I MATIU 26 - Wunta Mempori

Pompopoto'ori kopepantono mongkona tebobarasaia-Do i Yesu – Tinoo mepate Ira i Yesu 26:1-5 (Mrk. 14:1-2; Luk. 22:1-2; Yoh. 11:45-53)

¹ Mansano umari atuu luwuno pompaguru-Do i Yesu, mepau Iramo a ana guru-Do,

² ”Imento'orio, nine orua oleopo ta riname-rame oleo Pasa, ka i Ana Manusia Ira pineweengako ka Ira pinaso a ngkeu pinotamba.”

³ I tempo atuu mpepumpu iramo petewawado sando mpesomba ka mia memota'udo tongku Yahudi a langkanaeno Sando Mpesomba Langkai anu meneeako i Kayapa,

⁴ ka donterisoakono aasa tinoo mpe'akala ka domerako Ira i Yesu ka mepate Ira.

⁵ Sine dompotae, ”Osi'i a tempo porame-ramea, ka si gagi tegagaa i olodo palili.”

Ondae i Yesu inurapi 26:6-13 (Mrk. 14:3-9; Yoh. 12:1-8)

⁶ Tempono Ondae i Yesu kongko i Betania, a rahano i Simo mia haki ngkuli mesaki,

⁷ aiwaomo aasa beine ndi Ondae mowawa aasa pido-pido puala mina-mina anu masuli olino. Mina-mina atuu itawao a wawo ulu-Do i Yesu, anu tekonai mentoro mongkaa.

⁸ Kumitao atuu ntekuda iramo ana guru ka dompotae, ”Pombio ponsosalaa andio?

⁹ Hangano lana atuu ba i'inasa masuli olino ka doino domewineeako mia memongkokolaro.”

¹⁰ Sine Doto'orio i Yesu pinewowolodo ka Dopotae, ”Tembio ka impokomasusao beine andio? Hangano onae moweweuomo aasa wineweu anu moiko ndi Ongkue.

¹¹ Hangano mia memongkokolaro kongko ira mpiha ndi omiu, sine Ongkue nahi Aku merongaakomiu mpiha.

¹² Hangano itawao lana atuu a ngkoroi-Ku, iweweuomo aasa pepatinda a mpekaburua-Ku.

¹³ Kupauakomiu: Menteeano isuamo koa Lele Mawongkoa andio ipinalele i asa wawontolino, hapa anu wineweuno beine andio ta pinau mbo'u ka irinorambe.”

I Yudasi umasa Ira i Yesu 26:14-16 (Mrk. 14:10-11; Luk. 22:3-6)

¹⁴ Ka i'amba lumakoomo asa mia inso a hopulu ka orua ana guru atuu, anu meneeako i Yudasi to Karioti, a mpetewawado sando mpesomba.

¹⁵ Ipotae, ”Hapa anu komiu mpoweeakune, ka kupeweengako Ira ndi omiu?” Dome'owahio ndi onae tolu pulu doi salaka.

¹⁶ Ka mompu'u i tempo atuu i'ungkeo tempo anu moiko ka ipeweengako Ira i Yesu.

Ondae i Yesu mongkaa Pasa saru ana guru-Do 26:17-25 (Mrk. 14:12-21; Luk. 22:7-14, 21-23; Yoh. 13:21-30)

¹⁷ A oleo amba-ambano inso a oleo langkai Roti Nahi Peragi me'aiwa iramo ana guru-Do i Yesu ndi Ondae ka dompotae, ”Isua po'ehe-Miu kimpopatindaa-Komiu pelimbua Pasa?”

¹⁸ Sumangki Ira i Yesu, ”Imelakomo a ngkota ndi Anu ka pauakono: Pe'oliwi-Do Guru: tempo-Ku tamo ronga hawe; a rahamumo Aku rumame-rameo Pasa merongaako ira ana guru-Ku.”

¹⁹ Ka do'amba meweweuo ana guru kana anu Dotenaako ira i Yesu ka mpopatinda Pasa.

²⁰ Mansano wongi, Ondae i Yesu mentoro mongkaa merongaako ira hopulu ka orua ana guru atuu.

