I YOHANE 12 - Wunta Mempori

Ondae i Yesu inurapi i Betania 12:1-8 (Mat. 26:6-13; Mrk. 14:3-9)

¹ Onoo oleo napi haweako Pasa Ondae i Yesu hawe i Betania, po'iangano i Lasaru anu winangu-Do i Yesu inso i olodo mia mate.

² I tu'ai pinoweweako Ira pelimbua ka i Marita mompekakaako, ka asa mia anu metonda mongkaa saru Ondae i Yesu onaemo i Lasaru.

³ Ka i Maria mo'ala entonga timboka mina-mina narawasutu ntu'u anu masuli olino, ka i'amba lumanao karu-Do i Yesu ka ipahihiakono wuuno; ka mana mina-minaomo i asa laro raha atuu.

⁴ Sine i Yudasi Karioti, asa mia ana guru-Do i Yesu, anu ta ronga meweengako Ira, motae,

⁵ ”Tembio mina-mina narawasutu andio nahi inasa tolu etu dinare ka doino mewineeako mia memongkokolaro?”

⁶ Mongkona atuu ipauo komba hangano iperio ira mia memongkokolaro, tendeano hangano onae asa mia monako; mararu ipo'ala doi anu ninaa a laro ngkadu anu ininino.

⁷ Onaemo ka Dopotae i Yesu, ”Po'ineeomo ka iweweuo kanandio mewowoloo oleo kaburua-Ku.

⁸ Hangano mia memongkokolaro mekongko ira mpiha ndi omiu, sine Ongkue nahi Aku kongko mpiha ndi omiu.”

Morokoa ka dompepateo i Lasaru 12:9-11

⁹ Hadio to Yahudi merongeo, nine Ondae i Yesu kongko Ira i ra'ai ka domehawe komba butu hangano Ondae i Yesu, tendeano ira mengkitao mbo'u i Lasaru, anu Dowanguomo inso i olodo mia mate.

¹⁰ Ka do'amba memoroko petewawado sando mpesomba ira mpepateo mbo'u i Lasaru,

¹¹ nde hangano onae hadio to Yahudi mebinta ira ka mpompe'ala-ala ndi Ondae i Yesu.

Ondae i Yesu tinotowo i Yerusale 12:12-19 (Mat. 21:1-11; Mrk. 11:1-10; Luk. 19:28-38)

¹² Tisomono tempono domerongeo mia hadio anu mehawe merame-rameo gawe, nine Ondae i Yesu kontongaa-Do a nsala te'aro i Yerusale,

¹³ dome'ala ira lewe palemi, ka domelako mentotowo Ira saru mpeboo-booli, ”Hosana! Rinonso Iramo anu hawe a nee-Do i Ue, Mokoledo to Isaraeli!”

¹⁴ Ondae i Yesu mohawe aasa kalide mongura ka Do'amba mesawikio, kana hinao teburi,

¹⁵ ”Si doito, hei ana beine Sioni, kitaomo, Mokole-Miu hawe, mentoro a wawo asa anano kalide.”

¹⁶ Amba-ambano nahi dompokonto'orio ana guru-Do i Yesu mongkona atuu, sine umari-Do i Yesu pinokomaramba, dompokompewowoloomo, nine pau atuu mongkona Ondae, ka nine domeweweuako Iramo mbo'u.

¹⁷ Mia hadio anu peronga-Do tempono Dopoboio i Lasaru meluarako inso a ngkaburu ka Dowanguo inso i olodo mia mate, mpesakosii mongkona Ondae.

¹⁸ Onaemo pu'uno ka domelako mia hadio atuu mentotowo Ira, hangano domerongeo, nine Ondae anu weweuo kinohali-haliako atuu.

¹⁹ Onaemo ka dompepau-pau to Parisi pada ondaedo, ”Imengkitao liomiu, nine omiu nahina ntu'u hasilino, kitao, mehawe ira asa wawontolino mentonda Ira.”

Ondae i Yesu paleleo matea-Do 12:20-36

²⁰ I olodo anu mpelungka ira mpesomba a oleo langkai atuu, hinao ba opia ira to Yunani.

²¹ Mia atuudo melako ndi Pilipu, anu te'inso i Besaida i wita Galilea, ka do'amba mpotaeakono, ”Ue, kami mingki tepohaweako Ira i Yesu.”

²² Lumakoomo i Pilipu pauakono i Andarea; i Andarea ka i Pilipu mohaweo mbo'u ndi Ondae i Yesu.

²³ Sine Ondae i Yesu sumangki ira, Dopotae, ”Haweomo tempono i Ana Manusia pinokomaramba.

²⁴ Kupauakomiu: Menteeano tewala wuku gandu nahi tedonta a wita ka mate, onae asa wuku koa mpiha; sine tewala onae mate, ta mewua hadio.

²⁵ Ba isema kumekewoio penaano, onae ta tetadi penaano, sine ba isema nahi kekewoio penaano i wawontolino andio, onae ta mekariao tiano tuwua anu nahina tampulaano.

