I MATIU 9 - Wunta Mempori

Mia luuka pinokotompa 9:1-8 (Mrk. 2:1-12; Luk. 5:17-26)

¹ Umarino atuu me'ula Iramo i Yesu a laro bangka ka Do'amba mesakiako. Ka Do'amba hawe a ngkota-Do.

² Ka domewawaomo mia ndi Ondae aasa mia luuka anu kombole-mbole a mpoturiano. Mansa-Do kumitao i Yesu pompe'ala-alado, mepau Iramo a mia luuka atuu, ”Pe'ala-alaomo, hei ana-Ku, halamu inampuniomo.”

³ Onaemo ka dompotae ba opia ira anu mponto'ori Taura i laro aroado, ”Ipepaukiako Ira Ue Ala.”

⁴ Sine Doto'orio i Yesu pinewowolodo, ka Do'amba mepau, ”Tembio ka impompewowolo anu mosa'o i laro aroamiu?

⁵ Isuake anu lalu moruana, motae: Halamu inampuniomo, ke motae: Pewangumo ka pelempamo?

⁶ Sine ka imento'orio, nine i wawontolino andio i Ana Manusia pabawa mo'ampuni hala” — ka i'amba mepau Iramo a mia luuka atuu —, ”Pewangumo, tandeomo poturiamu ka pekulemo i rahamu!”

⁷ Ka mewanguomo mia atuu ka ipekule.

⁸ Ka mia hadio anu mengkitao anu gagi atuu medoito ka do'amba me'unde-unde Ira Ue Ala anu mompowee Iramo pabawa kanatuu a mia.

I Matiu puu popumpu sima'ulu tumonda Ira i Yesu 9:9-13 (Mrk. 2:13-17; Luk. 5:27-32)

⁹ Mansa-Do lumako i Yesu inso i tu'ai, Dokitao aasa mia anu meneeako i Matiu mentoro a kantoro sima'ulu, ka Do'amba motaeakono, ”Tonda Akumo.” Onaemo ka ipentade i Matiu ka i'amba tumonda Ira.

¹⁰ Ka i'amba tempono Ondae i Yesu mongkaa a rahano i Matiu, mehawe iramo hadio puu popumpu sima'ulu ka mia ntehala ka mpongkaa mperonga-ronga saru Ondae ka ana guru-Do.

¹¹ Tempono domengkitao to Parisi anu gagi atuu, dompotaeako iramo ana guru-Do i Yesu, ”Tembio gurumiu ka Dopongkaa mperonga-ronga saru puu popumpu sima'ulu ka mia ntehala?”

¹² Dorongeo i Yesu ka Dopotae, ”Komba mia madoo anu mongkere sando, sine mia mahaki.

¹³ Gagi imelakomo ka impepaguruakonomo pengkonaano pau andio: Anu inehe-Ku onaemo pe'aroa ka pompehohawa ka komba pesomba, hangano hawe-Ku komba aiwa mompoboi mia mentee, tendeano mia tehala.”

Mongkona mempuasa 9:14-17 (Mrk. 2:18-22; Luk. 5:33-39)

¹⁴ Ka i'amba mehawe iramo ana guruno i Yohane ndi Ondae i Yesu ka dompotae, ”Tembio omami ka to Parisi mempuasa, sine ana guru-Miu naahi?”

¹⁵ Dosangki ira i Yesu, ”Polioke luwuno sambe'eno umbu ngkoroi tama mpompemasusa kontongaano umbu ngkoroi atuu kongko saru ondae? Sine ta hawe tempono umbu ngkoroi atuu inala inso ndi ondae ka i tempomo atuu ira mempuasa.

¹⁶ Nahina maupo te'asa mia motompeliako asa nsore sawu anu wo'ohu a lemba anu laano, hangano tewala kanandio sawu potompeli atuu ta berio lemba atuu, ka i'amba kolangka-langkaino teberino.

¹⁷ Kanatuu koa mbo'u anggoro anu sarai nahi inihii a laro ngkadu kuli anu laano, hangano tewala kanandio kadu atuu ta teberi ranta ka ite'uwu anggoro atuu ka kadu mbo'u atuu teberi-beri. Sine anggoro anu sarai domenaao mia a laro ngkadu anu wo'ohu koa mbo'u, ka ba kanandio tepekaria oruano.”