²¹ Ka tempono kontongaado mpongkaa, Dopotae, ”Kupauakomiu, menteeano asa mia i olomiu ta meweenga-Kune.”

²² Ka saru aroa anu tedoa mpompemasusa mpotae iramo nte'o'asa mia ndi Ondae, ”Komba ongkue, oo Ue?”

²³ Sumangki Ira, ”Onae anu merongaa-Kune umemoo kaeno a sempe andio, onaemo anu ta meweenga-Kune.

²⁴ I Ana Manusia lano Ira lumako menunu saru anu teburi mongkona Ondae, sine masolaomo mia anu hangano onae ka Dopineweengako i Ana Manusia atuu. Moikoopo mia atuu ba nahi pine'anaako.”

²⁵ I Yudasi, anu ta meweengako Ira atuu sumangki, ipotae, ”Komba ongkue, oo Guru?” Dopotae i Yesu ndi onae, ”Omuemo anu pauo.”

Pompakosia pelimbua wongi 26:26-29 (Mrk. 14:22-25; Luk. 22:15-20; 1Kor. 11:23-25)

²⁶ Ka tempono kontongaado mpongkaa, Do'alao i Yesu roti, ka Doronsoo, sumiba-sibao ka Do'amba weeako ira ana guru-Do ka Dopotae,”Alaomo, kaanomo, ndiomo koroi-Ku.”

²⁷ Umarino atuu Do'alao tonde, ka Dopo'unde-unde ka Do'amba weeako ira ka Dopotae, ”Ime'inuomo, luwumiu, inso a tonde andio.

²⁸ Hangano onaemo andio rea-Ku, rea pedandia, anu inuwuako hadio mia gagi po'onini hala.

²⁹ Sine Kupauakomiu: mompu'u kanandio-andio nahi Aku mo'inu mbo'u hasilino keu anggoro andio hawe a oleo ka Ku'inuo, onaemo anu wo'ohu merongaakomiu a laro Poparentaa-Do Ama-Ku.”

I Peturu ta humapu Ira i Yesu 26:30-35 (Mrk. 14:26-31; Luk. 22:31-34; Yoh. 13:36-38)

³⁰ Umari mpenaniako penani po'unde-unde, lumako Iramo i Yesu ka ana guru-Do a Pongku Saitu.

³¹ Ka motae Iramo i Yesu ndi ondae, ”Wongi andio luwumiu ta telelu pompe'ala-alamiu hangano Ongkue. Hangano hinao teburi: Aku mepateo puu mpompakambi ka bawaano bimba atuu ira ntesiarawo.

³² Sine umari-Ku mewangu, Aku mese'elungi komiu lumako i Galilea.”

³³ Sumangki i Peturu, ”Maupo luwudo telelu pompe'ala-alado hangano Omiu, ongkue naahi ntu'u.”

³⁴ Dopotaeakono i Yesu, ”Kupauakomu, menteeano wongi andio, napi kokoroido manu, pentolumo uhapu Aku.”

³⁵ Motae i Peturu ndi Ondae, ”Maupo kumate merongaa-Komiu, nahi aku humapu Komiu.” Luwuno ana guru mbo'u anu susua mpotae mbo'u kanatuu.

I bonde Getisemani 26:36-46 (Mrk. 14:32-42; Luk. 22:39-46)

³⁶ Ka hawe Iramo i Yesu mperonga ana guru-Do i asa mpo'ianga anu meneeako Getisemani. Ka Do'amba motaeako ira ana guru-Do, ”Impentoromo i ndi'ai, kontongaa-Ku lumako mekakai i ra'ai.”

³⁷ Ka Dowawao i Peturu saru orua ira anano i Sebedeu merongaako Ira. Ka mompu'u Iramo mompemasusa ka mondidi-ndidi,

³⁸ ka Do'amba motaeako ira, ”Tedoa masusa aroa-Ku, kana mingki akumo mate. Impo'iamo i ndi'ai ka impetangkoromo saru Ongkue.”

