I YOHANE 1 - Wunta Mempori

Pau anu gagiomo mia 1:1-18

¹ Amba-ambano onaemo Pau; Pau atuu meronga saru Ondae Ue Ala ka Pau atuu Ondaemo Ue Ala.

² Ondae amba-ambano meronga saru Ondae Ue Ala.

³ Luwuakoano Ondae mokogagio ka ba nahi Ondae nahina maupo te'asa anu gagiomo inso a luwuno anu pinokogagiomo.

⁴ I laro-Do hinao tuwua ka tuwua atuu onaemo mewineno mia.

⁵ Mewine atuu mewanta a laro wongi-wongiano ka wongi-wongiano atuu nahi pabawaio.

⁶ Haweomo asa mia tinena-Do Ue Ala, neeno i Yohane;

⁷ onae hawe gagi sakosii sumakosiio mongkona mewine atuu, ka dogagi mpompe'ala-ala luwu mia hangano onae.

⁸ Onae komba mewine atuu, sine onae asalakono sumakosiio mongkona mewine atuu.

⁹ Mewine anu menteeano, anu wantahio sompo mia, kontongaa-Do hawe i wawontolino.

¹⁰ Kongko Iramo i wawontolino ka wawontolino Ondae mokogagio, sine wawontolino nahi to'ori Ira.

¹¹ Hawe Ira a mia-Do, sine mia-Do atuudo nahi domentarima Ira.

¹² Sine luwuno mia anu tumarima Ira Dopoweeako ira pabawa ka domegagi ana-Do Ue Ala, onaemo ondae anu mpompe'ala-ala a nee-Do;

¹³ Mia anu mempine'anaako komba inso a rea ke inso a ngkoroi, komba mbo'u po'eheno koroi hangano po'eheno aasa tama, tendeano inso ndi Ondae Ue Ala.

¹⁴ Pau atuu gagiomo mia, ka mo'ia i oloto, ka tomengkitaomo maramba-Do, onaemo marambaa anu Dowineeako gagi Ana-Do i Ama Anu Asa-asa, buke pompehohawa ka menteea.

¹⁵ I Yohane mesakosii mongkona Ondae ka mebooli, ipotae, ”Ondaemo andio, anu tinooku tempono kupotae: Umarino ongkue Ira hawe anu mese'elungi aku, hangano napi kukongko Ondae kongko Iramo.”

¹⁶ Hangano inso a bukeako-Do luwuto mpontarima kitamo pe'aroa hangano pe'aroa;

¹⁷ hangano songka Taura inso ndi Musa, sine pe'aroa ka menteea hawe inso ndi Ondae i Yesu Kerisituu.

¹⁸ Nahina maupo te'asa mia anu horikumita Ira Ue Ala; sine Ana-Do Ue Ala Anu Asa-asa, anu kongko a mpo'awia-Do i Ama, Ondaemo anu mokomengkaa Ira.

Ponsakosiino i Yohane mongkona koroino onaeno 1:19-28 (Mat. 3:1-12; Mrk. 1:1-8; Luk. 3:3-6, 15-17)

¹⁹ Ka ndiomo ponsakosiino i Yohane tempono to Yahudi inso i Yerusale mpontena ba opia ira sando mpesomba ka to Lewi ndi onae ka domensikenoo, ”Isemake omue?”

²⁰ Imangakuakono ka nahi pegaupi, ipotae, ”Ongkue komba i Mesia.”

²¹ Ka do'amba mensikenoo, ”Tewala kanatuu, isemake omue? I Elia?” Ka isangki, ”Naahi!” ”Omueke nabi anu ta hawe?” ka isangki, ”Naahi!”

²² Onaemo ka dompotaeakono, ”Isemake omue? Hangano asalakono kami mesangki ira anu mentena kami. Hapake potaemu mongkona koroimu?”

²³ Isangki ira, ”Ongkuemo suarano mia anu meboo-booli i pada one: Pokoleoako Iramo i Ue sala! Kana anu ipauomo Nabi Yesaya.”

²⁴ Ka i olodo mia anu mentinena atuu hinao ba opia ira to Parisi.

²⁵ Mpesikeno ira ndi onae, dompotae, ”Tembio ka upobaho, tewala omue komba i Mesia, komba i Elia, ka komba nabi anu ta hawe?”

²⁶ I Yohane sumangki ira, ipotae, ”Ongkue mobahoako uwoi; sine i tonga-tongamiu mentade Ira anu nahi imento'ori Ira,

²⁷ onaemo Ondae, anu hawe lembui sekono ongkue. Maupo kumaleako Ira onggono sapatu-Do nahi pototoku.”

²⁸ Gagiano atuu i Betania anu i asatowano koro Yarade, a mpobahoano i Yohane.

