I MATIU 8 - Wunta Mempori

Ondae i Yesu mokotompao asa mia anu mahaki ngkuli mesaki 8:1-4 (Mrk. 1:40-45; Luk. 5:12-16)

¹ Mansa-Do metii i Yesu inso a pongku, mia hadio ntehuhu tumonda Ira.

² Ka haweomo asa mia anu mahaki haki ngkuli mesaki ndi Ondae, ka i'amba menggolontu mesomba ndi Ondae ka ipotae, ”Ue, ba behe Komiu Ue, Omiu polio mokotompa aku.”

³ Ka Do'amba i Yesu umanggao mia atuu ka Dopotae, ”Behe Aku, omue gagimo tompa.” I tempo koa mbo'u atuu tompaomo mia atuu inso a haki ngkuli mesaki.

⁴ Ka Do'amba i Yesu motaeakono, ”Pewowoloo, si pauo mongkona andio maupo ndi sema, sine lakomo popokitaomo koroimu a nsando mpesomba ka pesombaakono pesomba kana peparentano i Musa, gagi pengkitaado.”

Ondae i Yesu mokotompao atano asa tadulako i Kapenau 8:5-13 (Luk. 7:1-10; Yoh. 4:46-53)

⁵ Tempono Dopewinso i Yesu i Kapenau, haweomo asa tadulako tepohaweako Ira ka mo'ema ndi Ondae,

⁶ ”Ue, ataku tepombole i raha hangano mahaki luuka ka onae tedoa mompemarasai.”

⁷ Dopotae i Yesu ndi onae, ”Aku koa aiwa mokotompao.”

⁸ Sine sumangki tadulako atuu ndi Ondae, ”Ue, nahi pototoku tumarima Komiu Ue a laro rahaku, Ipauomo koa te'asa mpali pau, asalakono ataku atuu ta tompa.

⁹ Hangano ongkue andio mia pinosongkaako ka i totoku hinao sorodadu. Tewala kupotaeakono asa sorodadu atuu: Lako! asalakono onae lumako, ka a asa mia mbo'u: Aiwa! Asalakono onae aiwa, ke a ataku mbo'u: Anggaomo andio! Asalakono i'anggao.”

¹⁰ Mansa-Do rumongeo i Yesu mongkona atuu, kohali-hali Iramo ka Dopotae ndi ondae anu tumonda Ira, ”Kupauakomiu, menteeano pompe'ala-ala langkai kanandio nahi Kuhori mohawe maupo te'asa mia i olodo to Isaraeli.

¹¹ Kupauakomiu: Hadio mia ira mehawe inso i sabaano oleo ka sumooano oleo ka mpentoro mpongkaa mperonga-ronga saru i Burahima, i Saki ka i Yako a laro Poparentaa suruga,

¹² sine luwuno anano Poparentaa atuu ira mempinetadiako a laro wongi-wongia anu wongi mpusu, i ra'aimo hinao ponsabangia ka ke'ingisia.”

¹³ Ka Do'amba i Yesu motaeakono tadulako atuu, ”Pekulemo ka gagiomo kana anu pine'ala-alamu.” Ka i tempo koa mbo'u atuu tompaomo atano.

Ondae i Yesu mokotompao ponino beine i Peturu ka mia susua 8:14-17 (Mrk. 1:29-34; Luk. 4:38-41)

¹⁴ Sahawe-Do a rahano i Peturu, Dokitaomo i Yesu ponino beine i Peturu tepombole hangano mahaki mokula.

¹⁵ Onaemo ka Do'inio kaeno beine atuu, ka tampulaomo mokulano. Mewanguomo ka ipekakaako Ira.

¹⁶ Tamo wongi mewinawa iramo ndi Ondae i Yesu hadio mia anu pinewinsokino onitu nsa'o ka butu asa mpali pau Ondae i Yesu sumaari ira onitu nsa'o atuudo ka mokotompa ira anu memahaki.

¹⁷ Igagi mongkona atuu ka i'inihii pau anu pinohaweno Nabi Yesaya, ”Ondaemo anu tumembio molemato ka hakito.”

Mongkona tumonda Ira i Yesu 8:18-22 (Luk. 9:57-62)

¹⁸ Tempono Dokita ira i Yesu mia hadio lumimbu Ira, metena Ira ka dompesakiako.

¹⁹ Ka i'amba haweomo asa anu monto'ori Taura ka ipotaeako Ira, ”Guru, aku tumonda Komiu, maupo isua Ilako.”

²⁰ Dopotae i Yesu ndi onae, ”Serigala hinao aano ka manu-manu hinao senono, sine i Ana Manusia nahina po'ianga pomboleano ulu-Do.”

²¹ Asa mia susua, onaemo asa ana guru-Do, motaeako Ira, ”Ue, I'indu akumo ka kulako ari kumaburu ira amaku.”

²² Sine Dopotae i Yesu ndi onae, ”Tonda Akumo ka po'ineeomo mia mate ka domengkaburu ira mia matedo.”

Ondae i Yesu mokomanteo umangi 8:23-27 (Mrk. 4:35-41; Luk. 8:22-25)

²³ Ka Do'amba i Yesu me'ula a bangka ka luwuno mbo'u ana guru-Do mpetonda.

²⁴ Borono mepuuriomo angi mokora a rano atuu, ranta bangka atuu itutuwio bomba, sine Ondae i Yesu moturi.

²⁵ Ka me'aiwa iramo ana guru-Do wangu Ira, dompotae, ”Ue, Ikadudui kita, kita memasola.”

²⁶ Dopotaeako ira, ”Tembio ka imedoito, omiu anu kodei pompe'ala-alamiu?” Ka Do'amba mewangu i Yesu ka Dokuahakono angi ka rano atuu, onaemo ka igagi temonto ntu'u rano atuu.

²⁷ Ka mengkohali-hali iramo mia atuudo, dompotae, ”Mia hapake Ondae andio, ranta angi ka maupo rano metenunu ndi Ondae?”

Orua mia pinewinsokino onitu nsa'o pinokotompa 8:28-34 (Mrk. 5:1-20; Luk. 8:26-39)

²⁸ Sahawe-Do i asatowa, onaemo witado to Gadara, aiwa iramo inso a ngkaburu orua mia anu pinewinsokino onitu nsa'o tepohaweako Ira i Yesu. Ondae tedoa dinoitoako, ranta nahina maupo te'asa mia anu sapa telaloio sala atuu.

²⁹ Ka mebooli iramo, dopotae, ”Hapa I'ungkeakami, hei Ana-Do Ue Ala? Nde onaeke I'aiwaako ramai Komiu bobarasai kami napi tempono?”

³⁰ Nahi olai inso ndi ondae atuu hinao asa bawaa boe kontongaado mpo'ungke kaangado.

³¹ Ka mpo'ema iramo onitu nsa'o atuu ndi Ondae, dompotae, ”Tewala Isaari kami, Itena kamimo mpelimba a laro bawaano boe atuudo.”

³² Dopotaeako ira i Yesu, ”Imelakomo!” Ka do'amba mpeluarako ka mpewinso a laro luwuno boe atuudo. Onaemo ka dompentoa luwu bawaano boe atuudo inso a wingke tii a rano ka memate a laro uwoi.

³³ Onaemo ka dompolai anu mpodagai boe atuudo ka sahawedo a ngkota, domentutuluomo luwuakoano, ka mongkona mbo'u mia anu pinewinsokino onitu nsa'o atuudo.

³⁴ Onaemo ka dompeluarako luwuno mia a ngkota tepohaweako Ira i Yesu ka mansado tepohaweako Ira, dodada Iramo, ka Dobintao witado.