²⁶ Ba isema mekakaa-Kune, asalakono ka itonda Aku ka ba isua Kupo'ia, i tu'ai mbo'u ipo'ia anu mekakaa-Kune. Ba isema mekakaa-Kune Ira melangkaio i Ama.

²⁷ Kanandio-andio te'urense laro-Ku ka hapa anu Aku pauo? Ama, Ikadudui Akumo inso a tempo andio? Naahi, hangano onaemo pu'uno ka Kuhawe a tempo andio.

²⁸ Ama, Ipokomarambaomo nee-Miu!” Ka terongeomo suara inso i suruga, ”Kupokomaramba Iramo, ka Aku mokomaramba Ira mbo'u!”

²⁹ Mia hadio anu mpentade i tu'ai ka merongeo dompotae, nine unino rundu. Hinao mbo'u anu mpotae, ”Aasa mala'eka mepauako Ira.”

³⁰ Sumangki Ira i Yesu, ”Suara atuu terongeomo komba hangano Ongkue, tendeano hangano omiu.

³¹ Kanandio-andio kontongaano binitara wawontolino andio: kanandio-andio anu pabawa i wawontolino andio ira mentinende i bungkuno;

³² ka Ongkue, tewala tinande Aku inso i tolino, Aku dumii ira luwu mia me'aiwa ndi Ongkue.”

³³ Ndio Dopauo mokomengkaao kana'umpe pesalaano ba Domate.

³⁴ Ka do'amba mesangki mia hadio atuu, ”Kimerongeomo inso a songka Taura, nine i Mesia tuwu mpiha ranta nahina tampulaano; nde kana'umpe ka Ipotae, nine i Ana Manusia asalakono tinande? Isemake i Ana Manusia atuu?”

³⁵ Motae Ira i Yesu ndi ondae, ”Saraimo koa ikongko mewine i olomiu. Tempono mewine atuu kongko ndi omiu, impe'ala-alaomo, ka si pabawai komiu wongi-wongia; ba isema melempa a laro wongi-wongia, nahi to'orio ba isua lakoano.

³⁶ Impe'ala-alaomo mewine atuu, tempono mewine atuu kongko ndi omiu, ka imegagi anano mewine.” Umari-Do mepau kanandio, lumako Iramo i Yesu mewuniako ira.

Tembio to Yahudi ka nahi dompompe'ala-ala 12:37-43

³⁷ Ka maupo hadio anu kinohali-haliako Dopoweweu i Yesu i arono matado, sine nahi dompe'ala-ala Ira,

³⁸ ka i'inihii koa pau anu pinohaweno Nabi Yesaya, ”Ue, isemake anu me'ala-alao pompalelemami? Ka ndi semake kae pabawa-Do i Ue ipinokomengkaa?”

³⁹ Onaemo pu'uno ka nahi dompompe'ala-ala, hangano motaeomo mbo'u i Yesaya,

⁴⁰ ”Dopokomorawuomo matado ka mokomoteao aroado, ka si dompokitaako matado, ka si domento'oriakono aroado, ka do'amba mpepokule, ranta ka Kupokotompa ira.”

⁴¹ Mongkona andio ipauo i Yesaya, hangano ikitaomo maramba-Do ka mepauomo mongkona Ondae.

⁴² Sine hadio koa mbo'u i olodo petewawa anu mpe'ala-ala Ira, sine hangano to Parisi nahi manasa dome'akuio, ka si domeliniahako.

⁴³ Hangano inehedopo pelangkaino mia sekonopo pelangkai-Do Ue Ala.

Pau-Do i Yesu anu mobitara 12:44-50

⁴⁴ Sine mebooli Ira i Yesu Dopotae, ”Ba isema me'ala-ala Aku, komba ndi Ongkue ipompe'ala-ala, sine ndi Ondae, anu tumena Aku;

⁴⁵ ka ba isema kumita Aku, ikita Ira anu tumena Aku.

⁴⁶ Hawe Akumo i wawontolino gagi mewine, ka isompo mia anu me'ala-ala Aku, ka si po'ia a laro wongi-wongia.

⁴⁷ Ka tewala asa mia rumongeo pau-Ku, sine nahi weweuo, komba Ongkue gagi puu mpobitarano, hangano hawe-Ku komba ndio Aku hawe mobitara wawontolino, tendeano kumaduduio.

⁴⁸ Ba isema nahi tarima Aku ka nahi tarimao pau-Ku, onae hinaomo puu mpobitarano, onaemo pau anu Kupauomo, onaemo atuu anu ta gagi puu mpobitarano a tampulaano wawontolino.

⁴⁹ Hangano Kupepau komba inso a ngkoroi-Ku Ongkue-Ku, sine Ondae i Ama, anu tumena Aku, Ondaemo anu parenta Aku ka Kupauo hapa anu asalakono Aku pauo ka Aku mohaweo.

⁵⁰ Ka Kuto'orio, nine parenta-Do atuu onaemo tuwua anu nahina tampulaano. Gagi hapa anu pinau-Ku, Kupohaweo kana anu pinau-Do i Ama ndi Ongkue.”