I YOHANE 13 - Wunta Mempori

Ondae i Yesu wo'ohio karudo ana guru-Do 13:1-20

¹ Tempo atuu napi pinu'u oleo langkai Pasa, Doto'oriomo i Yesu, nine haweakoomo tempo-Do melimba inso i wawontolino andio ndi Ondae i Ama. Mengkena kana Dowela mehohawa ira ana guru-Do kanandiomo kanandio-andio Dopehohawa ira hawe a mpoko'ariano.

² Kontongaado mpongkaa mperonga, ka ipetanga-tangaakonomo i Mosa'o tinoono i laro aroano i Yudasi Karioti, anano i Simo, ka ipeweengako Ira.

³ Doto'orio i Yesu, nine luwuakoano Dopeweengakonomo Ama-Do ndi Ondae ka nine Dohawe inso ndi Ondae Ue Ala ka mekule ndi Ondae Ue Ala.

⁴ Ka i'amba mentade Iramo i Yesu ka Dolohuo lemba meloe-Do. Do'alao asa lewe sawu lena ka Dopetanggoakono a ntonga-Do,

⁵ ka Do'amba montawa uwoi a loea, ka Dopompu'u wo'ohiako ira karudo ana guru-Do ka Do'amba pahihiakono sawu a ntonga-Do atuu.

⁶ Ka hawe Iramo ndi Simo Peturu. Motae i Peturu ndi Ondae, ”Ue, Komiu wo'ohiakune karuku?”

⁷ Sumangki Ira i Yesu, ”Hapa anu wineweu-Ku, nahi uto'orio kanandio-andio, sine lembuino ka u'amba mokonto'orio.”

⁸ Motae i Peturu ndi Ondae, ”Nahi Komiu wo'ohiakune karuku hawe nahina tampulaano.” Sumangki Ira i Yesu, ”Tewala nahi Kuwo'ohiko, nahi komohawe tia ndi Ongkue.”

⁹ Motae i Simo Peturu ndi Ondae, ”Ue, si butu karuku, sine kaeku mbo'u ka uluku!”

¹⁰ Motae Ira i Yesu ndi onae, ”Ba isema medoloomo, siimo ipedolo mbo'u sangkadio wo'ohio karuno, hangano onae morinaomo luwu. Omiu mbo'u memorina komiumo, butu komba luwumiu.”

¹¹ Hangano Doto'orio, isema anu ta meweengako Ira. Onaemo pu'uno ka Dopotae, ”Komba luwumiu memorina.”

¹² Umari-Do wo'ohiako ira karudo, Dopokonao sangka-Do ka Dopekule a mpo'ianga-Do. Ka Do'amba motaeako ira, ”Impokonto'orio koake hapa anu umari Kuweweuakomiu?

¹³ Impoboia-Kune Guru ka Ue, ka paumiu atuu mentee ntu'u, hangano lano Ongkuemo Guru ka Ue.

¹⁴ Gagi tewala Kuwo'ohiakomiu karumiu, Ongkuemo anu Ue ka Gurumiu, ka omiu mbo'u asalakono imambe wo'ohi ngkaru;

¹⁵ hangano Kupoweeakomiumo aasa pandiri, ka imeweweuo koa mbo'u mengkena kana anu umariomo Kuweweuo ndi omiu.

¹⁶ Kupauakomiu: menteeano aasa ata komba mantandeopo sekono ueno, ke maupo aasa mia tinena sekonopo onae anu tumenao.

¹⁷ Tewala imento'orio luwuno andio, meme'ura komiumo, tewala imeweweuo.

¹⁸ Komba mongkona omiu luwu Kupepau. Kuto'orio, isema anu Kubinikiomo. Sine asalakono inihii anu teburi a Wunta Mempori andio: Mia anu mongkaa roti-Ku, itandeomo tundono ndi Ongkue.

¹⁹ Kupauakomiu kanandio-andio tempono napi gagi mongkona atuu, nde tewala gagiomo ka impe'ala-alao, nine Ongkuemo Miano.

²⁰ Kupauakomiu: Menteeano ba isema tumarimao mia anu tinena-Ku, itarima Aku, ka ba isema tumarima Aku, itarima Ira anu tumena Aku.”

