I MATIU 4 - Wunta Mempori

Po'ara-arahakoa i pada one 4:1-11 (Mrk. 1:12-13; Luk. 4:1-13)

¹ Ka Ondae i Yesu Dowawa ira Penaa i pada one ka i'ara-arahako Ira i Mosa'o.

² Ka umari-Do mepuasa, patopulu oleo ka patopulu wongi, poko'ariano mokoninggo Iramo i Yesu.

³ Ka i'amba haweomo puu po'ara-arahako atuu, ka ipotaeako Ira, ”Tewala Omiu Ana-Do Ue Ala, parenta iramo watu andiodo gagi roti.”

⁴ Sine sumangki Ira i Yesu, ”Hinao teburi: Mia tuwu komba butu inso a roti, sine a sompo pau anu meluarako inso a nganga-Do Ue Ala.”

⁵ Ka i'amba i Mosa'o wawa ira a Ngkota Mempori ka numaa Ira a mbumbungeno raha-Do Ue Ala,

⁶ ka i'amba motaeako Ira, ”Tewala Omiu Ana-Do Ue Ala, Ipedontaihakomo loane, hangano hinao teburi: Mongkona Omiu Ira parentao mala'eka-Do ka ira menseneko-Miu a wawo ngkaedo, ka si tetengku karu-Miu a watu.”

⁷ Dopotae i Yesu ndi onae, ”Hinao mbo'u teburi: Si ara-arahako Ira Ue, Ue Ala-mu!”

⁸ Ka i Mosa'o wawa Ira mbo'u a wawontorukuno anu tedoa ondau ka mopokitaako Ira luwuno poparentaa ntolino saru marambano,

⁹ ka ipotaeako Ira, ”Luwuno atuu aku weea-Komiu, tewala menggolontu Komiu mesombai aku.”

¹⁰ Ka motae Ira i Yesu ndi onae, ”Polaimo, Mosa'o! Hangano teburi: Omue asalakono mesombai Ira Ue, Ue Alamu, ka butu ndi Ondae upesomba.”

¹¹ Ka i'amba i Mosa'o binta Ira, ka kitaomo, hadio mala'eka mehawe mekakaako Ira i Yesu.

Ondae i Yesu hawe i Galilea 4:12-17 (Mrk. 1:14-15; Luk. 4:14-15)

¹² Sine tempono Dorongeo i Yesu, nine i Yohane rinakoomo, meliahako Iramo lumako i Galilea.

¹³ Dobintao Nasare ka Dopo'ia-ia i Kapenau, a wiwino rano, a witano i Sebulo ka i Napatali,

¹⁴ ka ite'ihiimo pau-Do Ue Ala, anu pinohaweno nabi Yesaya,

¹⁵ ”Witano i Sebulo ka witano i Napatali, sala lumako a ntahi, wita i asatowano korono Yarade, i Galilea, witado tongku anu susua, –

¹⁶ Tongku anu mpo'ia a laro wongi-wongiano, pongkita iramo mewine anu langkai, ka ndi ondae anu mpo'ia i inia anu inengomino matea, mesabaakoomo Mewine.”

¹⁷ Mompu'u tempo atuu Dopaleleo i Yesu, ”Tepidimo, hangano Poparenta Nsuruga rangkuomo!”

Ondae i Yesu mompoboi ana guru anu amba-ambano 4:18-22 (Mrk. 1:16-20; Luk. 5:1-11)

¹⁸ Ka tempono Ondae i Yesu melempa tumondao wiwino Rano Galilea, Dokitao orua mia mepaekompo, onaemo i Simo anu nineeako i Peturu ka i Andarea, pepaekompono. Kontongaado pontende buanido a rano, hangano ondae puu mpobuani bou.

¹⁹ Motae Ira i Yesu ndi ondae, ”Aiwa, tonda Akumo, ka Aku mokogagi komiu puu mpobuani mia.”

²⁰ Ka i'amba mompari-pari iramo bintao buanido ka dotonda Ira.

²¹ Ka mansa-Do lumako i Yesu inso i ra'ai, Dokitaomo mbo'u orua mia mepaekompo, onaemo i Yakobu anano i Sebedeu ka i Yohane pepaekompono, saru amado i Sebedeu, kontongaado mpokomoikoo buanido a laro bangka. Dopoboi ira i Yesu

²² ka mompari-pari iramo bintao bangkado saru amado, ka do'amba tumonda Ira.

Ondae i Yesu mompaguru ka mompokotompa hadio mia 4:23-25 (Luk. 6:17-19)

²³ Dotanggoliliomo i Yesu luwu wita i Galilea; Ondae mompaguru a laro luwuno raha tepumpua ka paleleo Lele Mawongkoa poparentaa-Do Ue Ala saru mokotampulao luwuno haki ka molemaa i olodo tongku atuu.

²⁴ Ka tepalele iramo i asa wawo wita Siria ka mewinawa iramo luwuno mia anu nahi moiko teweweudo, anu memarasaiako mperupa-rupa haki ka tebobarasaia, anu pinewinsokino onitu nsa'o, anu matewula ka anu puungku, ka Do'amba i Yesu mokotompa ira.

²⁵ Ka mia hadio ntehuhu tumonda Ira. Ondae me'aiwa inso i Galilea ka i Dekapoli, inso i Yerusale ka inso i Yudea ka inso i asatowano koro Yarade.