I MATIU 6 - Wunta Mempori

Mongkona pompowee pontulungi 6:1-4

¹ ”Impe'ihilaroo, si meweweuo gau mpesombamiu i arodo mia ka domengkitao, hangano tewala kanandio, nahi komiu mpohawe tambomiu inso ndi Ondae Amamiu anu i suruga.

² Gagi tewala komompowee anu mentee, si paleleo mongkona atuu, kana anu wineweudo mia mpo'onde-onde a luwuno raha tepumpua ka a luwuno sala kodei, ka dome'unde-unde ira mia. Kupauakomiu: Menteeano mpohawe iramo tambodo.

³ Sine tewala mompoweeko anu mentee, siimo ito'orio kae manggalimu hapa wineweuno kae ngkoanamu.

⁴ Po'ineeomo pompowee anu mentee atuu ka itewuni iwineeako, ka Ondae Amamu kumitao anu tewuni Ira sumuloakomu.”

Mongkona mekakai 6:5-15 (Luk. 11:2-4)

⁵ ”Ka tewala komiu mpekakai, si mpekakai kana mia mpo'onde-onde. Inehedo mempauo pekakaido saru mpentade a laro raha tepumpua ka a ntepotowoano sala langkai, ka domengkita ira mia. Kupauakomiu: Menteeano mpohawe iramo tambodo.

⁶ Sine tewala komekakai, pewinsomo a laro bolongkomu, tondoomo pewowa ka pekakaimo ndi Ondae Amamu anu kongko a ntewuniano. Ka Ondae Amamu kumitao anu tewuni Ira sumuloakomu.

⁷ Ka mbo'u a laro mpekakaimu atuu si hadio mpena pau kana anu domeleleoakono mia anu nahi domento'ori Ira Ue Ala. Potaedo nine hangano hadiono pau pekakaido ta inindu.

⁸ Gagi omiu si mengkana ondae, hangano Ondae Amamiu tumo'orio hapa anu kineremiu se'eluno napi ime'emao ndi Ondae.

⁹ Onaemo pu'uno impekakaimo kanandio: Amamami anu i suruga, nee-Miu ka ipinokomempori,

¹⁰ Poparentaa-Miu ka ihawe, ka igagimo po'ehe-Miu i tolino kana i suruga.

¹¹ Ipowee kami kaangamami oleo andio ka isompo

¹² ka I'ampuniomo halamami, kana omami mbo'u me'ampunio salado walimami ndi omami;

¹³ ka si wawa kami a laro po'ara-arahakoa, sine Ipotola kamimo inso ndi mosa'o. [Hangano Omiumo anu me'ueo Poparentaa ka pabawa ka marambaa ranta nahina tampulaano. Ami.]

¹⁴ Hangano tewala ime'ampunio salado mia, Ondae Amamiu i suruga Ira umampuni komiu mbo'u.

¹⁵ Sine tewala nahi ime'ampuni ira mia, Ondae mbo'u Amamiu nahi Ira umampunio salamiu.”

Mongkona puasa 6:16-18

¹⁶ ”Ka tewala mempuasa komiu, si mpopokitao rupamiu mompemasusa kana mia mo'onde-onde. Domebalio rupado, ka domengkitao koa mia nine kontongaado mempuasa. Kupauakomiu: Menteeano mpohawe iramo tambodo.

¹⁷ Sine tewala omue puasa, lanaomo ulumu ka pero'umo,

¹⁸ ka si domengkitao mia nine kontongaamu puasa, tendeano butu Ondae Amamu anu kongko a ntewuniano. Ka Ondae Amamu kumitao anu tewuni Ira sumuloakomu.”

Mongkona mopumpu arataa 6:19-24

¹⁹ ”Si popumpu arataa i tolino; i tolino usu ka ta'ilasi ta sumolangio ka mia monako ta kumekeo ka iponakoo.

²⁰ Sine pumpuakonomo koroimu arataa i suruga; i suruga nahi ta sumolangio usu ka ta'ilasi ka mia monako nahi ta kumekeo ka monakoo.

²¹ Hangano ba isua ipo'ia arataamu, i tu'ai mbo'u ipo'ia aroamu.

²² Mata onaemo huluno koroi. Tewala moiko matamu, mewineomo asa ngkoroimu;

²³ Ba mosa'o matamu, wongi-wongiomo asa ngkoroimu. Gagi tewala mewine anu kongko ndi omue wongi-wongiomo, tedoaomo wongi mpusu wongi-wongia atuu.

²⁴ Nahina maupo te'asa mia mokompe'ue te'orua. Hangano tewala kanatuu, ta umo'aliaakono anu asa mia ka mehohawao anu susua, ke ta metenunu a asa mia ka nahi perioo anu susua. Nahi komiu mpokompe'ue ndi Ondae Ue Ala ka mpe'ue a Arataa.”

Mongkona salalaro 6:25-34 (Luk. 12:22-31)

²⁵ ”Onaemo pu'uno ka Kupauakomiu: Siimo imesala-laroakono tuwumiu, ba hapa anu komiu mengkaano ke me'inuo, ka siimo imensala-laroakono mbo'u koroimiu, ba hapa ta pesangkamiu. Kombake tuwu atuu mentuduopo sekono kaanga ka koroi atuu mentuduopo sekono sangka?

²⁶ Kita iramo manu-manu i langi, anu nahi dompompaho ka nahi domensowi ka nahi dompopumpu kaangado a nsi'e, sine Dopaka ira koa Amamiu anu i suruga. Kombake olaiopo polaluamiu sekono manu-manu atuudo?

²⁷ Isemake i olomiu anu hangano sala-larono mokontiangio maupo te'asa hiku sala ntumuwuno?

²⁸ Ka tembio ka imensala-laro mongkona pesangkamiu? Kitao sisino bunga a lere, anu tuwu nahi po'angga ka nahi pohoru,

²⁹ sine Kupauakomiu: I Salomo maupo saru luwuno marambano nahi pesangka mengkena tekosino kana asa inso a bunga atuu.

³⁰ Gagi tewala kanandio Doramba-rambao Ue Ala ewo a lere, anu kongko oleo andio ka tisomo tinadi a laro api, nde nahi ta laluaopoke Dopoposangka komiu, hei mia anu makura pompe'ala-alano?

³¹ Onaemo pu'uno siimo imensala-laro ka mpotae: Hapake anu ta kaangamami? Hapake anu ta inuamami? Hapake anu ta pesangkamami?

³² Luwuno atuu dome'ungkeo luwuno tongku anu nahi domento'ori Ira Ue Ala. Sine Ondae Amamiu i suruga tumo'orio, nine imengkereo luwuno atuu.

³³ Sine ime'ungkeomo ari Poparentaa-Do Ue Ala ka mentee-Do, ka luwuno atuu Ira tumiangiakomiu.

³⁴ Onaemo pu'uno si mensalalaro mongkona oleo tisomo, hangano oleo tisomo hinao masusano onaeno. Masusaa asa oleo sompoomo tiano asa oleo.”