I MATIU 3 - Wunta Mempori

Yohane Puu Mpobaho 3:1-12 (Mrk. 1:1-8; Luk. 3:3-9, 15-17; Yoh. 1:19-28)

¹ I tempo atuu haweomo i Yohane Puu Mpobaho i pada i Yudea ka ipontutulu,

² ”Intepidimo, hangano Poparenta Nsuruga rangkuomo!”

³ Menteeano onaemo anu tinoono nabi Yesaya tempono ipotae, ”Hinao suarano mia anu meboo-booli i pada one: Patindao sala tia-Do i Ue, pokomoleoako Ira sala-Do.”

⁴ I Yohane mesangkaako lemba meloe inso a wulu unta, ka boo-boono kuli ka kaangano io kosume ka siu hoani.

⁵ Ka mehawe iramo ndi onae palili inso i Yerusale, inso i asa wawowita Yudea ka inso a luwuno wita i wiwi ngkoro Yarade.

⁶ Ka do'amba memangakuakono halado ibaho ira i Yohane a ngkoro Yarade.

⁷ Sine tempono ikitao hadio ira to Parisi ka to Saduki me'aiwa ira mpepebaho, ipotaeako ira, ”Hei omiu inuleno ule me'ipo. Isemake pauakomiu, nine komiu mpokompolai inso a tekuda anu ta hawe?

⁸ Gaagi impoluarakomo wua anu menunu saru tepidia.

⁹ Ka si mpotae, nine komiu mpokompotae ilaro aroamiu: i Burahima ama mami! Hangano kupauakomiu: Ondae Ue Ala polio mokogagio anano i Burahima inso a watu andiodo!

¹⁰ Uase tepatindaomo a hakano keu ka sompo keu anu nahi pewua moiko, manasa tinuehi ka tinadi a api.

¹¹ Kubahoakomiu uwoi gagi tondonino tepidia, sine Ondae anu hawe lembui umarino ongkue pabawa Irapo sekono ongkue ka nahi pototoku lumohuo sapatu-Do. Ondae Ira bahoakomiu Penaa Mempori ka saru api.

¹² Poduku kongkoomo a ngkae-Do. Ira mokomorinao ponsesaa-Do ka pumpuo gandu-Do a laro nsi'e, sine awuno seami atuu Ira tumunuo a laro api anu nahi pinokompepate.”

I Yohane baho Ira i Yesu 3:13-17 (Mrk. 1:9-11; Luk. 3:21-22; Yoh. 1:32-34)

¹³ Ka hawe Iramo i Yesu inso i Galilea lumako a ngkoro Yarade ndi Yohane ka ibaho Ira.

¹⁴ Sine i'onto Ira i Yohane, ipotae, ”Omiumo anu asalakono baho aku ka Omiu anu aiwa ndi ongkue?”

¹⁵ Ka do'amba sumangki i Yesu, Dopotaeakono, ”Po'ineeomo ka igagi mongkonatuu, hangano kanandiomo anu tekona to'ihiio luwu po'ehe-Do Ue Ala.” Ka itondaako Iramo i Yohane.

¹⁶ Umari-Do binaho, Ondae i Yesu ronga me'engka inso a uwoi ka itempo mbo'u atuu langi te'ungkahi ka Dokitao Penaa-Do Ue Ala kana manu-manu marapatii, metii i wawo-Do.

¹⁷ Ka i'amba terongeomo suara inso i suruga anu motae, ”Ndiomo Ana-Ku anu pinehohawa-Ku. Onaemo mokomawongko Aku.”