I MATIU 7 - Wunta Mempori

Mongkona pobitara 7:1-5 (Luk. 6:37-38, 41-42)

¹ ”Si mpobitara, ka si mebinitara.

² Hangano kana koa pobitaramiu, kanatuu koa mbo'u komiu mebinitara ka kana koa ponsa'umiu, onae koa mbo'u komiu mensina'uako.

³ Tembio ka ukitao mopulino pepaekompomu, sine sobo a laro matamu nahi uto'orio?

⁴ Kana'umpe ka upokompotaeakono pepaekompomu: Po'ineeomo ka ku'oninio mopuli atuu inso a matamu, kahinaano hinao sobo a laro matamu.

⁵ Hei mia mo'onde-onde, oninio ari sobo inso a matamu, ka ta moiko pengkitamu umoninio mopuli atuu inso a matano pepaekompomu.”

Mongkona anu mempori ka anu masuli olino 7:6

⁶ Sangka anu mempori si meweeakono dahu ka mutiara si mentendeakono boe, ka si lolandaakono karuno, ka i'amba mewolili rumago-rago komiu.

Mongkona mo'indu pekakai 7:7-11 (Luk. 11:9-13)

⁷ ”Impo'emamo, ka komiu mewineeako; Impo'ungkemo, ka komiu mpohawe; impetingko-tingkomo, ka komiu me'inungkahiako tondo.

⁸ Hangano sompo mia anu mo'ema, montarima ka sompo mia anu mo'ungke, mohawe ka sompo mia anu metingko-tingko, inungkahiako tondo.

⁹ Hinaoke te'asa mia inso ndi omiu anu moweeakono watu anano, ba ipo'ema roti,

¹⁰ ke moweeakono ule, ba ipo'ema bou?

¹¹ Gagi tewala omiu anu mpoweweu mosa'o mponto'ori komiu mpompowee anu moiko a anamiu, tamoako Ondae Amamiu anu i suruga! Ira koa mompowee anu moiko a mia anu mo'ema ndi Ondae.”

Sala anu mentee 7:12-14

¹² ”Luwuakoano anu inehemiu ka domeweweuo mia ndi omiu, weweuomo mbo'u kanatuu ndi ondae. Onaemo ihino luwuno songka Taura ka wuntado nabi.

¹³ Impewinsomo a mpewowa anu ma'iso atuu, hangano langkai pewowa ka malua sala anu te'aro a matea, ka hadio mia anu mpewinso telaloio;

¹⁴ hangano ma'iso pewowa ka kodei sala anu te'aro a ntuwua, ka tedei mia anu humaweo.”

Mongkona pompaguru anu mompopo'oo 7:15-23

¹⁵ ”Imetangkoro ira nabi mpegaupi anu mehawe ndi omiu kana bimba, sine menteeano ondae onaemo serigala anu lambaha.

¹⁶ Inso a wuano komiu mento'ori ira. Hinaoke mia mo'opu wua anggoro a ngkeuno rui ke wua ara inso a ewo rui?

¹⁷ Kanandiomo sompo keu anu moiko mewuaako wua anu moiko, sine keu anu nahi moiko mewuaako wua anu nahi moiko.

¹⁸ Nahina keu anu moiko mewuaako wua anu nahi moiko, ke keu mbo'u anu nahi moiko mewuaako wua anu moiko.

¹⁹ Ka sompo keu anu nahi pewuaako wua anu moiko, manasa tinuehi ka pinetadiako a laro api.

²⁰ Gagi insomo a wuano komiu mento'ori ira.

²¹ Komba sompo mia anu mebooli ndi Ongkue: Ue, Ue! ta mewinso a laro Poparentaa suruga, tendeano mia anu weweuo po'ehe-Do Ama-Ku anu i suruga.

²² A oleo pokotompa hadio mia ta mebooli ndi Ongkue: Ue, Ue, kombake kimempauo anu ta gagi a nee-Miu ka mponsaari onitu a nee-Miu, ka mpoweweu hadio anu kinohali-haliako a nee-Miu koa mbo'u?

²³ I tempomo atuu Aku pauako ira a menteeano ka mepau: Nahi Kuhori tumo'ori komiu! Impolaimo inso ndi Ongkue, luwumiu anu mpoweweu mosa'o!”

Orua rupa pompotoroa raha 7:24-27 (Luk. 6:47-49)

²⁴ ”Sompo mia anu rumongeo pau-Ku andio ka iweweuo, mengkenaomo saru mia pande mosongka, anu wanguo rahano a wawo watu.

²⁵ Ka i'amba metiiomo usa ka haweomo mowo, ka i'amba rumumpao angi raha atuu, sine raha atuu nahi tebangku hangano winangu a wawo watu.

²⁶ Sine sompo mia anu rumongeo pau-Ku andio ka nahi weweuo, onae mengkena saru mia benge-benge, anu wanguo rahano a wawo one.

²⁷ Ka i'amba metiiomo usa ka haweomo mowo, ka i'amba rumumpao angi raha atuu, onaemo ka itebangku raha atuu ka lansaraomo tebetano.”

Pompaudo anu mporonge 7:28-29

²⁸ Ka umari-Do i Yesu pauo pau andio, mengkohali-hali iramo mia hadio atuu merongeo pompaguru-Do,

²⁹ hangano Dopaguru ira kana mia anu pabawa, nahi kana anu mponto'ori Taurado.