I YOHANE 10 - Wunta Mempori

Puu pompakambi anu moiko 10:1-21

¹ ”Kupauakomiu: Menteeano isema anu mewinso a laro rahano bimba nahi telalo a mpewowa, sine momaru a rere watu, onae mia anu monako ka mia puu mporontu;

² sine isema anu mewinso telalo a mpewowa, onae puu pompakambi bimba.

³ Tiano anu modagai umungkahio pewowa ka bimba merongeo suarano ka ipoboi ira bimbano montonda needo nte'o'asa ka itaate ira mpeluarako.

⁴ Tewala iluarako iramo luwu bimbano, onae melempa i arodo ka bimba atuudo mentondao, hangano domento'orio suarano.

⁵ Sine mia susua manasa nahi domentondao, tendeano dompolaiakono, hangano suarado mia susua nahi domento'orio.”

⁶ Onaemo anu Dopauako ira i Yesu a mpotundaano, sine nahi dompokonto'orio hapa tinoo-Do mepau kanandio ndi ondae.

⁷ Ka pohona mbo'u Dopotae i Yesu, ”Kupauakomiu, menteeano Ongkuemo pewowa lumako a bimba atuudo.

⁸ Luwuno mia anu hawe se'elu sekono Ongkue, ondaemo mia mponako ka mporontu, ka bimba atuudo nahi domperorongeako ira.

⁹ Ongkuemo pewowa; ba isema mewinso mesala ndi Ongkue, onae ta tekadudui ka ta mewinso ka meluarako ka ipohawe pada ewo.

¹⁰ Anu monako hawe butu ta monako ka mompepate ka monsolangi; Ongkue hawe, ka dompohawe tuwua, ka domehaweo luwuno mare'ea.

¹¹ Ongkuemo Puu Pompakambi anu moiko. Puu Pompakambi anu moiko meweengakono penaano tiado luwuno bimbano;

¹² sine mia tinambo anu komba puu pompakambi, ka komba anu me'ue ira bimba atuu, tempono ikitao serigala hawe, ibinta ira luwu bimba atuu ka i'amba molai, ranta ka ipomperangkami serigala atuu ka sumiarawo ira bimba atuu.

¹³ Onae molai hangano onae mia tinambo ka nahi perio ira bimba atuu.

¹⁴ Ongkuemo Puu Pompakambi anu moiko ka Kuto'ori ira bimba-Ku ka bimba-Ku domento'ori Aku

¹⁵ mengkena kana Ondae i Ama Doto'ori Aku ka Ongkue Kuto'ori Ira i Ama, ka Kupeweengakono penaa-Ku tiado bimba-Ku.

¹⁶ Hinao mbo'u ndi Ongkue bimba susua, anu komba inso a rahado bimba andio; bimba atuudo asalakono Kutaate ira mbo'u ka ira merongeo suara-Ku ka ira megagi asa bawaa ka aasa puu pompakambi.

¹⁷ Ondae i Ama Dopehohawa Aku, hangano Kupeweengakono penaa-Ku ka Kuwali tumarimao.

¹⁸ Nahina maupo te'asa mia umalao inso ndi Ongkue, tendeano Kupeweengakono montonda po'ehe-Ku Ongkue-Ku. Ongkue pabawa meweengakono ka pabawa wali umalao. Onaemo andio anggaa anu tinarima-Ku inso ndi Ondae Ama-Ku.”

¹⁹ Ka gagiomo mbo'u teposisalaa i olodo to Yahudi hangano pau atuu. Hadio i olodo mpotae,

²⁰ ”Ipewinsoki Ira onitu nsa'o ka mekombe; tembio ka imperorongeako Ira?”

²¹ Anu mehano mpotae, ”Atuu komba pauno mia pinewinsokino onitu nsa'o; polioke onitu nsa'o mokontewileo matano mia morawu?”