³⁹ Ka Dopelelaako tedei, ka Do'amba menggolontu mesomba ka mekakai, Dopotae, ”Oo Ama-Ku, ba mansa Ipemoikoo, po'ineeomo tonde andio ka itelalo inso ndi Ongkue, sine siimo kana po'ehe-Ku, tendeano kana po'ehe-Miu.”

⁴⁰ Umarino atuu mekule Ira a ana guru-Do ka Dohawe ira kontongaado mpoturi. Ka Dopotaeakono i Peturu, ”Nahi mempolioke mpetangkoro te'asa langku saru Ongkue?

⁴¹ Impetangkoromo ka impekakaimo, ka si ntedonta a mpo'ara-arahakoa: penaa lano metonda, sine koroi molema.”

⁴² Ka Do'amba lumako anu kompenduano ka Dopekakai, Dopotae, ”Oo Ama-Ku tewala nahi pemoikoo tonde andio itelalo, sangkadio ba Ku'inuo, ka igagimo po'ehe-Miu!”

⁴³ Ka tempono Dopekule mbo'u, Dohawe ira kontongaado mpoturi, hangano matado mobeaomo.

⁴⁴ Dopo'inee ira i tu'ai ka Do'amba lumako ka mekakai anu kopentoluno ka Dopekakaiako onae koa mbo'u atuu.

⁴⁵ Umarino atuu aiwa Ira a ana guru-Do ka Dopotaeako ira, ”Kanandio-andio impoturimo ka impenaa-naamo. Kitao, tempono haweomo, nine i Ana Manusia pineweengako a ngkaedo mia ntehala.

⁴⁶ Impewangumo, aiwamo ka tomelako. Onae anu meweenga-Kune umpedaomo.”

Ondae i Yesu rinako 26:47-56 (Mrk. 14:43-50; Luk. 22:47-53; Yoh. 18:1-11)

⁴⁷ Da kontongaa-Do mepau i Yesu haweomo i Yudasi, asa mia inso a hopulu ka orua ana guru atuu, ka meronga saru onae asa bawaa langkai mia mpowawa ponai ka pontunduhi, tinenano petewawado sando mpesomba ka mia memota'uno tongku Yahudi.

⁴⁸ Mia anu meweengako Ira umariomo pauako ira petondoni andio, ”Mia anu aku woo-wooo, Ondaemo atuu, imerako Iramo.”

⁴⁹ Ka montuturakoomo lumako tepohaweako Ira i Yesu ka ipotae, ”Tabe Guru.” Ka i'amba woo-woo Ira.

⁵⁰ Sine Dopotaeakono i Yesu, ”Hei Sambe'e, onaemoke u'aiwaako?” Ka me'aiwa iramo me'ini Ira i Yesu ka domerako Ira.

⁵¹ Sine asa mia anu tumonda Ira i Yesu i weroo kaeno, butao ponaino ka ipesaleakono a atano Sando Mpesomba Langkai ranta te'opu birino.

⁵² Onaemo ka Dopotaeakono i Yesu, ”Winsoomo ponai atuu a tampino, hangano ba isema mompake ponai, ta mateako ponai.

⁵³ Ke potaemu, nine nahi Aku polio mebooli ndi Ondae Ama-Ku, ka Doronga montena torea hopulu ka orua bawaa mala'eka mokowali Aku?

⁵⁴ Tewala kanatuu, kana'umpe ta inihii anu binuri a Wunta Mempori, anu motae, nine asalakono gagi kanandio?”

⁵⁵ I tempo atuu Ondae Dopotae i Yesu a mia hadio, ”Potaemiu Ongkue andio puu mporontu, ka ime'aiwa merako Aku sompo saru ponai ka pontunduhi? Kahinaano sompo-sompo oleo Kupentoro mompaguru a Raha-Do Ue Ala, ka nahi merako Aku.

⁵⁶ Sine luwuno andio gagi ka i'inihii anu hinao binuri a wuntado nabi.” Ka do'amba ana guru atuudo binta Ira ka dompolai.