Anano petewawa a raha tepumpua Beine anu mahaki merea 9:18-26 (Mrk. 5:21-43; Luk. 8:40-56)

¹⁸ Kontongaa-Do i Yesu mepau kanatuu ndi ondae, haweomo asa mia petewawa a raha tepumpua, ka i'amba mesombai Ira ka ipotae: ”Anaku beine da sarai imate, sine I'aiwamo ka inaao kae-Miu i wawono, asalakono ta tuwu.”

¹⁹ Mentade Iramo i Yesu ka tumondao mia atuu mperonga saru luwuno ana guru-Do.

²⁰ I tempo atuu aasa beine anu hopulu ka orua nta'umo tehineno imahaki merea aiwa rumangkuhi Ira i Yesu inso i bungku-Do ka i'anggao wuakino lemba meloe-Do.

²¹ Hangano potaeno i laro aroano, ”Maupo butu ku'anggao lemba meloe-Do, aku tompa.”

²² Sine Ondae i Yesu mewolili ka Dokitao saru motae, ”Pokorosoo aroamu, hei ana-Ku, ikaduduikomo pompe'ala-alamu.” Ka mompu'u tempo atuu tompaomo beine atuu.

²³ Tempono Dohawe i Yesu a rahano petewawa a raha tepumpua atuu ka kumita ira anu mpompuuri siloli ka mia hadio mpohohoi,

²⁴ motae Iramo, ”Imelakomo, hangano nana'ote andio komba mate, sine moturi.” Sine dompengingisii Ira.

²⁵ Mansado mensinaari mia hadio, mewinso Ira i Yesu ka Do'inio kaeno nana'ote atuu, ka i'amba mewanguomo nana'ote atuu.

²⁶ Ka tepaleleomo mongkona anu gagi atuu a luwuno wita atuu.

Ondae i Yesu mokotompao matado orua mia anu morawu 9:27-31

²⁷ Tempono Dopotilaloakono i Yesu pelempaa-Do inso i ra'ai, orua mia morawu tumondari Ira saru mebooli ka dopotae, ”Ipehohawa kamimo, hei anano i Daudi.”

²⁸ Mansa-Do mewinso i Yesu a laro asa raha, aiwa iramo orua mia morawu atuu ndi Ondae ka Dopotaeako ira i Yesu, ”Ipe'ala-alaoke, nine Aku mokoweweuo?” Dosangki Ira, ”Humbee Ue, kipe'ala-alao.”

²⁹ Ka Do'amba i Yesu umanggao matado ka Dopotae, ”Gagiomo ndi omiu montonda pompe'ala-alamiu.”

³⁰ Ka tewileomo matado. Ka Do'oliwi ira ntu'u i Yesu, Dopotae, ”Itangkoroo ka si hina maupo te'asa mia tumo'orio mongkona andio.”

³¹ Sine ondae meluarako ka dopalele Ira a luwuno wita atuu.

Asa mia beebe pinokotompa 9:32-34

³² Kontongaado meluarako mia anu umari morawu atuu, winawaomo ndi Ondae i Yesu asa mia beebe anu pinewinsokino onitu nsa'o.

³³ Ka mansano linuarako onitu nsa'o atuu, mokompepauomo mia beebe atuu. Ka mengkohali-hali iramo mia hadio, dompotae, ”Anu kanandio napi dohori mia mpokita i Isaraeli.”

³⁴ Sine dompotae to Parisi, ”Saru pabawano tadulakodo onitu nsa'o Iponsaariako onitu nsa'o.”

Pompehohawa-Do i Yesu a mia hadio 9:35-38

³⁵ Kanandiomo Dosompoo i Yesu luwuno kota ka inia; Ondae mompaguru a luwuno raha tepumpua ka paleleo Lele Mawongkoa mongkona Poparentaa Suruga saru mokotompao luwuno haki ka molemaa.

³⁶ Kumita ira mia hadio atuu, teleluomo aroa-Do i Yesu mehohawa ira, hangano memokendo ka ntepo'inee kana bimba anu nahina pakambi ira.

³⁷ Ka Dopotaeako ira ana guru-Do, ”Sowia lano hadio, sine anu mo'angga tedei.

³⁸ Onaemo pu'uno impo'emamo a ueno sowia, ka Dopontena anu mpo'angga a nsowia atuu.”