I MATIU 5 - Wunta Mempori

PONTUTULUDO A WAWONO PONGKU WITA LAMORO 5–7 Pau Me'uraa 5:1-12 (Luk. 6:20-23)

¹ Tempono Dokita ira i Yesu mia hadio atuu, mewuatako Iramo a wawo pongku ka mansa-Do mentoro, me'aiwa iramo ana guru-Do ndi Ondae.

² Ka mompu'u Iramo i Yesu mepau ka paguru ira, Dopotae,

³ ”Me'uraomo mia memongkokolaro i aro-Do Ue Ala, hangano ondaemo anu mpe'umbuo Poparentaa Nsuruga.

⁴ Me'uraomo mia mompemasusa, hangano ira mentinarero.

⁵ Me'uraomo mia anu molusa aroado, hangano ira mpe'umbuo tolino.

⁶ Me'uraomo mia anu mokoninggo ka mokorangaako menteea, hangano ira mempinokoteende.

⁷ Me'uraomo mia anu me'aroa, hangano ira mpohawe pe'aroaa.

⁸ Me'uraomo mia anu mempori aroado, hangano ira mengkita Ira Ue Ala.

⁹ Me'uraomo mia anu mowawa sintuwua, hangano ira menineeako ana-Do Ue Ala.

¹⁰ Me'uraomo mia anu binobarasai hangano menteea, hangano ondae anu mpe'umbuo Poparentaa Suruga.

¹¹ Meme'ura komiumo, ba hangano Ongkue ka imentinata ka binobarasai ka imempinosebeako luwuno anu mosa'o.

¹² Impo'unde ka memawongkomo, hangano tambomiu langkai i suruga, hangano kanandio koa mbo'u dontebobarasai luwuno nabi anu mpese'elungi komiu.”

Ohia tolino ka mewineno tolino 5:13-16

¹³ ”Omiumo ohiano tolino. Tewala ohia atuu moteweomo, hapamoke ipinokomopa'iako? Nami hina mbo'u tuduno tendeano tinadi ka domelandao mia.

¹⁴ Omiumo mewineno tolino. Kota anu kongko a wawo ntorukuno nahi ta tewuni.

¹⁵ Kanandio koa mbo'u mia nahi pompokomelanga hulu ka i'amba numaao a ntoto ganta, tendeano a wawo karuno hulu ka iwantahio luwuno mia a laro raha atuu.

¹⁶ Ka ikanandiomo mewinemiu mewanta i arodo mia, ka domengkitao wineweumiu anu moiko ka dompelangkai Ira Amamiu anu i suruga.”

Ondae i Yesu ka songka Taura 5:17-48 (Luk. 6:27-36)

¹⁷ ”Si mengkolaro-laro, nine Aku hawe mokotampulao songka Taura ke wuntado nabi. Hawe-Ku komba mokotampulao, tendeano Aku umihiio.

¹⁸ Hangano Kupauakomiu: Menteeano ba napi tampula langi ka tolino andio, maupo te'asa hurupu ke maupo te'asa titi nahi ta inonini inso a Songka, ba napi gagi luwu.

¹⁹ Onaemo pu'uno isema anu umoninio asa parentano songka Taura maupo anu lalu kodei, ka mompaguruako kanatuu a mia susua, onae ta mentoro a mpo'ianga i totono ntu'u a Poparentaa Suruga; sine isema anu weweuo ka mompaguruako luwuno parentano Songka, onae ta mentoro a mpo'ianga mantande a laro Poparentaa Suruga.

²⁰ Onaemo ka Kupauakomiu: Tewala tuwu pe'agamamiu nahi laluopo mentee sekonopo tuwu pe'agamado anu mponto'ori Taura ka to Parisi, menteeano nahi komiu mpewinso a laro Poparentaa Suruga.

²¹ Imerongeomo anu domempinauako uempu'uto: Si pompepate; isema anu mompepate asalakono hinuku.

²² Sine Kupauakomiu: Sompo mia anu tekuda a mpepaekompono asalakono hinuku; isema anu motaeakono pepaekompono: Mia melahumoa! Asalakono pino'aro a Puu mpobitara Agama ka isema anu motae: Benge-benge! Asalako tinende a laro api naraka anu kolanga-langa.

²³ Onaemo pu'uno, tewala upesombaakono pesombamu a wawo meda pontunua pesomba ka upokorambeo nine hinao pepaekompomu anu monaa-naa aroa ndi omue,

²⁴ bintaomo pesombamu i arono meda pontunua pesomba atuu ka lakomo pesintuwuakono se'elu pepaekompomu, ka u'amba mekule mesombaakono pesombamu atuu.