Ondae i Yesu mopoto'oriakono i Yudasi 13:21-30 (Mat. 26:21-25; Mrk. 14:18-21; Luk. 22:21-23)

²¹ Umari-Do i Yesu mepau kanandio tedoa te'urense laro-Do, ka Do'amba motae, ”Kupauakomiu, menteeano asa mia i olomiu ta meweenga-Kune.”

²² Ana guru atuudo asa mia kumitao walino, mengkohali-hali ira isema anu tinoo-Do.

²³ Asa mia i olodo ana guru-Do i Yesu, onaemo ana guru anu pinehohawa-Do, mehonda umpeda ndi Ondae, i koana-Do.

²⁴ A ana guru atuu i Simo Peturu moweeakono petondoni ka ipotae, ”Pesikenomo isema tinunggai-Do!”

²⁵ Ana guru anu mentoro umpeda ndi Ondae i Yesu atuu mewolili ka ipotaeako Ira, ”Ue, isemake atuu?”

²⁶ Sumangki Ira i Yesu, ”Onaemo atuu, anu Aku moweeakono roti, umari-Ku umemoo.” Umari-Do mepau kanandio Do'alao roti, me'emoakono ka Doweeakono i Yudasi, anano i Simo Karioti.

²⁷ Ka umarino tumarimao i Yudasi roti atuu, ipewinsokio i Mosa'o. Onaemo ka Dopotaeakono i Yesu, ”Hapa anu komingki weweuo, pontuturakomo weweuo.”

²⁸ Sine nahina maupo te'asa mia inso i olodo anu mpentoro mpongkaa atuu mokonto'orio, hapa tinoo-Do i Yesu mepau kanatuu ndi Yudasi.

²⁹ Hangano i Yudasi mo'iniako ira doi hinao anu kolaro-laro, nine onae Dotenao i Yesu ka ipo'oli hapa-hapa anu kinere a mporame-ramea atuu, ke mompowee hapa-hapa a mia memongkokolaro.

³⁰ Itarimao i Yudasi roti atuu ka i'amba ronga lumako. I tempo atuu wongiomo.

Parenta wo'ohu 13:31-35

³¹ Umarino lumako i Yudasi, motae Iramo i Yesu. ”Kanandio-andio i Ana Manusia pinokomaramba ka Ondae Ue Ala pinokomaramba ndi Ondae.

³² Tewala Ondae Ue Ala pinokomaramba ndi Ondae, Ondae mbo'u Ue Ala mokomaramba Ira a ngkoroi-Do, ka Ira ronga mokomaramba Ira.

³³ Hei luwumiu ana-Ku, saraimo koa Kukongko meronga omiu. Komiu me'ungke Aku, ka kana anu Kupauako iramo to Yahudi: A mpo'ianga lakoa-Ku, nahi komiu mpokohawe, kanatuu koa mbo'u Kupauakomiu kanandio-andio.

³⁴ Kupoweeakomiu parenta wo'ohu, onaemo ka imambe pehohawa; mengkena kana Kupehohawa komiumo kanatuu koa mbo'u imambe pehohawa.

³⁵ Ba kanandio iramo mento'orio luwuno mia, nine omiumo ana guru-Ku, onaemo tewala mambe pehohawa komiu.”

Ondae i Yesu mopoto'oriakono i Peturu 13:36-38 (Mat. 26:31-35; Mrk. 14:27-31; Luk. 22:31-34)

³⁶ I Simo Peturu motaeako Ira i Yesu, ”Ue, isuake ba Ilako?” Sumangki Ira i Yesu, ”A mpo'ianga lakoa-Ku, nahi komokotonda Aku kanandio-andio, sine te'ipua kokoa tumonda Aku.”

³⁷ Ipotaeako Ira i Peturu, ”Ue, tembio ka nahi kupokotonda Komiu kanandio-andio? Aku meweengakono penaaku hangano Omiu!”

³⁸ Sumangki Ira i Yesu, ”Komeweengakono penaamu hangano Ongkue? Menteeano Kupauakomu: Napi kumokoroido manu, pentolumo uhapu Aku.”