I Yohane metiso ndi Ondae i Yesu 1:29-34

²⁹ Tisomono i Yohane kumita Ira i Yesu aiwa ndi onae ka ipotae, ”Kita Iramo Ana bimba-Do Ue Ala, anu umoninio halano wawontolino.

³⁰ Ondaemo anu tinooku tempono kupotae: Umarino ongkue Ira hawe asa mia, anu mese'elungi aku, hangano kongko iramo se'eluno ongkue.

³¹ Ka maupo ongkue amba-ambano nahi kuto'ori Ira, sine onaemo ka kuhawe ka mobahoako uwoi, ka dopinokomengkaa a nto Isaraeli.”

³² Ka i Yohane mesakosii, ipotae, ”Kukitaomo Penaa metii inso i langi kana marapatii, ka mo'ia i wawo-Do.

³³ Ka maupo ongkue nahi kuto'ori Ira, sine Ondae, anu tumena aku mobahoako uwoi, mepau Iramo ndi ongkue: Tewala ukitao Penaa atuu metii i wawono asa mia ka mo'ia i wawo-Do, Ondaemo atuu anu Ira mobahoako Penaa Mempori.

³⁴ Ka kukita Iramo ka mesakosii: Ondaemo andio Ana-Do Ue Ala.”

Ana guru-Do i Yesu anu amba-ambano 1:35-51

³⁵ Tisomo i Yohane mentade mbo'u i tu'ai saru orua mia ana guruno.

³⁶ Ka mansano kumita Ira i Yesu telalo, ipotae, ”Kita Iramo Ana bimba-Do Ue Ala!”

³⁷ Ana guru orua ira atuu rumongeo hapa anu pinauno atuu, ka do'amba lumako tumonda Ira i Yesu.

³⁸ Sine mewolili Ira i Yesu i bungku-Do. Dokitao, nine dotonda Ira ka Do'amba motaeako ira, ”Hapake inungkemiu?” Dopotae ndi Ondae, ”Guru, isuake Ipo'ia?”

³⁹ Dopotaeako ira, ”Aiwamo ka ikitao.” Aiwa iramo ka dokitao ba isua Dopo'ia, ka oleo atuu mo'ia ira meronga saru Ondae; tempo atuu bara'ura langku opaa.

⁴⁰ Asa mia i olodo mia orua ira anu rumongeo pauno i Yohane ka do'amba tumonda Ira i Yesu onaemo i Andarea, pepaekompono i Simo Peturu.

⁴¹ I Andarea amba-ambano tepohaweakono i Simo, pepaekompono, ka ipotaeakono, ”Kintepohaweako Iramo i Mesia (pengkonaano: i Kerisituu).”

⁴² Iwawao ndi Ondae i Yesu. Mengkita Ira i Yesu ndi onae ka Dopotae, ”Omue i Simo, anano i Yohane, konineeako i Kepa (pengkonaano: Peturu).”

⁴³ Tisomono Ondae i Yesu mo'asao aroa-Do Ira lumako i Gelilea. Dotepohaweakono i Pilipu, ka Dopotaeakono, ”Tonda Akumo!”

⁴⁴ I Pilipu atuu inso i Besaida, kotano i Andarea ka i Peturu.

⁴⁵ I Pilipu tepohaweakono i Natanae ka ipotaeakono, ”Kintepohaweako Iramo, anu pinauno i Musa a wunta Taura ka pinaudo nabi, onaemo Ondae i Yesu, anano i Yusupu inso i Nasare.”

⁴⁶ Motae i Natanae ndi onae, ”Nde ta koa hinake anu moiko hawe inso i Nasare?”

⁴⁷ Motae i Pilipu ndi onae, ”Aiwa ka ukita Ira!” Dokitao i Yesu i Natanae aiwa ndi Ondae, ka Do'amba mepau mongkona onae: Kitao, ndiomo asa to Isaraeli ntu'u, nahi molengku aroano!

⁴⁸ Motae i Natanae ndi Ondae, ”Kana'umpe ka Ito'ori aku?” Dosangkio i Yesu, ”Napi poboiko i Pilipu, Kukitakomo a ntoto ngkeu ara.”

⁴⁹ Motae i Natanae ndi Ondae, ”Guru, Omiu Ana-Do Ue Ala, Omiu Mokoledo to Isaraeli!”

⁵⁰ Sumangki Ira i Yesu, Dopotae, ”Kupauakomu: Hangano Kukitako a ntoto ngkeu ara, onaemo ka upompe'ala-ala? Kokumita ira anu lalu langkai sekonopo atuu”

⁵¹ Ka Do'amba i Yesu motaeakono, ”Kupauakomu, menteeano kokumitao langi te'ungkahi ka mala'eka-Do Ue Ala ira mpetii ka mpewuatako ndi Ana Manusia.”