I MATIU 28 - Wunta Mempori

Pewangu-Do i Yesu 28:1-10 (Mrk. 16:1-8; Luk. 24:1-12; Yoh. 20:1-10)

¹ Mansano telaloomo oleo Saba, tamo tebosi towea a oleo amba-ambano minggu atuu, lumako iramo i Maria Madalena ka i Maria anu susua, kumita-kitao kaburu atuu.

² Ka gagiomo leelu anu tedoa meroku hangano aasa mala'eka-Do i Ue metii inso i langi ka aiwa a watu atuu ka lumundio ka i'amba mentoro i wawono.

³ Rupano kana koliki ka sangkano mopute kana seru baku.

⁴ Ka anu mpodagai atuudo mpondidi-ndidi medoito ka gagi kana mia memate.

⁵ Sine mala'eka atuu motaeako ira beine atuu, ”Siimo imedoito; hangano kuto'orio ime'ungke Ira i Yesu anu pinaso a ngkeu pinotamba atuu.

⁶ Nami Dondio i ndi'ai, hangano mewangu Iramo, mengkena kana anu Dopauomo. Aiwa, imengkitaomo pepombolea-Do.

⁷ Ka impotuturakomo melako ka imempauako ira ana guru-Do nine mewangu Iramo inso i olodo mia mate. Dopese'elungi komiu lumako i Galilea; i ra'ai komiu mengkita Ira. Menteeano kupauakomiumo.”

⁸ Mpontuturako iramo melako inso a ngkaburu atuu, medoito mesaloako mawongko anu langkai ka dompelulu mpontuturako ka domempauako ira ana guru-Do i Yesu.

⁹ Borono Ondae i Yesu tepohaweako ira ka Dopotae, ”Rodoa ndi omiu.” Domerangkuhi Ira ka dompekopui a ngkaru-Do saru mpesombai Ira.

¹⁰ Ka Dopotaeako ira i Yesu, ”Si medoito. Imelako ka imempauako iramo pepaekompo-Ku, ka domelako i Galilea, ka i ra'aimo ira mengkita Aku.”

Pegaupido Puu Mpobitara Agama 28:11-15

¹¹ Da kontongaado a nsala, me'aiwa iramo ba opia mia mpodagai atuu melako a ngkota ka mempauo luwuno anu gagi atuu a mpetewawado sando mpesomba.

¹² Ka umarido nteriso saru mia memota'u, domempakosiomo ka dompoweeako ira hadio doi a nsorodadu atuudo

¹³ ka dompotae, ”Asalakono ka imempauo, nine ana guru-Do me'aiwa wongi-wongi ka domponakoo tempono impoturi.

¹⁴ Ka tewala anu gagi andio dorongeo petewawa i wita atuu, kami koa mpepauako ira, ka si mpohawe anu mokonsusa komiu.”

¹⁵ Domentarimao doi atuu ka meweweuo kana anu dome'inoliwiako. Ka tutulu andio telele i olodo to Yahudi hawe kanandio-andio.

Parenta mompalele Lele Mawongkoa 28:16-20

¹⁶ Ka ana guru anu hopulu ka aasa atuu mpelungka melako i Galilea, a pongku anu Dopatotoako iramo i Yesu.

¹⁷ Mansado mengkita Ira dompesombai Ira, sine ba opia mia nanta-nanta.

¹⁸ Ondae i Yesu rumangkuhi ira ka Dopotae, ”Wineeako Akumo luwuno pabawa i suruga ka i tolino.

¹⁹ Onaemo pu'uno imelakomo, impokogagi iramo ana guru-Ku luwuno tongku ka imebaho iramo a nee-Do i Ama ka Ana ka Penaa Mempori,

²⁰ ka imempaguru iramo meweweuo luwuakoano anu Kuparentaa komiu. Ka imento'oriomo, Aku kumongkomi komiu mpiha hawe a mpokotampaano tempo.”