Ondae i Yesu i arono Puu Mpobitara Agama 26:57-68 (Mrk. 14:53-65; Luk. 22:54-55, 63-71; Yoh. 18:12-14, 19-24)

⁵⁷ Umarido merako Ira i Yesu, domewawa Ira i arono i Kayapa, Sando Mpesomba Langkai. I tu'ai mpepumpu iramo anu mponto'ori Taura ka mia memota'u.

⁵⁸ Ka i Peturu tumonda ntoe Ira hawe a kintalano Sando mpesomba Langkai, ka mansano mewinso i larono, onae mentoro i olodo anu mpodagai ka ikitao poko'umariano kara-kara atuu.

⁵⁹ Luwuno petewawado sando mpesomba, tendeano luwuno Puu mpobitara mpo'ungke sakosii megaupi umewai Ira i Yesu, ka dompokohuku mate Ira,

⁶⁰ sine nahi dompohawe, maupo hadio anu mpentade mposakosii megaupi. Sine poko'ariano mentade iramo orua mia,

⁶¹ anu motae, ”Mia andio motae: Aku mokobetao Raha-Do Ue Ala ka wali wanguo i larono otolu oleo.”

⁶² Ka i'amba Sando Mpesomba Langkai atuu mentade ka ipotaeako Ira, ”Nahi Kosumangkioke luwuno pontulurido sakosii andio ndi Omue?”

⁶³ Sine Ondae i Yesu komino mpiha. Ka i'amba motae Sando Mpesomba Langkai atuu ndi Ondae, ”A nee-Do Ue Ala anu tuwu, pauakamimo, ba Omue i Mesia, Ana-Do Ue Ala, ke naahi.”

⁶⁴ Sumangki Ira i Yesu, ”Ipauomo. Sine, Kupauakomiu, mompu'u kanandio-andio komiu mengkitao i Ana Manusia mentoro i koana-Do Anu Tedoa Pabawa ka aiwa a wawo nseru i langi.”

⁶⁵ Onaemo ka berio Sando mpesomba Langkai atuu sangkano ka ipotae, ”Ipepaukiako Ira Ue Ala. Pombio kita mpokere mbo'u sakosii? Kanandio-andio imerongeomo ipepaukiako Ira.

⁶⁶ Kana'umpe pohawemiu?” Mesangki ira ka dompotae, ”Onae asalakono hinuku mate!”

⁶⁷ Ka do'amba me'onuio rupa-Do ka mentidu Ira; mia susua mentunduhi Ira,

⁶⁸ ka dompotae, ”Kuri'a pauakami, hei Mesia, isemake anu tumunduhi-Ko?”

I Peturu humapu Ira i Yesu 26:69-75 (Mrk. 14:66-72; Luk. 22:56-62; Yoh. 18:15-18, 25-27)

⁶⁹ Tempo atuu i Peturu mentoro i bungkuno kintala. Ka aiwaomo asa ata beine ndi onae, ipotae, ”Omue mbo'u wela merongaako Ira i Yesu, to Galilea atuu.”

⁷⁰ Sine onae mehapu i arodo luwuno mia, ipotae, ”nahi kuto'orio, hapa anu tinoomu.”

⁷¹ Tempono ilako a mpewowa langkai, asa ata susua kumitao ka ipotaeako ira mia anu mekongko i tu'ai, ”Mia andio merongaako Ira i Yesu, to Nasare atuu.”

⁷² Ka ihapuo mbo'u saru mesumpa, ”Nahi kuto'orio mia atuu.”

⁷³ Nahi tehine lembuino mia anu mekongko i tu'ai me'aiwa ndi Peturu ka dompotae, ”Manasa omue mbo'u asa mia inso ndi ondae, mengkaa atuu inso a mpepaumu.”

⁷⁴ Ka mompu'uomo i Peturu montotonaa ka ipesumpa, ”Nahi kuto'orio mia atuu.” Ka i tempo atuu kumokoroidoomo manu.

⁷⁵ Onaemo ka irambeo i Peturu hapa anu pinau-Do i Yesu ndi onae, ”Napi kumokoroido manu, pentolumo uhapu Aku.” Ka i'amba lumako i bungkuno ka ipengese mompemasusa.