²⁵ Pompari-parimo pesintuwuakono pe'u'uamu i tempono iperonga-ronga a nsala, ka si peweengakomu a mpuu pobira ka puu mpobitara atuu meweengakomu a mpegawaino ka ipetadiakomu a laro torungku.

²⁶ Kupauakomiu: Menteeano nahi komeluarako inso i ra'ai, ba napi u'owahio pasuamu hawe ka ileso.

²⁷ Imerongeomo pau-Do i Ue: Si ponsosabo.

²⁸ Sine Kupauakomiu: Sompo mia anu mokokonto beine ka imosisiriakono, monsosaboomo saru onae i laro aroano.

²⁹ Ka tewala mata ngkoanamu mokontesaako, gogoiomo ka tadio atuu, hangano moikoopo ndi omue ba itetadi asa inso a sangka koroimu, sekonopo asa ngkoroimu pinetadiako a laro naraka.

³⁰ Ka tewala kae ngkoanamu mokontesaako, totopiomo ka tadiomo atuu, hangano moikoopo ndi omue ba itetadi asa sangka koroimu sekonopo asa ngkoroimu mewinso naraka.

³¹ Pinauomo mbo'u: Isema anu teponsuaakono beineno asalakono ipoweeakono wunta teposuaa.

³² Sine Kupauakomiu: Sompo mia anu teposuaakono beineno sangkadio hangano monsosabo, onaemo weweuo beineno ka iponsosabo; ka isema anu kumombiao beine anu tineposuaako, onae monsosabo.

³³ Imerongeomo mbo'u anu domempinauako uempu'uto: Si pesumpa nahi mentee, tendeano iniomo sumpamu i aro-Do i Ue.

³⁴ Sine Kupauakomiu: Osi'i ntu'u impesumpa, moiko mesakosiiako langi, hangano langi po'ianga-Do Ue Ala,

³⁵ maupo mesakosiiako tolino, hangano tolino pelandaano karu-Do, ke maupo mesakosiiako Yerusale, hangano Yerusale kota-Do Mokole Langkai;

³⁶ Omue si mbo'u pesumpa mesakosiiako ulumu, hangano nahina pabawamu mokomoputeo ke mokomo'itoo maupo te'asa ngkeu wuumu.

³⁷ Tewala mentee, asalakono impotae: mentee, tewala naahi, asalakono impotae: naahi. Hapa anu lalo umarino atuu te'inso ndi mosa'o.

³⁸ Imerongeomo pau-Do i Ue: Mata me'eu mata ka ngisi me'eu ngisi.

³⁹ Sine Kupauakomiu: Si me'ewaio mia anu moweweu mosa'o ndi omiu, tendeano isemamo koa anu pedeo kombisi koanamiu, weeakono mbo'u kombisi manggalimiu.

⁴⁰ Ka a mia anu ta mosebeko hangano mosisiriakono lembamu, weeakono mbo'u lemba meloemu.

⁴¹ Ka isemamo koa anu dumadaiko melempa asa mili olaino, pelempamo perongaakono te'orua mili olaino.

⁴² Poweeakono mia anu mo'ema ndi omue ka si pebungkuio mia anu ta monsabo ndi omue.

⁴³ Imerongeomo pau-Do i Ue: Pehohawaomo pe'asa miamu ka o'aliaakonomo iwalimu.

⁴⁴ Sine Kupauakomiu: Pehohawa iramo iwalimiu ka pekakaiako ira anu bobarasai komiu.

⁴⁵ Hangano anu kanatuu omiu megagi luwu ana-Do Amamiu anu i suruga, anu mosabao mata oleo tiado mia anu mpoweweu mosa'o ka mia anu mpoweweu moiko ka motiio usa tiado mia anu mentee ka mia anu nahi mentee.

⁴⁶ Tewala impehohawa ira mia anu mpehohawa komiu, hapamoke tambomiu? Kombake puu mporuru sima'ulu mpoweweu ira mbo'u kanandio?

⁴⁷ Ka tewala butu koa a mpepaekompomiu impetabe, hapake polaluano inso a wineweudo mia mehano? Kombake mia anu nahi to'ori Ira Ue Ala mpoweweu ira mbo'u kanandio?

⁴⁸ Onaemo pu'uno asalakono ka imemempori, mengkena kana mempori Amamiu anu i suruga.”