'u wawontolino ka lumako ndi Ondae i Ama.”

²⁹ Dompotae ana guru-Do, ”Kitao, kanandio-andio manasa Ipepau ka nami pepau a mpotundaano.

³⁰ Kanandio-andio kimento'orio, nine Ito'orio luwuakoano ka siimo dompesikeno mia ndi Omiu. Onaemo pu'uno ka kimpe'ala-alao, nine Omiu hawe inso ndi Ondae Ue Ala.”

³¹ Sumangki Ira i Yesu ndi ondae, ”Mpompe'ala-ala komiumoke kanandio-andio?

³² Kitao, hawe tempono, tendeano haweomo, nine mensiniarawo komiu singge mia lumako a mpo'iangano onaeno ka imebinta Aku asa-asa-Ku. Sine komba asa-asa-Ku, hangano Ondae i Ama kumongkomi Aku.

³³ Luwuno atuu Kupauakomiu, ka impohawe rodoa ndi Ongkue. I wawontolino omiu memarasaiako poweweu nsa'oa, sine impokorosoo aroamiu, Kunangiomo wawontolino.”