Ondae i Yesu nahi domebehe ira to Yahudi 10:22-39

²² Nahi tehine haweakoomo oleo langkai Poronsoa Raha-Do Ue Ala i Yerusale; tempo atuu tempo morini.

²³ Ka Ondae i Yesu melempa-lempa a Raha-Do Ue Ala, a ntambino i Salomo.

²⁴ Onaemo ka domelimbu Ira to Yahudi ka dompotaeako Ira, ”Opiapo mbo'u tehineno Ipo'inee kami mentuwu a laro bulalingo? Tewala Omiu i Mesia, Ipauakami temanasa.”

²⁵ Sumangki Ira i Yesu, ”Kupauakomiumo, sine nahi impe'ala-alao; luwuno anggaa anu Kuweweuo a nee-Do Ama-Ku, onaemo anu sumakosiio mongkona Ongkue,

²⁶ sine nahi impe'ala-alao, hangano omiu nahi ntewinso bimba-Ku.

²⁷ Luwuno bimba-Ku domperorongeakono suara-Ku ka Kuto'ori ira ka domentonda Aku,

²⁸ ka Kupoweeako ira tuwua anu nahina tampulaano ka manasa nahi ira memate hawe nahina tampulaano ka maupo te'asa mia nahi ta hina rumontu ira inso a ngkae-Ku.

²⁹ Ondae Ama-Ku, anu meweengako ira ndi Ongkue, langkaiopo sekono isemamo koa, ka maupo te'asa mia nahi ta mokorontuo inso a ngkae-Ku.

³⁰ Ongkue ka Ondae i Ama aasa koa.”

³¹ Pohona mbo'u dompo'ala watu to Yahudi ta wuno-Do i Yesu.

³² Motae Ira i Yesu ndi ondae, ”Hadio anggaa moiko anu te'inso ndi Ondae Ama-Ku anu Kupopokitaakomiu; hangano anggaa isuake i olono ka komiu mewunoa-Kune watu?”

³³ Mesangki ira to Yahudi atuu, ”Komba hangano aasa anggaa moiko ka kami mewuno Komiu, tendeano hangano ipepaukiako Ira Ue Ala ka hangano Omiu, maupo butu koa tolino, Ipongkenaakono koroi-Miu saru Ondae Ue Ala.”

³⁴ Dopotaeako ira i Yesu, ”Komba hinaoke teburi a wunta songka Tauramiu: Mepau Akumo: Omiumo pinesombai susua?

³⁵ Tewala ondae, ndi sema ipinohawe pau tuu, nineeako pinesombai susua – sine Wunta Mempori asalakono inihii –,

³⁶ nde da komiu mpotaeako Ira anu pinokomempori-Do i Ama ka anu Dotena Iramo aiwa i wawontolino: Ipepaukiako Ira Ue Ala! Hangano mepau Akumo: Ongkue Ana-Do Ue Ala?

³⁷ Tewala nahi kuweweu ira anggaa-Do Ama-Ku, siimo impe'ala-ala Aku,

³⁸ sine tewala Kuweweuo ka nahi behe mpe'ala-ala Aku, impe'ala-alaomo luwuno wineweu atuu, ka imento'oriomo ka mpokohawe laroo, nine Ondae i Ama i laro-Ku ka Ongkue i laro-Do i Ama.”

³⁹ Pohona mbo'u dompo'arahako rumako Ira, sine tola Ira inso a ngkaedo.

Ondae i Yesu i asatowano koro Yarade 10:40-42

⁴⁰ Ka Do'amba i Yesu lumako mbo'u i asatowano koro Yarade, a mpobahoano i Yohane i ndi'upua, ka Do'amba mo'ia i tu'ai.

⁴¹ Ka hadio mia mehawe ndi Ondae ka dompotae, ”I Yohane lano nahi poweweu maupo te'asa petondoni, sine luwuno anu horio pauo i Yohane mongkona mia andio mentee.”

⁴² Ka hadio mia i tu'ai mpe'ala-ala Ira.